বিজেপিক পৰাভূত কৰিবলৈ অখিল, লুৰীণক কংগ্ৰেছৰ নেতৃত্বত মহাজোঁট গঠনৰ আহ্বান সাংসদ গৌৰৱ গগৈৰ

একালৰ কংগ্ৰেছৰ দূৰ্গস্বৰূপ গোলাঘাটত কংগ্ৰেছৰ প্ৰৱল গৰাখহনীয়াৰ পাছতে আজি কংগ্ৰেছ ভৱনত অনুষ্ঠিত হয় গোলাঘাট জিলা কংগ্ৰেছৰ বৰ্ধিত কাৰ্যনিৰ্বাহক সভা।

উক্ত সভাত সাংসদ গৌৰৱ গগৈয়ে আগন্তুক নিৰ্বাচনত অসমত কংগ্ৰেছৰ মহাজোঁট চৰকাৰ গঠন হ’ব বুলি দাবী কৰে।

সভাৰ অন্তত সাংবাদিকে সোধা প্ৰশ্নৰ উত্তৰত লোকসভাৰ কংগ্ৰেছ সাংসদগৰাকীয়ে প্ৰাক্তন কংগ্ৰেছ নেত্ৰী তথা বৰ্তমানৰ নতুন বিজেপি অজন্তা নেওগলৈ এই সময়ত পুতৌ ওপজা বুলিও মন্তব্য কৰে।

প্ৰাক্তন কংগ্ৰেছী মন্ত্ৰী অজন্তা নেওগে কংগ্ৰেছত থাকোতে প্ৰয়াত মুখ্যমন্ত্ৰী তৰুণ গগৈৰ পৰা লাভ কৰা মৰম-আদাৰ-সন্মান বিজেপিত গৈ মুখ্যমন্ত্ৰী সৰ্বানন্দ সোণোৱাল আৰু মন্ত্ৰী হিমন্ত বিশ্ব শৰ্মাৰ পৰাও লাভ কৰিব বুলি আশা প্ৰকাশ কৰে সাংসদগৰাকীয়ে।

ইফালে বিজেপিক পৰাভূত কৰিবলৈ কংগ্ৰেছৰ সৈতে মহাজোঁটত লুৰীণজ্যোতি গগৈ আৰু অখিল গগৈকো চামিল হ’বলৈ আহ্বান জনায় সাংসদ গৌৰৱ গগৈয়ে।

‘কংগ্ৰেছৰ বাবে এক অসম এক ভাৰত’ শ্লোগান আওৰাই সাংসদগৰাকীয়ে দৃঢ়তাৰে মন্তব্য কৰে যে বৰ অসমৰ সপোন দেখা কংগ্ৰেছে বৰাক-ব্ৰক্ষ্মপুত্ৰ, উজনি-নামনি এনে বিভাজনকেন্দ্ৰিক মনোভাৱক কেতিয়াও প্ৰশ্ৰয় নিদিয়ে আৰু হিন্দু -মুছলিম, বড়ো-অবড়ো এনে ভাৱ বা চিন্তা কংগ্ৰেছে নকৰে।

উল্লেখ্য যে শনিবাৰে গোলঘাট কংগ্ৰেছৰ বৰ্ধিত কাৰ্যনিবাহক সভাত সাংসদ গৌৰৱ গগৈৰ লগত প্ৰাক্তন মন্ত্ৰী বিস্মিতা গগৈ, সৰুপথাৰ সমষ্টিৰ বিধায়িকা ৰ’জলীনা তিৰ্কী, প্ৰাক্তন বিধায়ক অৰুণ ফুকন, গোলাঘাট জিলা কংগ্ৰেছৰ নৱনিযুক্ত সভাপতি দাদু টায়েসহ প্ৰদেশ কংগ্ৰেছ আৰু যুৱ কংগ্ৰেছৰ কেইবাজনো বিষয়-ববীয়া উপস্থিত থাকে।