নেপালৰ প্ৰধানমন্ত্ৰী অলি যেন নেপালৰ প্ৰতি দায়ৱদ্ধা নহয়, চীনৰ প্ৰতিহে তেওঁ দায়ৱদ্ধ। এই কথাকে পুনৰ এবাৰ প্ৰমাণ কৰিছে নেপালৰ জাতীয়তাবাদী প্ৰধানমন্ত্ৰীৰূপে পৰিচিত কেপি শৰ্মা অলিয়ে।
স্মৰ্তব্য যে, চীনৰ প্ৰৰোচনাত ইতিমধ্যে নেপালৰ এইগৰাকী প্ৰধানমন্ত্ৰীয়ে ভাৰত বিৰোধী কাৰ্যকলাপো কৰি আহিছে বুলি বিভিন্ন সময়ত অভিযোগ উত্থাপন হৈ আহিছে।
এইবাৰ এই গৰাকী প্ৰধানমন্ত্ৰীৰ বিৰুদ্ধে অন্য এক গুৰুতৰ অভিযোগ উত্থাপন হৈছে।
সংবাদ মাধ্যমৰ খবৰ অনুসৰি নেপাল-চীন সীমান্ত অঞ্চলত পৰিদৰ্শনৰ বাবে যোৱা এটা নেপালৰ চৰকাৰী প্ৰতিনিধি দলৰ ওপৰত চীনৰ পিপলছ লিবাৰেশ্যন আৰ্মিয়ে আক্ৰমণ কৰাৰ পিছতো ইয়াৰ প্ৰতিবাদ নকৰি বৰং চীনৰ তৈলমৰ্দনতহে ব্যস্ত আছে নেপালৰ প্ৰধানমন্ত্ৰী অলি।
স্থানীয় সূত্ৰৰ খবৰ মতে বিগত কেবামাহৰ পৰাই নেপালৰ হুমলা জিলাৰ চীন সীমান্তৱৰ্তী অঞ্চলক চীনা সৈন্য দখল কৰা বুলি স্থানীয় লোকে অভিযোগ কৰি আহিছিল।
আনকি কিছু দিনৰ পূৰ্বে নেপালৰ ভূমিত চীনে ডাঙৰ ডাঙৰ আট্টালিকা নিৰ্মাণ কৰা বুলি হুমলা জিলা প্ৰশাসনে প্ৰকাশ কৰিছিল।
কিন্তু স্থানীয় লোক আৰু জিলা প্ৰশাসনৰ অভিযোগ ভুৱা বুলি দাবী কৰি প্ৰধানমন্ত্ৰী অলিয়ে নেপালৰ ভূমি চীনে দখল কৰা নাই বুলিহে দাবী কৰিছে।
চীনে নেপালৰ ভূমি দখল কৰা বুলি উঠা অভিযোগ ভিত্তিহীন আৰু ভুৱা বুলি নেপালৰ বৈদেশিক মন্ত্ৰণালয়ে প্ৰকাশ কৰা বিবৃতিত কোৱা হৈছে। চৰকাৰীভাৱে উক্ত এলেকাসমূহ পৰিদৰ্শন কৰা হৈছে আৰু তাতে চীনে কোনো ধৰণৰ আন্তঃগাথনি নিৰ্মাণ কৰাৰ প্ৰমাণ নাই। নেপালৰ বৈদেশিক মন্ত্ৰণালয়ৰ বিবৃতিত কোৱা হয়।
ইফালে শনিবাৰে চীন সীমান্তত অৱস্থিত পিলাৰসমূহ পৰিদৰ্শনৰ বাবে যোৱা এটা প্ৰতিনিধি দলৰ ওপৰত চীনা সৈন্যই আক্ৰমণ কৰা বুলি খবৰ আহিছে।
নেপালী কংগ্ৰেছৰ নেতা জীৱন বাহাদুৰ শ্বাহীৰ নেতৃত্বত যোৱা এটা দলৰ ওপৰত চীনা সৈন্যই কন্দুৱা গেছ এৰি আক্ৰমণ কৰে। এই আক্ৰমণত নামখা পৌৰসভাৰ উপাধ্যক্ষ পেনা লামা আঘাতপ্ৰাপ্ত হয়।
এই ঘটনাক কেন্দ্ৰ কৰি স্থানীয় লোকৰ মাজত তীব্ৰ উত্তেজনাৰ সৃষ্টি হয় যদিও নেপাল চৰকাৰে এই সন্দৰ্ভত কোনো ব্যৱস্থা লোৱাৰটো দূৰৰে কথা কোনো প্ৰতিক্ৰিয়াও প্ৰকাশ কৰা নাই।
ক্ষমতাৰ লাসলাত অন্ধ নেপালী জাতীয়তবাদী প্ৰধানমন্ত্ৰী অলিয়ে দীৰ্ঘদিন ধৰি চীনৰ পোষ্যপুত্ৰৰ দৰে আচৰণ কৰি অহাৰ বাবেই চীনা সৈন্যৰ এই আক্ৰমণৰ বিৰুদ্ধে কোনা প্ৰতিক্ৰিয়া প্ৰকাশ কৰা নাই বুলি অভিযোগ উত্থাপন হৈছে।
