কেন্দ্ৰীয় চৰকাৰে অনা তিনিখন কৃষি আইন বাতিল কৰাৰ দাবীত কৃষক বিক্ষোভে গোটেই দেশ উত্তাল হৈ পৰাৰ সময়তে কৃষকৰ সমৰ্থন এইবাৰ আগবাঢ়ি আহিছে আন্না হাজাৰে।
গণতন্ত্ৰ দিৱসত কৃষকৰ ট্ৰেক্টৰ ৰেলীকলৈ ৰাজধানী দিল্লী ৰণক্ষেত্ৰলৈ পৰিণত হৈছিল। কৃষি আইন বাতিলৰ দাবীৰে কৃষকসকলে বিগত কেইবামাহো ধৰি বিক্ষোভ চলাই আহিছে।
অনশনৰ বাবেই আন্না হাজাৰে দেশৰ জনসাধাৰণৰ বাবে অধিক পৰিচিত। তেওঁৰ সুদীৰ্ঘ অনশনৰ বাবেই সংসদত লোকপাল বিধেয়ক গৃহীত হৈছিল।
এইবাৰ আন্না হাজাৰে কৃষকসকলৰ বাবে পুনৰ অনশনত বহিব। কাইলৈ অৰ্থাৎ ৩০ জানুৱাৰি শনিবাৰৰ পৰা দেশৰ সামাজিক আন্দোলনৰ ৮৪বৰ্ষীয় কৰ্মীগৰাকীয়ে অনশনত বহাৰ কথা ঘোষণা কৰিছে।
এইটোৱে তেওঁৰ জীৱনৰ অন্তিম অনশন হ’ব বুলিও নেতাগৰাকীয়ে জনাইছে। আন্নাই তেওঁৰ সমৰ্থকসকলক এই আন্দোলনত যোগ দিয়াৰ বাবেও আহ্বান জনাইছে।
আন্নাই স্পষ্ট কৰি কৈছে যে নতুন কৃষি আইন কোনো গণতান্ত্ৰিক নিয়ম মানি হোৱা নাই আৰু দেশত কোনো নতুন আইন প্ৰণয়নত জনসাধাৰণৰ অংশগ্ৰহণ জৰুৰী।
কেন্দ্ৰীয় চৰকাৰে কৃষকসকলৰ বিষয়ে কোনো সঠিক সিদ্ধান্ত লোৱা নাই বুলিও অভিযোগ কৰিছে আন্না হাজাৰেই। কৃষকসকলৰ প্ৰতি চৰকাৰ সংবেদনশীল নহয় বুলিও ব্যক্ত কৰে ৮৪ বছৰীয়া নেতাগৰাকীয়ে।
আন্নাই লগতে কয় যে কৃষকসকলৰ বিষয়টো লৈ তেওঁ পাঁচবাৰকৈ কেন্দ্ৰৰ সৈতে আলোচনাত বহাৰ আবেদন জনাইছিল যদিও কোনো উত্তৰ নাপালে। সেয়েহে, জীৱনৰ অন্তিম অনশনটোত বহিবলৈ সাজু হৈছে আন্না।