সদ্য সমাপ্ত আমেৰিকাৰ ৰাষ্ট্ৰপতি নিৰ্বাচনত ডেম’ক্ৰেট প্ৰাৰ্থী জো বিডেন দেশখনৰ নতুন ৰাষ্ট্ৰপতি নিৰ্বাচিত হৈছে। স্বাভাৱিকতে আমেৰিকাৰ ৰাষ্ট্ৰপতি এগৰাকীয়েনো কি সুবিধা লাভ কৰে চাও আহক:-
হোৱাইট হাউছ:-
আমেৰিকাৰ ৰাষ্ট্ৰপতিৰ চৰকাৰী বাসভৱন। ৫৫হাজাৰ বৰ্গফুটৰ এলেকাৰ ওপৰত নিৰ্মিত ছয় মহলীয়া এই ভৱনত ১৩২টা কোঠা, ৩৫টা শৌচালয় আৰু ২৮টা ফায়াৰপ্লেছ আছে।
ইয়াৰ উপৰি আছে ব’লিং এলে’, চিনেমা হল, জ’গিং ট্ৰেক, ছুইমিং পুল। ব্যক্তিগত সহায়কো প্ৰচুৰ আছে।
ব্লেয়াৰ হাউছ:-
ৰাষ্ট্ৰপতিৰ চৰকাৰী গেষ্ট হাউছ হোৱাইট হাউছতকৈও ডাঙৰ। ইয়াৰ আয়তন ৭০হাজাৰ বৰ্গফুট।
কেম্প ডেভিড:-
এইটো হ’ল পৰ্বতীয় আৱাস। মেৰিলেণ্ডৰ পৰ্বতত ১২৮ একৰ এলেকাৰ ওপৰত নিৰ্মিত এই ভৱনটো। ৰুজভেল্টৰ পৰা আৰম্ভ কৰি প্ৰায় সকলো ৰাষ্ট্ৰপতিয়ে ইয়াত কেতিয়াবা নহয় কেতিয়াবা আছিল।
এয়াৰ ফ’ৰ্ছ ৱান:-
আমেৰিকাৰ ৰাষ্ট্ৰপতিৰ যাতায়তৰ বাবে ব্যৱহৃত এই ব্যক্তিগত এয়াৰক্ৰাফ্টত যি ধৰণৰ ইলেকট্ৰনিক সামগ্ৰী আছে সি ইলেকট্ৰ’নিক পালছৰ পৰা সুৰক্ষিত ৰাখিবলৈ সক্ষম হ’ব। যিকোনো আক্ৰমণৰ পৰা সুৰক্ষিত ৰাখিবলৈ বিশেষভাৱে নিৰ্মাণ কৰা হৈছে এই যানখন। আকাশমাৰ্গৰ মাজতে ইন্ধন সেষ হ’লেও ইয়াত ভৰাই ল’ব পাৰি।
মেৰিন ৱান:-
চৰকাৰী চ’পাৰ ইয়াৰ দৰে চাৰিখন হেলিকপ্টাৰৰ সৈতে উৰে। ইঞ্জিন বিকল হৈ পৰিলেও এই হেলিকপ্টাৰৰ ঘন্টাত ১৫০ কিলোমিটাৰ বেগত উৰাৰ ক্ষমতা আছে। তদুপৰি, আক্ৰমণ প্ৰতিৰোধৰ সকলো ব্যৱস্থা ইয়াত মজুত আছে।
দ্য বিষ্ট :-
যিখন লিমুজিনত উঠি ৰাষ্ট্ৰপতিয়ে ভ্ৰমণ কৰে সেইখন বিশ্বৰ আটাইতকৈ সুৰক্ষিত গাড়ী হিচাপে বিবেচিত। গুলীবৰ্ষণেই নহয়, ৰাসায়নিক আক্ৰমণ প্ৰতিৰোধৰ বাবেও সক্ষম এই গাড়ীখন। পাঁচটা স্তৰৰ কাঁচ তথা পলিকাৰ্বোনেটৰৰ খিৰিকি আছে। অক্সিজেনৰ যোগান, অগ্নি নিয়ন্ত্ৰণৰ ব্যৱস্থাৰ লগতে গাড়ীখনত ব্লাড বেংকো আছে।
ছিক্ৰেট চাৰ্ভিছ:-
ৰাষ্ট্ৰপতি আৰু তেওঁৰ পৰিয়ালক ২৪ঘন্টাই সুৰক্ষা বাহিনীয়ে নিৰাপত্তা নিশ্চিত কৰে। ছিক্ৰেট ছাৰ্ভিছৰ দৰে দেশখনৰ পুৰণি চোৰাংচোৱা সংস্থাই তেওঁলোকৰ সুৰক্ষাৰ দায়িত্বত থাকে।
দৰমহা:-
ৰাষ্ট্ৰপতিৰ দৰমহা চাৰি লাখ মাৰ্কিন ডলাৰ। অৰ্থাৎ ভাৰতীয় মুদ্ৰাত প্ৰায় ২ কোটি ৯৮ লাখ ১৫হাজাৰ টকা। ইয়াৰ ওপৰত অৱশ্যে কৰ আছে। তদুপৰি, ইয়াৰ লগত কৰবিহীন বিনোদন ভাট্টা ১৯ হাজাৰ ডলাৰ, আন খৰচৰ বাবদ বছৰি ৫০হাজাৰ ডলাৰ আৰু ১লাখ ডলাৰৰ ভ্ৰমণ বানচ আছে।
অৱসৰৰ পাছতো আমেৰিকাৰ প্ৰাক্তন ৰাষ্ট্ৰপতিসকলে বছৰি দুই লাখ মাৰ্কিন ডলাৰ পেন্সন লাভ কৰে। কোনো প্ৰাক্তন ৰাষ্ট্ৰপতিৰ মৃত্যু হ’লে তেওঁৰ বিধৱা পত্নীয়ে লাভ কৰে বছৰি এক লাখ ডলাৰ ভাট্টা।
