যোৱা ২২ জানুৱাৰীত প্ৰধানমন্ত্ৰী নৰেন্দ্ৰ মোডী অসম আগমণৰ বিৰোধ কৰি সদৌ অসম ছাত্ৰ সন্থাৰ আহ্বানমৰ্মে ৰাজ্যজুৰি ৰূপায়ণ কৰিছিল জোৰ সমদল কাৰ্যসূচী।
নাগৰিকত্ব সংশোধনী আইনৰ বিৰুদ্ধে গ্ৰহণ কৰা এই গণতান্ত্ৰিক আন্দোলনক প্ৰতিহত কৰিবলৈ ৰাজ্যৰ গৃহ বিভাগে ছাত্ৰকৰ্মীসকলক বাধা প্ৰদান কৰাৰ লগতে তেজপুৰ আৰু শুৱালকুছিত ছাত্ৰকৰ্মীসকলৰ ওপৰত বৰ্বৰভাৱে লাঠীচালনা পৰ্যন্ত কৰা পৰিলক্ষিত হৈছিল।
অসম চৰকাৰৰ নিৰ্দেশমৰ্মে আৰক্ষীৰ এনে কাৰ্যৰ তীব্ৰ বিৰোধ কৰি সোমবাৰে গোলাঘাট আঞ্চলিক ছাত্ৰ সন্থাই এক প্ৰতিবাদী কাৰ্যসূচী ৰূপায়ণ কৰে।
প্ৰায় শতাধিক ছাত্ৰকৰ্মীৰ উপস্থিতিত চহৰখনৰ বেজবৰুৱাৰ চাৰিআলিত ৰূপায়ণ কৰা এই প্ৰতিবাদস্থলীত অসম চৰকাৰ গ’বেক, সৰ্বানন্দ সোণোৱাল মূৰ্দাবাদ আদি চৰকাৰ বিৰোধী শ্ল’গানেৰে পৰিৱেশ উত্তাল কৰি তোলে।
ইয়াৰ সমান্তৰালভাৱে মুখ্যমন্ত্ৰী সৰ্বানন্দ সোণোৱালৰ পুত্তলিকাও দাহ কৰে প্ৰতিবাদকাৰীসকলে।
গোলাঘাট আঞ্চলিকৰ সভাপতি বিশ্বজিৎ গগৈয়ে গণতান্ত্ৰিকভাৱে কৰা এনে আন্দোলনক বাধা প্ৰদান নকৰিবলৈ সকিয়নী প্ৰদান কৰে। অন্যথা আগন্তুক দিনত অধিক গণতান্ত্ৰিক আন্দোলন গঢ়ি তোলাৰ হুংকাৰ দিয়ে।
