গৰাকীক হত্যা কৰাৰ অভিযোগত অভিযুক্ত এটা কুকুৰাক আৰক্ষীয়ে আদালতত হাজিৰ কৰাব।
ইতিমধ্যে আৰক্ষীয়ে অভিযুক্ত কুকুৰাটোক গৰাকীৰ হত্যাৰ অভিযোগত গ্ৰেপ্তাৰ কৰা বুলি সম্প্ৰচাৰিত বাতৰি খণ্ডন কৰিছে আৰক্ষীয়ে।
স্মৰ্তব্য যে যোৱা ২২ ফেব্ৰুৱাৰিত এই দুৰ্ভাগ্যজনক ঘটনাটো সংঘটিত হৈছিল।
ঘটনাৰ বিৱৰণী অনুসৰি তেলেংগনাৰ জগিটাল জিলাৰ গোল্লাপাল্লী আৰক্ষী থানাৰ অন্তৰ্গত লাথুনুৰ মন্দিৰৰ সমীপত এখন অবৈধ কুকুৰা যুঁজ আয়োজন কৰা হৈছিল।
উক্ত কুকুৰা যুঁজত অংশগ্ৰহণৰ বাবে থানুগোল্লা সতীশ নামৰ ৪৫ বছৰীয়া এগৰাকী ব্যক্তিয়ে নিজৰ কুকুৰাটো সাজু কৰিবলৈ ঠেঙত চুৰি বান্ধি আছিল।
কুকুৰাটোৰ ঠেঙত চুৰিখন বান্ধি থকা অৱস্থাতে হঠাতে কুকুৰাটোৱে গৰাকী সতীশক আক্ৰমণ কৰে আৰু চোকা চুৰিখনে সতীশৰ কৰঙনৰ চুকত আঘাত কৰে।
গুৰুতৰভাৱে আঘাতপ্ৰাপ্ত সতীশক স্থানীয় গোল্লাপল্লী চিকিৎসালয়ত ভৰ্তি কৰোৱা হৈছিল যদিও প্ৰচুৰ ৰক্তক্ষৰণৰ ফলত তেওঁৰ মৃত্যু হোৱা বুলি চিকিৎসকে ঘোষণা কৰে।
ঘটনাৰ পিছতে শুকুৰবাৰে আৰক্ষীয়ে ঘটনাস্থলীত উপস্থিত হৈ অভিযুক্ত কুকুৰাটোক আৰক্ষী থানালৈ লৈ আনে। ইয়াৰ পিছতে স্থানীয় বৈদ্যুতিন সংবাদ মাধ্যমত কুকুৰাটোক আৰক্ষীয়ে গ্ৰেপ্তাৰ কৰা বুলি বাতৰি সম্প্ৰচাৰ হয়।
আৰক্ষী সূত্ৰই প্ৰকাশ কৰিছে যে ঘটনা সন্দৰ্ভত কুকুৰাটোক গ্ৰেপ্তাৰ কৰা হোৱা নাই। অৱশ্যে তেওঁলোকে কুকুৰাটোক আদালতত হাজিৰ কৰাব।
গোল্লাপল্লী আৰক্ষী থানাৰ বিষয়া বি জীৱনে প্ৰকাশ কৰা অনুসৰি কুকুৰাটোক গ্ৰেপ্তাৰ আৰু আটক কৰা হোৱা নাই। কুকুৰাটোক নিৰাপদে ৰখাৰ স্বাৰ্থতেই তেওঁলোকে কুকুৰাটোক থানালৈ আনি সুৰক্ষিত অৱস্থাত ৰাখি স্থানীয় এখন কুকুৰা ফাৰ্মলৈ প্ৰেৰণ কৰিছে।
উল্লেখ্য যে তেলেংগনাত ইতিমধ্যে কুকুৰা যুঁজ নিষিদ্ধ কৰা হৈছে। কোনো কোনো ঠাইত প্ৰশাসনৰ চকুত ধূলি দি অবৈধভাৱে কুকুৰা যুঁজ আয়োজন কৰি আহিছে কিছু লোকে।
২২ ফেব্ৰুৱাৰিতো প্ৰশাসনৰ চকুত ধূলি দি অবৈধভাৱে কুকৰা যুঁজৰ আয়োজন কৰা হৈছিল আৰু তেতিয়াই এই দুৰ্ভাগ্যজনক ঘটনাটো সংঘটিত হয়।
ইফালে আৰক্ষী সূত্ৰই প্ৰকাশ কৰা মতে লাথুনুৰত আয়োজন কৰা অবৈধ কুকুৰা যুঁজৰ আয়োজকক গ্ৰেপ্তাৰ কৰি আদালতত হাজিৰ কৰোৱা হ’ব।