প্ৰধানমন্ত্ৰী নৰেন্দ্ৰ মোদীয়ে ভিডিঅ’ কনফাৰেন্সৰ জৰিয়তে সমগ্ৰ দেশতে কোভিচৰ প্ৰথম পৰ্যায়ৰ ভেকচিন প্ৰদানৰ কাৰ্যসূচীৰ শুভাৰম্ভনি ঘটোৱাৰ লগে লগে দেশৰ ৩০০৬ টা কেন্দ্ৰত আৰম্ভ হ’ব ভেকচিন প্ৰদানৰ কাম।
প্ৰাথমিক ভাবে একোটা কেন্দ্ৰত সৰ্বাধিক ১০০ জন লোকক ভেকচিন প্ৰদান কৰা হ’ব।
ইপিনে ভেকচিন প্ৰদানৰ প্ৰাকমুহূৰ্তত আজি স্বাস্থ্য দপ্তৰে ভেকচিন গ্ৰহণৰ ক্ষেত্ৰত কেতবোৰ সতৰ্কতামূলক ব্যৱস্থাৰ কথা ঘোষণা কৰিছে।
সেই মৰ্মে যিসকল লোক এলাৰ্জীৰ প্ৰতি অত্যধিক স্পৰ্শকাতৰ তেনে লোকক পৰাপক্ষত ভেকচিন গ্ৰহণ নকৰিবলৈ স্বাস্থ্য দপ্তৰে পৰামৰ্শ দিছে।
একেদৰে গৰ্ভৱতী মহিলা আৰু শিশুক দু্গ্ধ পান কৰোৱা মহিলাই ভেকচিন গ্ৰহণ নকৰাটো উচিৎ হ’ব বুলি স্বাস্থ্য দপ্তৰে প্ৰকাশ কৰিছে।
ভেকচিনে গৰ্ভৱতী মহিলাৰ ক্ষেত্ৰত কিবা প্ৰভাৱ পেলায় নেকি সেই বিষয়ত এতিয়াও গৱেষণা চলি আছে।
চৰকাৰে প্ৰকাশ কৰা মতে প্ৰথমাৱস্থাত চিকিৎসা কৰ্মী আৰু সন্মখৰ পৰা কোভিডৰ সৈতে যুঁজ দি থকা প্ৰায় ৩ কোটি লোকক ভেকচিন প্ৰদান কৰা হ’ব।
উল্লেখ্য অলপতে অক্সফ’ৰ্ডৰ আষ্ট্ৰাজেনেকাৰ কোভিডশ্বীল্ড আৰু ভাৰত বায়’টেকৰ কোভাক্সিন নামৰ কোভিড ভেকচিন দুটা ভাৰতত জৰুৰী টীকাকৰণৰ চূড়ান্ত অনুমতি লাভ কৰিছিল।
ইফালে কোভিডশ্বীল্ড ভেকচিন প্ৰস্তুতকৰ্তা ভাৰতীয় প্ৰতিষ্ঠান ছেৰাম ইনষ্টিটিউট অৱ ইণ্ডিয়া আৰু কোভিক্সিন ভেকচিন প্ৰস্তুতকাৰী আন এটা ভাৰতীয় প্ৰতিষ্ঠান ভাৰত বায়’টেকে এক যুটীয়া বিবৃতি প্ৰকাশ কৰিছে।
বিবৃতিটোত কোৱা হৈছে যে প্ৰতিষ্ঠান দুটাই ভাৰতত একেলগে ভেকচিন বিতৰণ কৰিব।
ভাৰতীয় প্ৰতিষ্ঠান দুটাই সমগ্ৰ বিশ্বতে কোভিড ভেকচিন বিতৰণ কৰিব বুলিও বিবৃতিত প্ৰকাশ কৰিছে।
তেওঁ লগতে জনায় যে সমগ্ৰ দেশত ভেকচিনসমূহ সংৰক্ষিত কৰি ৰাখিবলৈ ২৯ হাজাৰ ক’ল্ড ষ্ট’ৰ সাজু কৰি ৰখা হৈছে।
ইপিনে ভেকচিন লোৱা সকলকো সামাজিত দূৰত্ব বজাই ৰখা, মাস্ক পৰিধান কৰা আদি নিয়ম বোৰ মানি চলিবলৈ আহ্বান জনাইছে প্ৰধানমন্ত্ৰী মোদীয়ে।
