ভাৰত-পাক সীমান্তৰ নিয়্ন্ত্ৰণ ৰেখাত পুনৰ যুদ্ধ বিৰতি উলংঘা কৰিছে পাকিস্তানৰ সেনাই।
বুধবাৰে জম্মু আৰু কাশ্মীৰৰ ৰাজৌৰিত হঠাতে পাক সেনাই যুদ্ধ বিৰতি উলংঘনা কৰি ভাৰতীয় সেনালৈ লক্ষ্য কৰি গুলী বৰ্ষণ কৰে।
উক্ত গুলী বৰ্ষণত এগৰাকী ভাৰতীয় সেনা জোৱানৰ মৃ্ত্যু হয় বুলি সেনা বাহিনীৰ সূত্ৰই প্ৰকাশ কৰিছে। সেনা সূত্ৰৰ মতে ইয়াৰ লগে লগে চলিত বৰ্ষত সীমান্তত পাকিস্তান সেনাৰ আক্ৰমণত চাৰিজন ভাৰতীয় সেনা জোৱান ছহিদ হৈছে।
সেনাৰ মুখপাত্ৰ লেফ্টটেন্ট কৰ্ণেল দেবেন্দ্ৰ আনন্দই প্ৰকাশ কৰা অনুসৰি পাক সেনাই পূৰ্বৰ দৰে প্ৰৰোচনামূলকভাৱে গুলীবৰ্ষণ কৰিবলৈ আৰম্ভ কৰে। উক্ত গুলীবৰ্ষণত হঠাতে এজন ভাৰতীয় এজন জোৱান গুলীবিদ্ধ হয়। প্ৰচুৰ ৰক্তক্ষৰণ হোৱাৰ ফলত জোৱানজনৰ মৃত্যু হয়।
নিহত বীৰ ছহিদ জোৱানজন ৰাজস্থানৰ যোধপুৰ লক্ষ্মণ বুলি জানিবলৈ দিছে সেনাৰ মুখপাত্ৰগৰাকীয়ে।
“লক্ষ্মণ এজন সাহসী, কৰ্তব্যনিষ্ঠ আৰু অনুপ্ৰাণিত কৰিব পৰা সৈনিক আছিল। তেওঁৰ ত্যাগ আৰু নিষ্ঠাৰ বাবে দেশে তেওঁৰ ওচৰত চিৰ কৃতজ্ঞ হৈ থাকিব।” কৰ্ণেল দেবেন্দ্ৰ আনন্দই কয়।
স্মৰ্তব্য যে ইয়াৰ পূৰ্বে ১৮ জানুৱাৰিত সেনাৰ নন কমিশ্যনড বিষয়া নিশান্ত শৰ্মা পাক সেনাৰ গুলী চালনাত গুলীবিদ্ধ হৈ ২৪ জানুৱাৰিত উধমপুৰ কমাণ্ড হাস্পতালত মৃতু বৰণ কৰিছিল। যোৱা জানুৱাৰিত হাবিলদাৰ নিৰ্মল সিং পুঞ্চত পাক সেনাৰ গুলীত ছহিদ হৈছিল।
ইয়াৰ পূৰ্বে ১ জানুৱাৰিত ৰাজৌৰিত পাক সেনাৰ গুলীত প্ৰাণ দিছিল চুবেদাৰ ৰবিন্দৰ।
