বিগত প্ৰায় ৪৮ মাহে বন্ধ হৈ থকা উত্তৰ পূৰ্ৱাঞ্চলৰ গৌৰৱৰ প্ৰতীক নগাঁও আৰু কাছাৰ কাগজ কলদুটা পুনৰুজ্জীৱিত কৰাৰ দাবীত বৃহস্পতিবাৰে জাগীৰোডত কল দুটাৰ শ্ৰমিক-কৰ্মচাৰীসকলে জাগীৰোড নগৰত বিক্ষোভ প্ৰদৰ্শন কৰি উত্তাল কৰি তুলে নগৰখনৰ সামগ্ৰিক পৰিস্থিতি।
জাগীৰোড চহৰৰ মাজমজিয়াত কাগজগ কল দুটাক পুনৰুজ্জীৱিকৰণৰ দাবীত কেন্দ্ৰীয় তথা ৰাজ্য চৰকাৰৰ বিৰুদ্ধে উত্তাল প্ৰতিবাদ সাব্যস্ত কৰে কল দুটাৰ শ্ৰমিক-কৰ্মচাৰীসকলে।
কল দুটাৰ কৰ্মচাৰীসকলক লৈ গঠিত জইন্ট একশ্যন কমিটি ফৰ ৰিকগনাইজড ইউনিয়নৰ উদ্যোগত এই প্ৰতিবাদ কাৰ্যসূচী ৰূপায়ণ কৰা হয়।
প্ৰতিবাদ স্থলীত সংগঠনটোৰ সভাপতি মানৱেন্দ্ৰ চক্ৰৱৰ্তীয়ে ক্ষোভ তথা প্ৰতিক্ৰিয়া প্ৰকাশ কৰি প্ৰশ্ন কৰে ২০১৪ চনৰ পৰা ২০১৮ চনলৈ কাগজ কল দুটৰ বাবে আৱন্টিত ৪,১৪১ কোটি টকা কোনে শৰাধ কৰিলে ?
ইয়াৰ এক ন্যায়িক বিচাৰ হ’ব লাগে বুলিও দাবী কৰে চক্ৰৱৰ্তীয়ে। দুৰ্নীতিৰ বিৰুদ্ধে শূন্য সহনশীলতাৰ কথা কোৱা বিজেপি মিত্ৰজোঁট চৰকাৰখনক ইয়াৰ উচিত তদন্ত কৰিবলৈও চক্ৰৱৰ্তীয়ে দাবী জনায়।
উল্লেখ্য যে বন্ধ হৈ থকা কাগজ কল দুটাৰ ৮০ গৰাকী শ্ৰমিক-কৰ্মচাৰীৰ বিনা বেতনে অকাল মৃত্যু হোৱা প্ৰতিবাদতো এই বিক্ষোভ কাৰ্যসূচী গ্ৰহণ কৰা হয়।
প্ৰতিবাদী কাৰ্যসূচীত মৰিগাঁও জিলাৰ বহুকেইটা জাতীয়তাবাদী দল,সংগঠনৰ প্ৰতিনিধি তথা সহস্ৰাধিক ৰাইজে অংশ গ্ৰহণ কৰে।
