বুধবাৰে গুৱাহাটীৰ ভি.আই.পি. ৰোডস্থিত চচলত ন্যায্য প্ৰাপ্তিৰ দাবীৰে এক ধৰ্ণা কাৰ্য্যসূচী ৰূপায়ণ কৰে সদৌ অসম সংবাদকৰ্মী সন্থাই।
বিভিন্ন সংবাদ প্ৰতিষ্ঠানত কৰ্মৰত প্ৰায় অৰ্দ্ধ শতাধিক শ্ৰমিক-কৰ্মচাৰীৰ উপস্থিতিত হোৱা এই প্ৰতিবাদী কাৰ্য্যসূচীত অংশগ্ৰহণ কৰি এ আই টি ইউ চিৰ সভাপতি মুনীন মহন্ত আৰু চি.আই.টি.ইউৰ সম্পাদক তপন শর্মাই মোদী চৰকাৰৰ শ্ৰম বিৰোধী নীতিৰ কথা উল্লেখ কৰে।
উক্ত প্ৰতিবাদী কাৰ্য্যসূচীত অংশগ্ৰহণ কৰি সন্থাৰ সাধাৰণ সম্পাদক দীপক ভুঞাই সংবাদ পত্ৰ উদ্যোগক বৰ্তমান পৰিস্থিতিৰ পৰা পৰিত্ৰাণ দিবৰ বাবে ‘বিশেষ আৰ্থিক সাহায্য আঁচনি’ ঘোষণাৰ দাবী কৰাৰ লগতে নিউজ প্ৰিন্টৰ ওপৰত ‘অতিৰিক্ত কৰ আৰোপ কৰাৰ ফলত সংবাদপত্ৰৰ জগতখনে তাৰ কু-ফল ভুগিবলগীয়া হৈছে বুলি উল্লেখ কৰে।
ইয়াৰোপৰি তেওঁ দাবী কৰি কয় ‘সকলো অসাংবাদিক সংবাদ কৰ্মীক অৱসৰকালীন ভাত্তা প্ৰদান কৰিব লাগে। সকলো সংবাদ পত্ৰ প্ৰতিষ্ঠানত মাঝিথিয়া দৰমহা আয়োগৰ পৰামৰ্শৱলী প্ৰয়োগ কৰিব লাগে।‘
আনহাতে, উক্ত প্ৰতিবাদত অংশগ্ৰহণ কৰি সন্থাৰ সভাপতি সুদীপ্ত সৰকাৰে দাবী কৰি কয় ‘সংবাদকৰ্মী নিৰাপত্তা আই সোনকালে প্ৰযোজ্য কৰিব লাগে। ৰাজ্য চৰকাৰে সাংবাদিকসকলৰ বাবে নিৰ্মাণ কৰিবলগীয়া আৱাসগৃহসমূহ কেৱল সাংবাদিকসকলৰ বাবে নকৰি সকলো সংবাদকৰ্মীৰ মাজত বিতৰণ কৰিব লাগে।‘
ইয়াৰোপৰি, তেওঁ ‘সাংবাদিক চিকিৎসা আঁচনিত সকলো সংবাদকৰ্মীক অন্তৰ্ভুক্ত কৰাৰ দাবী জনায়।
প্ৰতিবাদৰ অন্তত দিচপুৰ থানাৰ সহকাৰী আৰক্ষী আয়ুক্ত হিমাংশু দাসৰ জৰিয়তে মুখ্যমন্ত্ৰী সৰ্বানন্দ সোণোৱাললৈ স্মাৰক পত্ৰ প্ৰদান কৰে।
