‘’বৰ্তমানৰ চৰকাৰখন শাসনলৈ অহাৰ পাছতেই বিগত চাৰি চাৰিটা বছৰে চৰকাৰৰ বিভিন্ন বিভাগত প্ৰায় ৮০,০০০ যুৱক-যুৱতীক সম্পুৰ্ণ মেধা আৰু যোগ্যতাৰ ভিত্তিত নিয়মীয়া তথা ঠিকাভিত্তিত নিযুক্তি প্ৰদান কৰা হৈছে।এই নিযুক্তিসমূহৰ ক্ষেত্ৰত কেতিয়াও কোনেও চৰকাৰৰ বিৰুদ্ধে অনিয়মৰ আঙুলি উঠাবলৈ সুযোগ পোৱা নাই। শেহতীয়াকৈ অসম আৰক্ষীৰ উপ-পৰিদৰ্শক নিযুক্তিৰ ক্ষেত্ৰত কোনো দুষ্ট চক্ৰই চৰকাৰখনৰ নিকা ভাবমূৰ্তিত চেকা লগাবলৈ অপচেষ্টা কৰিছিল,’’ আজি মাজুলীৰ দাৰিয়াপাৰস্থিত মাজুলী মহাবিদ্যালয় খেলপথাৰত আয়োজিত ভূমিহীন খিলঞ্জিয়া হিতাধিকাৰীলৈ ভূমিপট্টা আৰু আবণ্টন পত্ৰ বিতৰণী অনুষ্ঠানৰ পাছতেই সাংবাদিকৰে হোৱা কথা-বতৰাত মুখ্য মন্ত্ৰী সৰ্বানন্দ সোণোৱালে এইদৰে মন্তব্য কৰে।
তেওঁ কয় যে, এই অপকৰ্মত জড়িত কোনো এগৰাকী লোককেই চৰকাৰে সাৰি যাবলৈ নিদিয়ে। অসম আৰক্ষীয়ে সম্পূৰ্ণ সততা আৰু দক্ষতাৰে এই গোচৰৰ তদন্ত কৰি আছে বুলি জানিবলৈ দি এইক্ষেত্ৰত সন্দেহৰ আঙুলি উঠা আপোন-পৰ কাকো ৰেহাই দিয়া নহ’ব বুলি তেওঁ স্পষ্ট কৰি দিয়ে।
কংগ্ৰেছৰ ১৫ বছৰীয়া অপশাসনত সংঘটিত পৰ্বতসম দুৰ্নীতিৰ বাবে দলটোক কঠোৰ ভাষাৰে সমালোচনা কৰি মুখ্য মন্ত্ৰীয়ে কংগ্ৰেছক দুৰ্নীতিৰ সদাগৰ বুলি আখ্যা দিয়ে।
কংগ্ৰেছে দুৰ্নীতিৰ প্ৰতিবাদ কৰা আৰু বাঘে নিৰামিষভোজী হবলৈ চেষ্টা কৰা একেই কথা বুলি মন্তব্য কৰি তেওঁ কয় যে নিজৰ শাসনকালত কংগ্ৰেছে ৰাজ্যত দুৰ্নীতিৰ দোকান খুলি লৈছিল। প্ৰায় প্ৰতিটো বিভাগতে নিযুক্তি, ঠিকা-ঠুকলিৰ নামত দলটোৰ নেতা-পালিনেতাই অবাধ কেলেংকাৰীৰ বেহা চলাইছিল।
দুৰ্নীতিক তেওঁলোকে চৰকাৰী প্ৰশাসন যন্ত্ৰৰ এক অভিন্ন অংগ কৰি পেলাইছিল। ২০১৬ চনত বৰ্তমানৰ শাসনলৈ অহাৰ পাছৰ পৰা কংগ্ৰেছে লেতেৰা কৰি যোৱা প্ৰশাসন যন্ত্ৰটো চাফা কৰি তোলাৰ কামতেই যথেষ্ট সময় ব্যয় কৰিব লগা হৈছে বুলি উল্লেখ কৰি তেওঁ কয় যে নিজে ডিঙিলৈকে বোকাত ড়ুবি থাকি আনৰ পোছাকত বোকাৰ দাগ হঁহাৰ দৰেই এই দলটোৱে দুৰ্নীতিৰ বিৰুদ্ধে মাত মতাৰ অধিকাৰ কেতিয়াবাই হেৰুৱাই পেলাইছে।
