আজিকালি বহুতেই ৰন্ধাবঢ়াৰ জঞ্জালত নগৈ অনলাইন খোৱাৰ অৰ্ডাৰ দিয়া দেখা যায়। সেইদৰে ঘৰত বিশেষ পৰ্ব থাকিলেও বহুতেই অনলাইনযোগে ফুড ডেলিভাৰি সংস্থাসমূহৰ পৰা খোৱাৰ অৰ্ডাৰ দিয়ে।
স্বাভাৱিকতেই ঘৰৰ মানুহক ৰন্ধাৰ কষ্টৰ পৰা সকাহ দি মেনু চাই ভাল খোৱাবস্তুৰ অৰ্ডাৰ দিয়াৰ মজাই সুকীয়া। ইয়াৰ বাবেই এই সংস্থাসমূহ বহুতৰে বাবে এক আশীৰ্বাদ হৈয়েই ধৰা দিছে।
কিন্তু এইবাৰ ঘটিল এক আন কাণ্ড। অনলাইন ডেলিভাৰি সংস্থাৰ পৰা ক’ল্ড ড্ৰিংক অৰ্ডাৰ কৰি মূত্ৰ (ইউৰিন) পালে ইংলেণ্ডৰ এগৰাকী ব্যক্তিয়ে।
অলিভাৰ মেকমেনিছ নামৰ ব্যক্তিগৰাকীয়ে যেতিয়া ক’ল্ড ড্ৰিংকটো খোলে তেওঁ দেখে যে সেয়া এক হালধীয়া তৰল পদাৰ্থ। পাছত তেওঁ বুজিব পাৰিলে সেয়া ইউৰিন।
ইয়াৰ পাছতে তেওঁ সেই সংস্থাটোক ট্যাগ কৰি জানিব বিচাৰে কিয় তেওঁলোকে ক’ল্ড ড্ৰিংকৰ বটলত ইউৰিইন পঠালে?
অলিভাৰৰ টুইটটো ছচিয়েল মিডিয়াত ভাইৰেল হৈ পৰে। তেওঁ জানিবলৈ দিয়া মতে যিটো বাকচত আইটেমটো আহিছিল সেইটো ছীল কৰা নাছিল। অলিভাৰৰ টুইটৰ পাছতে সেই সংস্থাই ততাতয়াকৈ ক্ষমা বিচাৰে।
সংস্থাটোক অলিভাৰে কয় যে ইয়াৰ বাবে কাৰোবাৰ চাকিৰ যোৱাটো তেওঁ নিবিচাৰে। কিয়নো কৰ’নাৰ পাছত চাকৰি যোৱাটো অত্যন্ত বেয়া কথা। কিন্তু এইটো অৱশ্যে দুৰ্ভাগ্যজনক ঘটনা।
হেলো ফ্ৰেছ নামৰ সেই সংস্থাটো আমেৰিকাৰ বহু তাৰকাৰো পছন্দৰ। ১২ খনকৈ দেশত তেওঁলোকৰ ৰমৰমীয়া ব্যৱসায় চলি আছে। এটা এপৰ জৰিয়তে অৰ্ডাৰ অনুসৰি তেওঁলোকে গ্ৰাহকৰ ওচৰলৈ খোৱাবস্তু ডেলিভাৰি কৰে।
হেলো ফ্ৰেছৰ বিষয়াই জানিবলৈ দিয়ে যে তেওঁলোকৰ গ্ৰাহকে এনে পৰিস্থিতিৰ সন্মুখীন হোৱাত তেওঁলোক অত্যন্ত দু:খিত। বাকচটো পঠোৱাৰ সময়ত সেইটো সম্পূৰ্ণ ছীল কৰা আছিল আৰু সকলো ঠিকমতে পৰীক্ষা কৰাৰ পাছতহে ডেলিভাৰি কৰাৰ বাবে দিয়া হৈছিল।
সংস্থাটোৱে তেওঁলোকৰ ডেলিভাৰি পাৰ্টনাৰক বাকচটো কিয় খোলা অৱস্থাত গ্ৰাহকৰ কাষ পালে তাৰবাবে জবাবদিহি কৰিছে।
অৱশ্যে গ্ৰাহকৰ ওচৰত ক্ষমা বিচাৰি সংস্থাটোৱে সেই গ্ৰাহকক এটা বিনামূল্যে খোৱাৰ বাকচো শুভেচ্ছামূলক বাৰ্তা হিচাপে প্ৰেৰণ কৰে।
ভৱিষ্যতে যাতে আৰু এনেকুৱা ঘটনা সংঘটিত নহয় তাৰবাবে সচেষ্ট থাকিব বুলিও সংস্থাটোৱে কথা দিছে।
