ৰাজ্যত সাংবাদিকৰ সুৰক্ষা নিশ্চিত কৰাৰ বাবে আজি এডিটৰ গীল্ড অফ ইণ্ডিয়াই আজি মুখ্য মন্ত্ৰী সৰ্বানন্দ সোণোৱাললৈ এখন পত্ৰ প্ৰেৰণ কৰে।
অসমত সাংবাদিকৰ ওপৰত ক্ৰমাগতভাৱে সংঘটিত হৈ অহা হিংসাত্মক আক্ৰমণৰ ঘটনাৰ বৃদ্ধি পোৱাত ইডিটৰ গীল্ড অফ ইণ্ডিয়াই গভীৰ উদ্বেগ প্ৰকাশ কৰে।
দলবদ্ধ আক্ৰমণ, ভাবুকি আদি ঘটনাই অসমত মুক্ত সাংবাদিকতাৰ পৰিবেশ বিনষ্ট কৰিছে বুলিও এডিটৰ গীল্ড অফ ইণ্ডিয়াই পত্ৰখনত উল্লেখ কৰে।
”অসমত সাংবাদিকৰ ওপৰত সংঘটিত আক্ৰমণৰ ঘটনাক আপুনি গৰিহণা দিয়া কাৰ্য্যক আমি প্ৰশংসা কৰিছো। সুস্থ সাংবাদিকতাৰ পৰিবেশ বৰ্তাই ৰখাৰ বাবে এইক্ষেত্ৰত আপুনি শীঘ্ৰে পদক্ষেপ গ্ৰহণ কৰাটো বিচাৰিছো যাতে সংবাদকৰ্মীক আক্ৰমণ কৰা দুস্কৃতিকাৰীসকলে নিজকে আইনৰ উৰ্দ্ধত বুলি ভাবিব নোৱাৰে,” পত্ৰখনত এডিটৰ গীল্ড অফ ইণ্ডিয়াই এইদৰে লিখে।
অসমীয়া প্ৰতিদিন আৰু দৈনিক অসমৰ সাংবাদিক মিলন মহন্তক দুস্কৃতিকাৰীয়ে বান্ধি প্ৰহাৰ কৰা ঘটনাই অসমত সাংবাদিক সকলে কি ভয়াবহ পৰিবেশৰ মাজত নিজৰ দায়িত্ব সম্পাদন কৰিবলীয়া হৈছে সেয়া প্ৰতিফলিত কৰিছে বুলিও পত্ৰখনত উল্লেখ কৰা হয়।
আনহাতে, সাংবাদিক পৰাগ ভূঞাৰ ৰহস্যজনক মৃত্যু সন্দৰ্ভতো এডিটৰ গীল্ডে গভীৰ উদ্বেগ ব্যক্ত কৰি শীঘ্ৰে এই পৰিবেশৰ অন্ত পেলাই সাংবাদিকতাৰ সুস্থ পৰিবেশ ঘুৰাই অনাৰ বাবে মুখ্য মন্ত্ৰী সৰ্বানন্দ সোণোৱালক পদক্ষেপ গ্ৰহণ কৰাৰ বাবে আহ্বান জনায়।