প্ৰথমে বেটিং কৰি আৰম্ভণিতে কিছু শলঠেকত পৰিলেও পাছলৈ আক্ৰমণাত্মক খেলি মুম্বাই ইণ্ডিয়ানছে বৃহস্পতিবাৰে খেলোৱা আইপিএলৰ এখন মেচত কিংছ ইলেভেন পঞ্জাৱৰ বিৰুদ্ধে বিজয় সাৱ্যস্ত কৰে।
আবু ধাবিত খেলোৱা গুৰুত্বপূৰ্ণ মেচখনত পঞ্জাৱক ৪৮ৰাণত পৰাজিত কৰি মুম্বাইয়ে লীগ তালিকাৰ শীৰ্ষস্থানত উপনীত হয়।
টছত হাৰি প্ৰথমে বেটিং কৰা মুম্বাইয়ে নিৰ্দ্ধাৰিত ২০ অভাৰত ৪ উইকেটৰ বিনিময়ত ১৯১ৰাণ কৰে।
প্ৰত্যুত্তৰত পঞ্জাৱে ২০ অভাৰত ৮টা উইকেটৰ বিনিময়ত ১৪৩ৰামহে কৰিবলৈ সক্ষম হয়।
মুম্বাইৰ হৈ বেটিঙত অ’পেন কৰিবলৈ অহা কুইন্টন ডিককে কোনো ৰাণ কৰিবলৈ সক্ষম নহ’ল। মুম্বাইয়ে দলৰ স্ক’ৰ শূণ্য থাকোতেই প্ৰথম অভাৰতে এটা উইকেট হেৰুৱায়।
ইয়াৰ পাছতে সূৰ্যকুমাৰ যাদবো শীঘ্ৰেই ৰাণ-আউট হৈ যায়। কিন্তু অধিনায়ক ৰোহিত শৰ্মাই ঈষান কিষানক লগত লৈ ইনিংছ আগবঢ়াই নিয়ে।
ঈষান কিষানে ৩২টা বল খেলি ২৮ৰাণ কৰি আউট হয়। আনহাতে, ৰোহিতে ৪৫টা বলত ৭০ৰাণৰ এটা আক্ৰমণাত্মক ইনিংছ খেলে।
ৰোহিতে তেওঁৰ ইনিংছটোত মুঠতে ৮টা চাৰি আৰু ৩টা ছয় কোবায়।
শেষলৈ হাৰ্দিক পাণ্ডিয়াৰ সৈতে পোলাৰ্ডে বিস্ফোৰক খেল খেলে। পাণ্ডিয়াই ৩টা চাৰি আৰু ২টা ছয়েৰে ১১টা বলত ৩০ ৰাণ কৰাৰ বিপৰীতে পোলাৰ্ডে ৩টা চাৰি আৰু ৪টা ছয়ৰ সহায়ত ২০টা বলত ৪৭ৰাম কৰি অপৰাজিত হৈ ৰয়।
পঞ্জাৱৰ হৈ ছামি, কটৰেল আৰু গৌতমে এটাকৈ উইকেট লাভ কৰে।
আনহাতে, পঞ্জাৱৰ হৈ নিকোলাছ পুৰানে সৰ্বোচ্চ ৪৪ৰাণ কৰে। তেওঁ ২৭টা বলৰ ইনিংছটোত ৩টা চাৰি আৰু ২টা ছয় কোবায়।
ইয়াৰ বাহিৰে পঞ্জাৱৰ হৈ লোকেশ ৰাহুলে ১৭, মায়ংক আগৰৱালে ২৫, মেক্সৱেলে ১১ আৰু গৌতমে অপৰাজিত ২২ৰাণ কৰে।
মুম্বাইৰ হৈ বুমৰাহ, পেটিনছন আৰু চাহাৰে দুটাকৈ উইকেট দখল কৰে। ব’ল্ট আৰু ক্ৰুনল পাণ্ডিয়াই এটাকৈ উইকেট লাভ কৰে।
কিৰেন পোলাৰ্ডক মেন অফ দ্য মেচৰ বঁটা দিয়া হয়।
মুম্বাইয়ে এই খেলখনৰ জয়ৰ পাছত ৪খন মেচত ৪ পইন্ট লাভ কৰি লীগ তালিকাৰ শীৰ্ষস্থানত উপনীত হয়। আনহাতে পঞ্জাৱ তালিকাৰ ৬নম্বৰ স্থানতে ৰয়।
