লোকসভাত বিৰোধী দলৰ নেতা ৰাহুল গান্ধীয়ে ৰাষ্ট্ৰপতিৰ কক্ষৰ পৰা ওলাই আহি পোনে পোনে উচ্চতম ন্যায়ালয়ৰ মুখ্য ন্যায়াধীশৰ কাষ চাপিব বুলি হুংকাৰ দিছে। ‘ইণ্ডিয়া’ মিত্ৰজোঁটৰ প্ৰতিনিধিয়ে শুকুৰবাৰে ৰাষ্ট্ৰপতি দ্ৰৌপদী মুৰ্মুক সাক্ষাৎ কৰি মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগ, ভোটাৰ তালিকাৰ পৰা বাদ পৰা ১৩ কোটি লোকৰ নাম পুনৰ অন্তৰ্ভুক্তি আৰু বিতৰ্কিত ‘SIR’ প্ৰক্ৰিয়া বাতিল কৰাৰ দাবী জনাইছে। ইয়াৰ পাছতে আৰক্ষীৰ নিৰ্যাতন আৰু গণতন্ত্ৰ হৰণৰ অভিযোগ উত্থাপন কৰি সোমবাৰে পোনপটীয়াকৈ দেশৰ মুখ্য ন্যায়াধীশক স্মাৰক পত্ৰ দাখিল কৰিব বুলি ঘোষণা কৰে কংগ্ৰেছ নেতাগৰাকীয়ে।
বিৰোধী মিত্ৰজোঁটৰ প্ৰতিনিধিসকলক ক’ত ক’ত ভোট চুৰি হৈছিল তাৰ প্ৰমাণ দিবলৈ কয় ৰাষ্ট্ৰপতিগৰাকীয়ে। সাংবাদিকসকলৰ সন্মুখত বিৰোধী নেতাসকলে সেই তথ্য সংগ্ৰহ কৰি ৰাষ্ট্ৰপতিৰ ওচৰত দাখিল কৰিব বুলি কয়। তদুপৰি, ইভিএম বাতিল কৰি নিৰ্বাচন পুনৰ বেলট পেপাৰলৈ অনাৰ দাবীও উত্থাপন কৰে। প্ৰধানমন্ত্ৰী, গৃহমন্ত্ৰী আৰু মুখ্য নিৰ্বাচন আয়ুক্তই মিলি দেশৰ গণতন্ত্ৰক হত্যা কৰিলে বুলিও বিৰোধী নেতাসকলে কয়। ৰাহুল গান্ধীৰ দাবী যে ৰাষ্ট্ৰপতিয়ে তেওঁৰ ভোট চুৰিৰ দাবীৰ বিৰোধিতা কৰা নাছিল।
শুকুৰবাৰে ইণ্ডিয়া মিত্ৰজোঁটৰ প্ৰায় সকলো সাংসদ আৰু শীৰ্ষ নেতাই সংসদ ভৱনৰ পৰা ৰাষ্ট্ৰপতি ভৱনলৈ প্ৰতিবাদী সমদল উলিয়ায়। ১৬টা ৰাজনৈতিক দলৰ ১৬ গৰাকী নেতাৰ স্বাক্ষৰিত তিনি দফীয়া স্মাৰক পত্ৰ লৈ প্ৰতিনিধি দলটোৰ ১০ জন সদস্যই ৰাষ্ট্ৰপতি ভৱনলৈ যায়। ইয়াৰ ভিতৰত মমতা বেনাৰ্জী, ৰাহুল গান্ধী, মল্লিকাৰ্জুন খৰ্গে, এম এ বেবী, সুপ্ৰিয়া চুলে আদি নেতাসকল আছিল।
বৈঠকৰ অন্তত সাংবাদিকৰ মুখামুখি হৈ ৰাহুল গান্ধীয়ে ক্ষোভ প্ৰকাশ কৰে। তেওঁ স্পষ্টকৈ কয় যে দেশৰ সকলো বিৰোধী সাংসদে যেতিয়া মুখ্য নিৰ্বাচন আয়ুক্তক সাক্ষাৎ কৰিবলৈ গৈছিল তেতিয়া তেওঁলোকৰ ওপৰত আৰক্ষী বাহিনী ব্যৱহাৰ কৰা হৈছিল। ৰাহুলে অভিযোগ কৰে যে, “আমাক আটক কৰি মাৰধৰ কৰি, ঠেলিহেচি থানালৈ লৈ যোৱা হৈছিল। প্ৰথমে আমাক কোৱা হৈছিল যে আমি ইয়াত প্ৰতিবাদ কৰিব নোৱাৰো। তাৰ পিছত যেতিয়া আমি যন্তৰ মন্তৰলৈ গৈছিলো, যিটো ৰাজহুৱা প্ৰতিবাদ বা জনসভাৰ স্থান, তেতিয়াও আমাক তাত বাধা দিয়া হৈছিল।”
ইয়াৰ পিছত পৰৱৰ্তী আইনী যুঁজৰ ৰূপৰেখা স্পষ্ট কৰি ৰাহুল গান্ধীয়ে কয়, ”আমি আজি ৰাষ্ট্ৰপতিৰ ওচৰলৈ আহিলোঁ। আৰু অহা সোমবাৰে ইণ্ডিয়া মিত্ৰজোঁটৰ এই সমগ্ৰ দলটোৱে উচ্চতম ন্যায়ালয়ৰ মুখ্য ন্যায়াধীশৰ ওচৰলৈ গৈ এই সমগ্ৰ বিষয়টোৰ ওপৰত মুখ্য ন্যায়াধীশক স্মাৰক পত্ৰ দাখিল কৰিব।”
ইফালে ৰাষ্ট্ৰপতিৰ সৈতে বৈঠক চলি থকাৰ সময়তে প্ৰিয়ংকা গান্ধী, অভিষেক বেনাৰ্জী, মহুৱা মৈত্ৰ, ডি কে শিৱকুমাৰকে ধৰি মিত্ৰজোঁটৰ অন্যান্য সাংসদসকলে বাহিৰত কৰ্তব্য পথত বহি তীব্ৰ প্ৰতিবাদ সাব্যস্ত কৰে। তেওঁলোকে হাতত লৈ থকা পোষ্টাৰত লিখা আছিল, ‘জ্ঞানেশ, ইটছ ডান ব্ৰ’! ডি কে শিৱকুমাৰকে ধৰি কেইবাজনো নেতাই সংবাদ মাধ্যমত হুংকাৰ দিছে যে নিৰ্বাচন আয়ুক্তই পদত্যাগ কৰাই নহয়, বৰঞ্চ জনসাধাৰণৰ ভোট আৰু অধিকাৰ সুৰক্ষিত নোহোৱালৈকে তেওঁলোকৰ যুঁজ বন্ধ নহ’ব।
ইয়াৰ পূৰ্বে সংসদৰ চেন্ট্ৰেল হলত অনুষ্ঠিত এখন বৈঠকত ৰাহুল গান্ধীয়ে দাবী কৰিছিল যে বিৰোধীৰ ধাৰাবাহিক আন্দোলনত শাসক শিবিৰ আতংকিত হৈ পৰিছে। বিভিন্ন ৰাজ্যত অনৈতিকভাৱে ক্ষমতা দখল কৰাৰ বিষয়টো উত্থাপন কৰি বৰ্তমানৰ চৰকাৰখনৰ পতনৰ প্ৰয়োজনীয়তাৰ বিষয়েও তেওঁ কয়।
মুঠৰ ওপৰত ৰাষ্ট্ৰপতিৰ সৈতে হোৱা বৈঠকৰ পিছত উচ্চতম ন্যায়ালয়ৰ মুখ্য ন্যায়াধীশৰ ওচৰলৈ যোৱাৰ ঘোষণাৰ লগে লগে জাতীয় ৰাজনীতিত সংঘাতৰ ছবিখন এতিয়া চৰম সীমাত উপনীত হৈছে।
