কংগ্ৰেছৰ দিনত সংখ্যালঘু মুছলমানসকলৰ বুকুৰ কুটুম আছিল এতিয়াৰ বিজেপিৰ দক্ষ-প্ৰতাপী মন্ত্ৰী ড০ হিমন্ত বিশ্ব শৰ্মা।
কিয়নো কংগ্ৰেছৰ শাসনকালত শিক্ষা মন্ত্ৰীকে ধৰি বহুকেইটা দপ্তৰৰ মন্ত্ৰী হৈ থকা মন্ত্ৰীগৰাকীৰো বৰ আপোন আছিল ‘মিঞা-মুছলমান’সকল।
কিয়নো অতীতৰে পৰা চলি অহা এক চৰ্চা মতে কংগ্ৰেছসকল সংখ্যালঘুৰ একপ্ৰকাৰ ত্ৰাণকৰ্তা।
যি পাত্ৰত থোৱা যায় সেই পাত্ৰৰে ৰং লোৱা ড০ হিমন্ত বিশ্ব শৰ্মাৰো সেই সময়ত ‘মিঞা-মুছলমান’সকল অতিকৈ প্ৰিয় আছিল। কিন্তু এতিয়া সেই একেগৰাকী মন্ত্ৰীয়ে এতিয়া ‘মিঞা-মুছলমানক যিমান পাৰি বেয়াকৈ ক’বলৈয়ো কুন্ঠাবোধ নকৰে বুলি মন্তব্য কৰিব পৰা হ’ল।
আনকি বিজেপিৰ ৰাজ্যিক সভাপতি ৰঞ্জিত দাসৰ সোঁতৰ বিপৰীতে গৈ ‘মিঞা-মুছলমানে’ বিজেপিক ভোট নিদিয়ে বুলিহে কোৱাৰ সাহস কৰিব পৰা হ’ল মন্ত্ৰী হিমন্ত বিশ্ব শৰ্মাই।
আনকি, এতিয়া চৰকাৰৰ খৰচৰে ধৰ্মীয় শিক্ষা দিয়া নহ’ব বুলি দাবী কৰা মন্ত্ৰী হিমন্ত বিশ্ব শৰ্মাই মাদ্ৰাছা শিক্ষাৰ প্ৰয়োজনীয়তা সন্দৰ্ভত আধ্যাত্মিক শিক্ষা অতিকৈ প্ৰয়োজনীয় বুলি দাবী কৰিছিল।
কৰিমগঞ্জৰ মাদ্ৰাছাকেন্দ্ৰিক এক অনুষ্ঠানত ইছলাম ধৰ্মৰ সমৰ্থনত কংগ্ৰেছৰ মন্ত্ৰী হৈ থাকোতে হিমন্তই কৈছিল ‘পৃথিৱীত যিমান ধৰ্ম আছে সেই ধৰ্মসমূহৰ পবিত্ৰ গ্ৰন্থসমূহৰ ভিতৰত শিক্ষাৰ পোহৰ দিয়া গ্ৰন্থ হ’ল পবিত্ৰ কোৰাণ শ্বৰীফ। জ্ঞান আৰু শিক্ষাৰ ওপৰত পবিত্ৰ কোৰাণ শ্বৰীফে শেষ পৃষ্ঠালৈকে গুৰুত্ব দি আহিছে।পবিত্ৰ মাদ্ৰাছাসমূহৰ পৰা জ্ঞান আৰু শিক্ষাৰ পোহৰ সমগ্ৰ সমাজখনত বিয়পোৱাৰ প্ৰয়োজন আছে।‘
কিন্তু বিজেপিত থকা অৱস্থাত মাদ্ৰাছা বন্ধ কৰিবলৈ গৈ ‘মাদ্ৰাছাত অধ্যয়ন কৰিলে চিকিৎসক হ’ব নেকি?’ বুলিহে প্ৰশ্ন কৰে মন্ত্ৰী হিমন্ত বিশ্ব শৰ্মাই।
ইপিনে, কংগ্ৰেছৰ শাসনকালত ডিঙিৰ শিৰ ফুলাই ফুলাই সংখ্যালঘু(মিঞা-মুছলমান)ৰ উন্নয়নৰ বাবে বিগত কংগ্ৰেছ চৰকাৰে কৰা কামৰ খাতিয়ান দাঙি ধৰা মন্ত্ৰী হিমন্ত বিশ্ব শৰ্মাই এতিয়া ‘মিঞা-মুছলমান’ক চুড়ান্ত অপমান কৰো’ বুলি মন্তব্য কৰিবলৈ ইতিমধ্যে আৰম্ভ কৰিছে।
কালি সংবাদ মাধ্যমৰ আগত মন্ত্ৰীগৰাকীৰ মন্তব্য আছিল এনেধৰণৰ ‘মই মিঞা-মুছলমানক চুড়ান্ত অপমান কৰো সেইটো কি ডাঙৰ কথা? যিয়ে শংকৰদেৱ কলাক্ষেত্ৰত মিঞা মিউজিয়াম বনাব খোজে তেওঁলোকক মই অপমান কৰোৱেই।‘
মন্ত্ৰীগৰাকীৰ দুটা শাসনকালত এনে দ্বৈত চৰিত্ৰ সন্দৰ্ভত আমাৰ সাংবাদিকৰ আগত প্ৰতিক্ৰিয়া প্ৰকাশ কৰিছে ন-কংগ্ৰেছী নেত্ৰী মীৰা বৰঠাকুৰে।
‘মন্ত্ৰী হিমন্ত বিশ্ব শৰ্মাই নিজৰ সুবিধামতেই ৰাজনীতি কৰি আহিছে। নিৰ্বাচনী বৈতৰণী পাৰ কৰিবলৈকে হিন্দু-মুছলমান কৰিবলৈ তেওঁ আৰম্ভ কৰিছে। সেয়েহে তেওঁ মুছলমান বেয়া বা সভ্যতাৰ যুঁজ ইত্যাদি প্ৰসংগৰ কৰা বেছিকৈ উল্লেখ কৰি আছে। গুজৰাটৰ পানীৰ পাইপৰে মুছলমানৰ তেজ বয় বুলি নৰেন্দ্ৰ মোদীক এসময়ত তেওঁৱেই সমালোচনা কৰি থৈছিল।‘ বৰঠাকুৰে এইদৰে কয়।
