ছাইবাৰ অপৰাধ প্ৰতিৰোধ প্ৰতি গ্ৰাহকক বিশেষভাৱে সজাগ কৰি তুলিবলৈ এইচডিএফচি বেংকে এক বিশেষ সজাগতামূলক অভিযান আৰম্ভ কৰিছে।
আজি বিত্তীয় প্ৰতিষ্ঠানটোৱে গ্ৰাহকসকলক সজাগ কৰি তুলিবলৈ “মুহবন্ধৰাখোঁ” (MoohBandRakho) নামৰ এক বিশেষ অভিযান মুকলি কৰিছে।
ভাৰত চৰকাৰৰ ছাইবাৰ ছিকিউৰিটিৰ সমন্বয়ক অৱসৰপ্ৰাপ্ত লেফটেন্ট জেনেৰেল ৰাজেশ পণ্ট, এইচডিএফচি বেংকৰ চীফ ৰিস্ক বিষয়া জিমী টাটাই আজি মুকলি কৰা এই অভিযানৰ যোগেদি প্ৰতিষ্ঠানটোৱে সমগ্ৰ দেশত ১ হাজাৰখন সজাগতামূলক কৰ্মশালাৰ আয়োজন কৰিব বুলি বিত্তীয় প্ৰতিষ্ঠানটোৱে এক বিবৃতিৰ যোগে সংবাদ মাধ্যমক জানিবলৈ দিছে।
এই সজাগতামূলক অভিযানৰ যোগে কাৰ্ডৰ তথ্য গোপনে ৰখা, চিচিভি, ম্যাদ উকলি যোৱা তাৰিখ, অটিপি, নেট বেংকিং/মোবাইল বেংকিং লগইন আইডি আৰু ফোনৰ পাছৱৰ্ড আদি গ্ৰাহকসকলক অন্য ব্যক্তিৰ সৈতে শ্বেয়াৰ নকৰিবলৈ বিত্তীয় প্ৰতিষ্ঠানটোৱে আহ্বান জনাইছে।
ইমেইল, এছএমএছ, আৰু চ’ছিয়েল মিডিয়া আদিৰে সাধাৰণ গ্ৰাহকে বেংকৰ ধন কেনেকৈ সুৰক্ষিত ৰাখিব পাৰি তাৰ বিষয়েও প্ৰতিষ্ঠানটোৱে এই অভিযানৰ যোগেদি গ্ৰাহকক সজাগ কৰি তুলিব।
আন্তঃৰাষ্ট্ৰীয় জালিয়াতি সজাগতা সপ্তাহৰ ২০২০ৰ (১৫ নৱেম্বৰ পৰা ২১ নৱেম্বৰলৈ) সমৰ্থনত প্ৰতিষ্ঠানটোৱে বিশ্বব্যাপী সম্প্ৰাসৰণ ঘটা জালিয়াতিৰ বিৰুদ্ধে এই অভিযানক এক আন্দোলনৰ ৰূপ দিয়া হৈছে বুলি প্ৰকাশ কৰিছে বেংকটোৱে|
এইচডিএফচি বেংকে আন্তঃৰাষ্ট্ৰীয় জালিয়াতি সজাগতা সপ্তাহৰ ২০২০ত ক্ৰমাগত বাবে দ্বিতীয়বাৰ অংশগ্ৰহণ কৰি “মুহবন্দৰাথোঁ” অভিযান আৰম্ভ কৰা বুলি জনাইছে।
এই সম্পৰ্কীয় অধিক তথ্য বিত্তীয় প্ৰতিষ্ঠানটোৰ ৱেবচাইটতো উপলব্ধ হ’ব।
এই অভিযান সম্পৰ্কে এইচডিএফচি বেংকৰ চীফ ৰিস্ক অফিচাৰ জিমী টাটাই কয়-“এই অভিযানটো অতি প্ৰাসংগিক, কিয়নো অধিক ব্যক্তিয়ে অনলাইনৰ দ্বাৰাই বেংকিং সেৱাৰ সুবিধা উপভোগ কৰে।”
কোনো বেংকে গ্ৰাহকৰ পৰা অ’টিপি, নেট বেংকিঙ, মোবাইল বেংকিঙৰ পাছ্ৱৰ্ড, কাষ্টমাৰ আইডি, বিভিন্ন ইএমআই পেমেন্ট ইউপিআই পিন আদি ফোন কৰি নিবিচাৰে বুলি কৈ এইবোৰ গ্ৰাহকক কোনো ব্যক্তিৰ সৈতে শ্বেয়াৰ নকৰিবলৈ আহ্বান জনাইছে বিত্তীয় প্ৰতিষ্ঠানটোৱে।
ফোন, এছএমএছ, ইমেইলৰ দ্বাৰা কোনো গোপনীয় বিৱৰণো শ্বেয়াৰ নকৰাৰ লগতে ৰাজহুৱাভাৱে সংযোজিত হোৱা বিনামূলীয়া ৱাই-ফাই ব্যৱহাৰ কৰি মোবাইল, টেবলেট, লেপটপৰ পৰা বেংকিং লেনদেন নকৰিবলৈ গ্ৰাহক সতৰ্ক কৰি দিছে বেংকটোৱে|
গ্ৰাহকে ঠিকনা, যোগাযোগ নম্বৰ বা ইমেইল আইডি সলনি কৰিলে বেংকক অৱগত কৰাতো বাধ্যতামূলক। গ্ৰাহকে যিকোনো সহায়ৰ বাবে ৬১৬০৬১৬১ নম্বৰত বা এইচডিএফচি বেঙ্কৰ ফোন বেংকিঙৰ ট’লফ্রী নম্বৰ ১৮০০২৫৮৬১৬১ত ফোন কৰিব পাৰিব৷
