সমাগত ২০২১ বৰ্ষৰ বিধানসভা নিৰ্বাচন, নিৰ্বাচনী অধিসূচনা জাৰি হ’বৰ বাবে মাজত মাথো কেইটামান দিন বাকী।
ৰাজ্যৰ প্ৰায় সকলোতে ৰাজনৈতিক নেতা সমূহ ব্যস্ত আধাৰশিলা স্থাপন তথা চৰকাৰী আঁচনি উন্মোচনত।
কিন্তু এনে সময়তো সেই সকল ৰাজনৈতিক নেতাৰ চকুত নপৰিলে নিজৰ সমষ্টিৰে বহুবোৰ অঞ্চলৰ দুৰৱস্থা, আজিকোপতি কোনো আঁচনিয়ে ঢুকি নাপালে বিশেষ কিছু অঞ্চলৰ জৰাজীৰ্ণ দলং, বাট-পথ ইত্যাদি।
অনুৰূপ সীমাহীন দুৰ্দশাৰ মাজত দিন কটাবলৈ বাধ্য হৈছে চামগুৰিৰ উদমাৰি গাওঁ পঞ্চায়তৰ অন্তৰ্গত ন’নৈ চাহ বাগিচা অঞ্চলৰ সৰ্বসাধাৰণ ৰাইজে।
ন’নৈৰ পৰা চামগুৰি সংযোগী এটা বিশেষ পথৰ ওপৰত থকা এখন গুৰুত্বপূৰ্ণ কাঠৰ দলংৰ অতি জৰাজীৰ্ণ অৱস্থাৰ বাবে সম্প্ৰতি জীয়াতু ভুগিব লগীয়া হৈছে সেই পথেৰে নিতৌ যাতায়ত কৰিব লগীয়া হোৱা বৃহত্তৰ অঞ্চলটোৰ বহু সংখ্যক লোকে তথা মহিলা-শিশুকে আদি কৰি কন-কন স্কুলীয়া ছাত্ৰ-ছাত্ৰী সকলে।
কেৱল মাত্ৰ দুই-তিনি ডাল মান কঁপি থকা লোহাৰৰ ওপৰত পৰিত্যক্ত ৰূপত থকা অৱশিষ্ট কেইডালমান কাঠৰ বাবে এতিয়া দলংখনত সৃষ্টি হৈছে বৃহৎ আকৃতিৰ ফাঁক।
যি খন দলংৰে বাহনলৈতো দূৰৰে কথা দিনতে খোজকাঢ়িও পাৰ হোৱাতো অতি বিপদসঙ্কুল হৈ পৰিছে ৰাইজৰ বাবে।
প্ৰায় বিশ বছৰ পূৰ্বে বিধায়ক ৰকিবুল হুছেইনে উদ্ঘাটন কৰা দলং খন মেৰামতিৰ বাবে ৰাইজে বহুবাৰ আহ্বান জনোৱাৰ পিছতো পুনৰাই ঘূৰি চোৱা নাই খোদ বিধায়ক গৰাকীয়েই। ইফালে মন্ত্ৰী কেশৱ মহন্তয়ো এবছৰ পূৰ্বে দলং খন মেৰামতি অথবা পকীকৰণৰ ব্যৱস্থা কৰি দিব বুলি ৰাইজক প্ৰদান কৰি যোৱা প্ৰতিশ্ৰুতিয়ো যেন অসাৰ প্ৰতিপন্ন হোৱা দেখা পোৱা গৈছে বৰ্তমান সময়ত।
যাৰ বাবে গৃহ সমষ্টিৰ বিধায়ক ৰকিবুল হুছেইন আৰু মন্ত্ৰী কেশৱ মহন্তৰ বিৰুদ্ধে চুড়ান্ত ক্ষোভ প্ৰকাশ তথা গৰিহণা প্ৰদান কৰিছে সদৌ অসম আদিবাসী ছাত্ৰ সন্থাৰ স্থানীয় নেতৃত্বৰ লগতে ক্ষুব্ধ ভুক্তভোগি ৰাইজে।
অৱশ্যে নিৰ্বাচনী অধিসূচনা জাৰি হোৱাৰ পূৰ্বেই অতি শীঘ্ৰে এই বিশেষ জৰাজীৰ্ণ দলং খনৰ পকীকৰণৰ কাম আৰম্ভ কৰিবৰ বাবে চৰকাৰৰ ওচৰত সজোৰে দাবী উত্থাপন কৰিছে অঞ্চলবাসীয়ে।
অন্যথা অসন্তুষ্ট স্থানীয় ৰাইজে আনাগত সময়ত ইয়াৰ প্ৰতিবাদ স্বৰূপে তীব্ৰ আন্দোলনৰ কাৰ্য্যসূচী হাতত লোৱাৰ হুংকাৰ প্ৰদান কৰিছে সংবাদ মাধ্যমৰ জৰিয়তে।
