এখন দেশৰ প্ৰধানমন্ত্ৰীয়ে কৰিছে এক বিশেষ ঘোষণা। দেশখনৰ প্রধানমন্ত্ৰীজনৰ ঘোষণাই সমগ্ৰ বিশ্বতে সৃষ্টি কৰিছে প্ৰৱল উৎকণ্ঠা আৰু কৌতুহলৰ।
দেশখন হ’ল এসময়ৰ ঔপনিৱেশিক সাম্ৰাজ্যৰ বেলি মাৰ নোযোৱা গ্ৰেইট ব্ৰিটেইন। আৰু প্ৰধানমন্ত্ৰী গৰাকী বৰিছ জনছন।
প্রধানমন্ত্ৰী জনছনে বুধবাৰে ঘোষণা কৰিছে যে ২০৩০ চনত দেশখনত নিষিদ্ধ কৰা হ’ব পেট্ৰ’ল আৰু ডিজেলৰ গাড়ী। অৰ্থাৎ আৰু মাত্ৰ ৯ বছৰৰ পিছতে ব্ৰিটেইনৰ ৰাজপথত নাথাকিব ইন্ধনচালিত গাড়ী।
প্ৰধানমন্ত্ৰী বৰিছ জনছনে বুধবাৰে আনুষ্ঠানিকভাৱে ঘোষণা কৰি কৈছে যে ২০৩০ চনৰ পৰা দেশখনত পেট্ৰ’ল আৰু ডিজেলচালিত গাড়ীৰ ক্ৰয়-বিক্ৰয় সম্পূৰ্ণৰূপে বন্ধ কৰা হ’ব।
পৰিৱেশ প্ৰদূষণ নিয়্ন্ত্ৰণ কৰাৰ বাবেই এই সিদ্ধান্ত লোৱা বুলি জানিব পৰা গৈছে ব্ৰিটেইনে। ব্ৰিটেইনে প্ৰদূষণ নিয়ন্ত্ৰণৰ বাবে দীৰ্ঘম্যাদী ‘গ্ৰীণ প্লেন’ নামৰ এক ১০ দফীয়া আঁচনি ঘোষণা কৰিব। আৰু এই আঁচিনৰে এক অংশ হৈছে দেশখনত ইন্ধনচালিত গাড়ী নিষিদ্ধকৰণ।
উল্লেখ্য যে বিগত বৰ্ষত প্ৰধানমন্ত্ৰীৰ দায়িত্ব গ্ৰহণ কৰাৰ পিছৰে পৰা বৰিছ জনছনে পৰিৱেশ প্ৰদূষণ নিয়ন্ত্ৰণৰ ক্ষেত্ৰত সক্ৰিয় ভূমিকা পালন কৰা দেখা গৈছে।
ইয়াৰ পিছতে ব্ৰিটিছ চৰকাৰে ২০৪০ চনত দেশত পেট্ৰ’ল আৰু ডিজেলচালিত গাড়ী নিষিদ্ধ কৰাৰ পদক্ষেপ লোৱাৰ কথা আছিল। কিন্তু ব্ৰিটিছ প্ৰধানমন্ত্ৰীয়ে এই সময়সীমা আৰু দহটা বছৰ আগুৱাই আনি পৰিৱেশ প্ৰদূষণৰ ক্ষেত্ৰত অন্য এক নিৰ্দশন দাঙি ধৰাৰ প্ৰয়াস কৰিছে।
এই ঘোষণা কৰি ব্ৰিটিছ প্ৰধানমন্ত্ৰী গৰাকীয়ে ইয়াক সময়ৰ দাবী বুলিও দাবী কৰিছে।
প্ৰধানমন্ত্ৰী গৰাকীয়ে কৈছে যে ইন্ধনচালিত গাড়ীৰ বিকল্প হিচাপে পৰমাণু, সৌৰ আৰু বায়ুশক্তিৰে চালিত গাড়ী ব্যৱহাৰ কৰা হ’ব।
ইয়াৰ বাবে ১২০০ কোটি ইউৰো(ভাৰতীয় হিচাপত ১ লাখ ৫ হাজাৰ কোটি টকা)ৰ এক পৰিকল্পনা গ্ৰহণ কৰিছে ব্ৰিটিছ চৰকাৰে। আনকি ইয়াৰ ফলত দেশখনত আঢ়ৈ লাখ লোকে নতুন কৰ্মসংস্থাপন লাভ কৰিব বুলিও দাবী কৰিছে ব্ৰিটেইনৰ শাসকীয় কনজাৰ্ভেটিভ পাৰ্টিয়ে।
আনহাতে ব্ৰিটেইনৰ অন্যটো ৰাজনৈতিক দল লেবাৰ পাৰ্টিয়ে ব্ৰিটিছ চৰকাৰৰ এই সিদ্ধান্তক সমালোচনা কৰা দেখা গৈছে। দলটোৰ মতে ব্ৰিটেইনৰ ৭৪ শতাংশ বাহনেই ইন্ধনচালিত। ক’ৰ’ণাই দেশখনৰ অৰ্থনীতিত মোক্ষম আঘাত সানিছে।
এই পৰিস্থিতিত প্ৰধানমন্ত্ৰী জনছনৰ এই ঘোষণাই দেশখনৰ অ’টোমোবাইল উদ্যোগক আঘাত কৰিব বুলি দাবী কৰিছে লেবাৰ পাৰ্টিৰ নেতৃত্বই।
সমীক্ষাৰ মতে ব্ৰিটেইনত বেটাৰীচালিত বাহনৰ পৰিমাণ ৬ শতাংশ। গেছ(চিএনজি)চালিত বাহনৰ সংখ্যাও ক্ৰমশঃ বৃদ্ধি পাইছে ব্ৰিটেইনত।
