অসম বিধানসভা নিৰ্বাচনৰ প্ৰাকক্ষণত জাগীৰোড কংগ্ৰেছত মোক্ষম আঘাত হানি ইজনৰ পিছত সিজন শীৰ্ষ নেতাই দল ত্যাগ কৰা কাৰ্যই এতিয়া দলটোৰ নিষ্ঠাৱান নেতা কৰ্মীসকলৰ মাজত তীব্ৰ প্ৰতিক্ৰিয়া সৃষ্টি কৰিছে।
শেহতীয়াকৈ জাতীয়তাবাদী শিবিৰৰ পৰা পোনে পোনে ৰাষ্ট্ৰীয়তাবাদৰ শিবিৰলৈ গমন কৰা অগপৰ প্ৰাক্তন মন্ত্ৰী তথা কংগ্ৰেছৰ শীৰ্ষনেতা বুবুল দাসে আজি কংগ্ৰেছ দলৰ পৰা পদত্যাগ কৰিছে।
জাগীৰোড গড়কাপ্তানি বিভাগৰ ডাকবঙলাত আজি এখন সংবাদ মেল সম্বোধন কৰি প্ৰাক্তন মন্ত্ৰীগৰাকীয়ে কয় যে কংগ্ৰেছৰ শীৰ্ষ নেতৃত্বই দলটোৰ প্ৰকৃত নেতা-কৰ্মীসকল প্ৰতি যি দায়ৱদ্ধতা সেয়া নস্যাৎ কৰি শীৰ্ষ মহলৰ পৰা লোৱা কেতবোৰ সিদ্ধান্তৰ বাবে দলটোৰ ভেটি থৰকবৰক হৈছে।
ইয়াৰ সমান্তৰালভাৱে জাগীৰোড ব্ল’ক কংগ্ৰেছত অবাঞ্ছিতভাৱে এছাম বিজেপিৰ এজেণ্টৰ দ্বাৰা দলটোক থান-বান কৰিবলৈ লৈছে বুলি অভিযোগ তোলে প্ৰাক্তন মন্ত্ৰীগৰাকীয়ে।।
ইফালে যি সময়ত ভাৰতীয় জাতীয় কংগ্ৰেছে ‘কা’বিৰোধী স্থিতিৰে অসমৰ ৰাইজৰ কাষত থিয় দি দলটোৰ ভাৱমূৰ্তি মজবুত কৰিছিল তেনে সময়ত দলটোলৈ অহা এনে দুৰ্যোগ তাৎপৰ্যপূৰ্ণ বুলি মন্তৱ্য কৰে নেতাগৰাকীয়ে। কিন্তু পৰিৱৰ্তিত সময়ত দ্বিতীয় বাৰৰ বাবে অসমত জাতীয়তাবাদ প্ৰতিষ্ঠা হৈছে আৰু সেই কাৰণে তেওঁ জাতীয়তাবাদ পোষকতা কৰি ৰাষ্ট্ৰীয়তাবাদ ত্যাগ কৰা বুলি সংবাদ মেলত সদৰী কৰে।
মই প্ৰকৃততে এজন আঞ্চলিকতাবাদ বিশ্বাসী লোক বুলি উল্লেখ কৰি প্ৰাক্তন মন্ত্ৰীগৰাকীয়ে কয় যে আঞ্চলিকতাবাদৰ ভেটিতেই মোৰ ৰাজনৈতিক জীৱনৰ আৰম্ভণি হৈছিল আৰু ভৱিষ্যতেও আঞ্চলিকতাবাদতে শেষ কৰিম।
আনহাতে সংবাদ মেলতে ১০নং নগাঁও সংসদীয় লোকসভা সমষ্টিৰ সাংসদ প্ৰদ্যুৎ বৰদলৈক কটাক্ষ কৰি প্ৰাক্তন মন্ত্ৰীগৰাকীয়ে অভিযোগ তুলি কয় যে গেৰুৱা দলটোৰ পৰা স্বপন কুমাৰ মণ্ডলক আনি জাগীৰোড ব্ল’ক কংগ্ৰেছত থান-বান কৰিলে। তাৰ বাবে সাংসদগৰাকীয়েই দায়ী বুলি স্পষ্ট কৰে সদ্যপদত্যাগী বুবুল দাসে।
সাংসদ গৰাকীয়ে দলটোক সু-সংগঠিত কৰিব পাৰিব লাগিছিল কিন্তু তেঁওৰ শেহতীয়া কৰ্মৰাজিয়ে জাগীৰোড মণ্ডলৰ নিষ্ঠাৱান নেতা-কৰ্মী তথা বিষয়-ববীয়াসকলক নিৰাশহে কৰিলে বুলি অভিযোগ তোলে বুবুল দাসে।
ধ্ববংস্তুপত পৰিণত কৰি জাগীৰোড কংগ্ৰেছক আনকি বিগত সময়ত চাৰি মাহত ব্ল’ক কংগ্ৰেছৰ সভাপতি ভঙা-পতা কৰিছিল বুলিও সদ্য পদত্যাগী কংগ্ৰেছী নেতাগৰাকীয়ে সাংসদ গৰাকীক জগৰীয়া কৰে।
উল্লেখ্য যে সামগ্ৰিকভাৱে জাগীৰোড কংগ্ৰেছৰ এনে দুৰ্দশাৰ আঁৰত ব্লু’প্ৰিণ্ট ৰচনাৰ আৰত সাংসদ গৰাকীৰ লগতে স্থানীয় বিধায়ক তথা ৰাজ্যিক স্বাস্থ্যমন্ত্ৰী পীয়ুষ হাজৰিকাও সন্দেহৰ উদ্ধত ন’হয় বুলি আজিৰ সংবাদ মেলত প্ৰাক্তন মন্ত্ৰী গৰাকীয়ে সদৰী কৰে।
