মহাপুৰুষ শ্ৰীমন্ত শংকৰদেৱৰ দ্বাৰা স্থাপিত পাটবাউসী থান-সত্ৰৰ উন্নয়নৰ বাবে বৰপেটা জিলা প্ৰশাসনে সকলো ধৰণৰ সহায় সহযোগ কৰিবলৈ সাজু আছে।
আজি মহাপুৰুষজনাৰ ৫৭২ সংখ্যক আবিৰ্ভাৱ মহোৎসৱৰ সৈতে সংগতি ৰাখি অসম সত্ৰ মহাসভা আৰু জাতীয় মহাসভাৰ উদ্যোগত পাটবাউসী থানত অনুষ্ঠিত শ্ৰীমন্ত শংকৰদেৱ ভাৰত বৰিষ নৱজাগৰণ ঐতিহ্য মহোৎসৱৰ প্ৰস্তুতিৰ শুভাৰম্ভণি কৰি জিলা উপায়ুক্ত মুনীন্দ্ৰ শৰ্মাই এইদৰে কয়।
মহাসভাৰ উদ্যোগত হাতত লোৱা বছৰজোৰা কাৰ্যসূচীৰ শুভাৰম্ভ উপলক্ষে নৰোৱাৰ বটদ্ৰবা সত্ৰ তথা পাটবাউসীৰ শংকৰদেৱ থানৰ অধিকাৰ দেবানন্দ গোস্বামীৰ সভাপতিত্বত অনুষ্ঠিত অনুষ্ঠানত মুখ্য অতিথি হিচাপে অংশ লৈ দিয়া ভাষণত তেওঁ থানখনলৈ আহি গভীৰ আধ্যাত্মিক পৰিতৃপ্তি লাভ কৰে বুলি উল্লেখ কৰে।
অনুষ্ঠানত দিয়া চমু ভাষণত জিলা তথ্য আৰু জনসংযোগ বিষয়া বিকাশ শৰ্মাই কয় যে, গুৰুজনাই জীৱনৰ গুৰুত্বপূৰ্ণ ১৮ বছৰ কাল অতিবাহিত কৰা এই পৱিত্ৰ ভূমিৰ বিষয়ে পৰ্যাপ্ত প্ৰচাৰৰ অভাৱত ৰাজ্যখনৰ বহু পৰ্যটকেই এই অবগত নহয়। সেয়ে এইখন থানৰ বিষয়ে দেশে-বিদেশে উপযুক্ত প্ৰচাৰ হোৱাৰ যথেষ্ট প্ৰয়োজন আছে।
সভাত সুন্দৰীদিয়া সত্ৰৰ অধিকাৰ জগন্নাথ অধিকাৰী, শুৱালকুছিৰ হাটী সত্ৰৰ অধিকাৰ ৰাজীৱ লোচন সন্ত, মৰিগাঁৱৰ তৰাবাৰী কালদীয়া সত্ৰৰ অধিকাৰ কুসুম কুমাৰ মহন্ত আৰু আৰক্ষীৰ উপ অধীক্ষক ডি জে নাথে চমু বক্তব্য দাঙি ধৰে।
আনহাতে, অনুষ্ঠানৰ সৈতে সংগতি ৰাখি সাচি গছৰ পুলি ৰূপন কৰাৰ উপৰি সাম্প্ৰতিক পৰিস্থিতিৰ পৰিপ্ৰেক্ষিতত সত্ৰৰ বয়োজেষ্ঠ ভকত সকলৰ শৰীৰৰ প্ৰতিৰোধ ক্ষমতা বৃদ্ধি কৰাৰ বাবে আয়ুৰ্বেদিক ঔষধ বিতৰণ কৰা হয়।
ইয়াৰ লগে লগে মণিকাঞ্চন বিশ্বায়ন জ্ঞানজ্যোতি গৱেষণা কেন্দ্ৰৰ ৰূপৰেখাৰ আধাৰত বছৰ জোৰা কাৰ্যসূচীৰে হাতত লোৱা শঙ্কৰাব্দৰ সজাগতা চেতনা বৰ্ষৰ অনুষ্ঠানৰ শুভাৰম্ভ হয়।
সভাৰ উদ্দেশ্য বাখ্যা কৰে অসম জাতীয় মহাসভাৰ মুখ্য সম্পাদক হৰেকৃষ্ণ তালুকদাৰে আৰু শলাগৰ শৰাই আগবঢ়ায় পাটবাউসী থান পৰিচালনা সমিতিৰ সভাপতি ভবেন্দ্ৰ পাঠকে।
