এসময়ৰ মহান তথা দুৰ্দান্ত বক্সাৰ মাইক টায়ছনক পুনৰ এবাৰ দেখাৰ সৌভাগ্য ঘটিব ৰিঙত। এইবাৰ টায়ছনে ৰয় জোনছৰ বিৰুদ্ধে এখন প্ৰদৰ্শনমূলক মেচত অংশ ল’ব।
অহা মাহত হ’বলগীয়া এই মেচখনৰ বাবে কেলিফ’ৰ্ণিয়াৰ এথলেটিক আয়োগে মঞ্জুৰি প্ৰদান কৰিছে।
অৱশ্যে মহান বক্সাৰ গৰাকীয়ে এইখন প্ৰদৰ্শনীমূলক মেচ বুলি ভাবি লোৱাৰ বিপৰীতে ইয়াক গভীৰভাৱে লোৱা পৰিলক্ষিত হৈছে।
ইফালে জোনছে কয় যে মহান মাইক জোনছৰ বিৰুদ্ধে ৰিঙত নমাৰ সুযোগ পালে কোনে এইখন মেচ প্ৰদৰ্শনীমূক বুলি ভাবি ল’ব।
টায়ছনে এখন অনলাইন সংবাদমেল সম্বোধন কৰি কয়, ‘এইখন কি আচল মেচ নহয় নেকি? এইখন মাইক টায়ছন আৰু ৰয় জোনছৰ মাজৰ মেচ। মইও খেলিবলৈ আহিছো আৰু জোনছেও খেলিবলৈ আহিব’।
৫৪ বছৰীয়া টায়ছন আৰু ৫১ বছৰীয় জোনছৰ মাজৰ এই মেচখন অহা ২৮ নৱেম্বৰত লছ এঞ্জিলেছ ষ্টেপলছ চেণ্টাৰত অনুষ্ঠিত হ’ব।
মেচখন আঠটা ৰাউণ্ডত হ’ব আৰু প্ৰত্যেকটো ৰাউণ্ড দুই মিনিটৰ বাবে হ’ব।
উল্লেখ্য যে টায়ছনে ২০০৫ চনৰ জুন মাহতে শেষবাৰ আনুষ্ঠানিকভাৱে বক্সিং ৰিঙত অৱতীৰ্ণ হৈছিল। তেওঁ ১৯৯৬ চনৰ পৰা কোনো খিতাপ দখল কৰিব পৰা নাই।
ইফালে জোনছে শেষবাৰ ২০১৮ চনৰ ফেব্ৰুৱাৰি মাহত ৰিঙত অৱতীৰ্ণ হৈছিল।
উল্লেখ্য যে আয়োজকৰ ফালৰ পৰা এই মেচখন কেৱল মাত্ৰ প্ৰদৰ্শনীমূলক বুলি মন্তব্য কৰিছে যদিও দুয়োজন বক্সাৰৰ মনোভাৱত এইটো কথা স্পষ্ট হৈ পৰিছে যে মেচখন অত্যন্ত ৰোমাঞ্চকৰ আৰু আক্ৰমণাত্মক হ’ব।
