আইপিএলত মুম্বাই ইণ্ডিয়ানছৰ হৈ খেলাৰ সুযোগ পোৱাৰ পাছতে শচীন পুত্ৰ অৰ্জুন তেণ্ডুলকাৰৰ ওপৰত সকলোৰে দৃষ্টি নিৱদ্ধ হৈছে।
নীলামত সকলো দলে নিজৰ স্কোৱাদ সম্পূৰ্ণ কৰি তোলাৰ পাছত শেষ মুহূৰ্তত মুম্বাই ইণ্ডিয়ানছে ২০ লাখ টকাৰ বেচ প্ৰাইচত অৰ্জুনক দলত লয়।
ছচিয়েল মিডিয়াত ব্যাপক চৰ্চাৰ মাজতে শচীন কন্যা অৰ্জুনৰ বায়েক ছাৰাই ভাতৃলৈ আগবঢ়াইছে আত্মবিশ্বাস বৃদ্ধি কৰিব পৰা এক বাৰ্তা। ক’বলৈ গ’লে অৰ্জুনক উজ্জীৱিত কৰি তোলাৰ বাবেই ছচিয়েল মিডিয়াত ছাৰাৰ এই বাৰ্তা।
ইনষ্টাগ্ৰামৰ প’ষ্টত ছাৰাই লিখিছে, ‘’এই কৃতিত্ব তোমাৰ পৰা কোনোৱে কাঢ়ি নিব নোৱাৰে। এইটো কেবল তোমাৰেই।‘’
অৰ্জুন তেণ্ডুলকাৰো আইপিএলত খেলাৰ সুযোগ পাই উৎফুল্লিত। মুম্বাই ইণ্ডিয়ানছৰ ফালৰ পৰা ছচিয়েল মিডিয়াত শ্বেয়াৰ কৰা এক ভিডিঅ’ বাৰ্তাত অৰ্জুনে কয়,’’সৰুৰে পৰাই মই মুম্বাই ইণ্ডিয়ানছৰ একান্ত অনুৰাগী। মোৰ ওপৰত আস্থা ৰখাৰ বাবে মই প্ৰশিক্ষক, স্বত্তাধিকাৰী আৰু ছাপোৰ্ট ষ্টাফসকলক কৃতজ্ঞতা জনাইছো। মই মুম্বাইৰ টীমত যোগ কথা ভাৱি ৰোমাঞ্চিত হৈ পৰিছো।‘’
শচীনৰ দৰে বিশেষজ্ঞ বেটছমেন নহ’লেও বিস্ফোৰক বেটিং আৰু বাঁওহতীয়া পেচ বলিঙত অৰ্জুনৰ লক্ষ্যভেদ কৰাৰ দক্ষতা চাবলৈ ক্ৰিকেট অনুৰাগীসকল আগ্ৰহী হৈ পৰিছে।
