বিভিন্ন চৰ্চা চলি থকাৰ মাজতে দেওবাৰে নেপালৰ সংসদ ভংগ কৰি দিয়া হৈছে। ৰাষ্ট্ৰপতি বিদ্যাদেবী ভাণ্ডাৰীয়ে দুটা পৰ্যায়ত ৰাষ্ট্ৰীয় নিৰ্বাচনৰ দিন ঘোষণা কৰিছে।
ইয়াকে লৈ দেশৰ মুখ্য নিৰ্বাচনী আয়ুক্তৰ তথা আন নিৰ্বাচনী বিষয়াসকলৰ সৈতে প্ৰধান মন্ত্ৰী কে পি শৰ্মা অ’লিয়ে বৈঠক অনুষ্ঠিত কৰে।
শাসকীয় দল নেপালৰ কমিউনিষ্ট পাৰ্টিৰ ভিতৰত সৃষ্টি হোৱা চাপৰ মাজতে দেওবাৰে প্ৰধানমন্ত্ৰী অ’লিয়ে সংসদ ভংগৰ প্ৰস্তাৱ দিয়ে।
মন্ত্ৰীসভাৰ জৰুৰী বৈঠকত সেই প্ৰস্তাৱ গৃহীত হোৱাৰ পাছত ৰাষ্ট্ৰপতিৰ ওচৰলৈ প্ৰেৰণ কৰা হয়। ৰাষ্ট্ৰপতি বিদ্যাদেবীয়ে লগে লগেই এই প্ৰস্তাৱত অনুমোদন দিয়ে।
মন্ত্ৰীমণ্ডলৰ প্ৰস্তাৱ অনুসৰি ৰাষ্ট্ৰীয় নিৰ্বাচনৰ দিনো ঘোষণা কৰা হৈছে। সেই অনুসৰি, নতুন বছৰৰ ৩০ এপ্ৰিল আৰু ১০মে’ত ভোটগ্ৰহণ অনুষ্ঠিত কৰা হ’ব।
বাতৰি অনুসৰি, প্ৰধানমন্ত্ৰী অ’লিয়ে দেশৰ নিৰাপত্তা বিষয়ৰ মুৰব্বীৰ সৈতেও আলোচনাত বহে। ইয়াৰ মাজতে অ’লি মন্ত্ৰীসভাৰ পাঁচগৰাকী সদস্যই পদত্যাগো কৰে।
উল্লেখ্য যে যোৱা মঙলবাৰে এখন অধ্যাদেশ জাৰি কৰি কোনো গুৰুত্বপূৰ্ণ নিযুক্তিৰ ক্ষেত্ৰত সম্পূৰ্ণ অধিকাৰ নিজৰ হাতলৈ নিছিল প্ৰধানমন্ত্ৰী অ’লিয়ে। কিন্তু পৰৱৰ্তী দিনটোতে শাসকীয় দলৰ ষ্টেণ্ডি কমিটিয়ে এটা প্ৰস্তাৱ গৃহীত কৰি অ’লিক সেই অধ্যাদেশ প্ৰত্যাহাৰ কৰাৰ নিৰ্দেশ দিছিল।
ইয়াৰ পাছতে অ’লিয়ে বিভিন্ন নেতাৰ সৈতে আলোচনা কৰি পৰিস্থিতি চম্ভালাৰ চেষ্টা কৰিছিল যদিও সংকটৰ চাপ ক্ৰমে গভীৰ হৈ পৰা দেখা গৈছিল।
ৰাষ্ট্ৰপতি বিদ্যাদেবীয়ে প্ৰধানমন্ত্ৰী অ’লিক শনিবাৰে সন্ধিয়া ৰাষ্ট্ৰপতিৰ চৰকাৰী বাসভৱনত সাক্ষাতৰ সময়ত সংসদ ভংগ নকৰাৰ পৰামৰ্শ দিছিল যদিও অ’লিয়ে সিদ্ধান্ত সলনি নকৰিলে।
