নগাঁও চহৰকে ধৰি ইয়াৰ পাৰ্শ্বৱৰ্তী অঞ্চলত আজি কেইবাদিনো ধৰি সংঘটিত হৈ আছে চুৰি ডকাইতিৰ ঘটনা। আৰক্ষী প্ৰশাসনৰ দুৰ্বলতাৰ সুযোগ গ্ৰহণ কৰি চোৰৰ দলে নিৰ্বিঘ্নে চলাই গৈছে ইটো পাছত সিটোকৈ চুৰিৰ ঘটনা।
যোৱা নিশাও নগাঁও চহৰৰ সমীপৰ নাৰমাৰীত এটা দুৰ্বৃত্তৰ দলে ডকাইতি কাৰ্য সংঘটিত কৰে। সেনাৰ পোছাকত অহা প্ৰায় ৭/৮ জনীয়া দলে হাতে হাতে পিষ্টল লৈ নাৰমাৰী গাঁৱৰ নজৰুল ইছলাম আৰু আল্লাউদ্দিনৰ ঘৰত লুটপাত চলায়।
নিজকে সেনা বাহিনীৰ লোক বুলি পৰিচয় দি লোক দুজনৰ ঘৰৰ পৰা নগদ ধন আ-অলংকাৰসহ প্ৰায় ৭ লাখ টকাৰ সম্পত্তি লুটপাত কৰি লৈ যায়।
এই ঘটনাক কেন্দ্ৰ কৰি অঞ্চলটোত তীব্ৰ প্ৰতিক্ৰিয়াৰ সৃষ্টি হৈছে। ইতিমধ্যে হয়বৰগাঁও আৰক্ষী চকীৰ আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে।
হয়বৰগাঁও আৰক্ষী চকীৰ সূত্ৰই জনোৱা মতে, এই ঘটনাৰ লগত জড়িত এজন লোকক আটক কৰা হৈছে। এই ডকাইতৰ দলটোৱে বটদ্ৰৱা অঞ্চলতো ডকাইতি কাণ্ড সংঘটিত কৰিছিল।
আনহাতে, নগাঁও জিলাৰ ৰূপহীহাট আৰক্ষী থানাৰ অন্তৰ্গত কঢ়ালী গাঁৱত যোৱা নিশা চুৰি কাণ্ডৰ ঘটনা সংঘটিত হয়।
জানিব পৰা মতে, কঢ়ালী গাঁৱৰ বাসিন্দা ভদ্ৰকান্ত শইকীয়াৰ ঘৰত নিশা কোনো নথকাৰ সুযোগ গ্ৰহণ কৰি চোৰে চলালে লুটপাত।
চোৰে গৃহস্থৰ দৰ্জাৰ তলা ভাঙি কৌশলেৰে কেইবাটাও গডৰেজৰ পৰা প্ৰায় ১০ লক্ষাধিক টকাৰ সোণৰ আ-অলংকাৰ আৰু নগদ ধন চুৰি কৰি নিয়ে।
ঘটনা সন্দৰ্ভত পৰিয়ালৰ লোকে স্থানীয় আৰক্ষী থানাত এজাহাৰ দাখিল কৰিছে।
উল্লেখ্য যে যোৱা নিশা অঞ্চলটোত হোৱা ৰাস চাবলৈ পৰিয়ালটো গৈছিল। আৰক্ষীয়ে ঘটনা সন্দৰ্ভত তদন্ত চলাইছে যদিও কোনো অপৰাধীক আটক কৰিবলৈ সক্ষম হোৱা নাই।
