আজি অসম গন পৰিষদ দলৰ ৩৬ সংখ্যক প্ৰতিষ্ঠা দিৱসৰ প্ৰাক ক্ষণত দলৰ সভাপতি তথা বোকাখাতৰ বিধায়ক কেবিনেট মন্ত্ৰী অতুল বৰাৰ গৃহসমষ্টিতে আৰম্ভ হৈছে দল ত্যাগৰ জোৱাৰ৷
আজি অগপ দলৰ ভাতৃ সংগঠন অসম যুৱ পৰিষদৰ বোকাখাত বিধান পৰিষদৰ কাৰ্যকৰী সভাপতি পদৰ পৰা পদত্যাগ কৰে ৰিদীপ ভূষণ নাথে৷
অগপৰ যুৱ পৰিষদ ত্যাগ কৰি ৰিদীপ ভূষণ নাথে অসম জাতীয় পৰিষদত যোগদান কৰিব বুলি জানিব পৰা গৈছে৷ অকল ৰিদীপ ভূষণ নাথেই নহয় বোকাখাত যুৱ পৰিষদৰ বহু নেতাই দলত্যাগ কৰাৰ সম্ভাৱনা আছে বুলি জানিব পৰা গৈছে৷
ইফালে আজি দিন জোৰা কাৰ্যসুচীৰে বোকাখাতৰ বৰজুৰিত থকা মাঝি ভৱনত অসম গণ পৰিষদ দলৰ বোকাখাত বিধান পৰিষদৰ উদ্যোগত দলৰ ৩৬ সংখ্যক প্ৰতিষ্ঠা দিৱস পালন কৰা হয়৷
বোকাখাত বিধান পৰিষদৰ সভাপতি জগত কলিতাৰ পৌৰহিত্যত অনুষ্ঠিত অনুষ্ঠান দলটোৰ সকলোবোৰ ভাতৃ সংগঠনৰ প্ৰতিনিধি উপস্থিত থাকে৷
অনুষ্ঠানত দলৰ প্ৰতি আগবঢ়োৱা ভালে কেইজন প্ৰবীণ বিষয়ববীয়াক সম্বৰ্ধনা জনোৱা হয়৷ অনুষ্ঠানতে দল সভাপতি অতুল বৰাই প্ৰেৰণ কৰা বক্তব্যও পাঠ কৰা হয় ৷
