ভাৰতীয় অপেনিং বেটছমেন ৰোহিত শৰ্মা্ৰ টেষ্ট ৰেংকিঙত কেৰিয়াৰৰ আটাইতকৈ শীৰ্ষতম স্থানত উপনীত হৈছে।
শেহতীয়াকৈ প্ৰকাশ কৰা টেষ্ট ৰেংকিংখনত ৰোহিত শৰ্মাই পূৰ্বৰ ১৪ নম্বৰ স্থানৰ পৰা ৮ নম্বৰ স্থানত উপনীত হৈছে।
ইংলেণ্ডৰ বিৰুদ্ধে চলিত টেষ্ট শৃংখলাটোৰ দ্বিতীয়খন মেচত কৰা ১৬১ ৰাণৰ দুৰ্দান্ত ইনিংছটোৰ বাবেই ৰোহিতে এই অগ্ৰগতি লাভ কৰিবলৈ সক্ষম হৈছে।
ইয়াৰ পাছতে তৃতীয়খন মেচৰ দ্বিতীয় ইনিংছত ৬১ ৰাণৰ বৰঙনি যোগাবলৈ সক্ষম হয়।
এতিয়ালৈকে শৃংখলাটোৰ ৩খন মেচত অপেনিং বেটছমেন হিচাপে অংশ লৈ তেওঁ মুঠ ২৯৮ ৰাণ কৰিবলৈ সক্ষম হৈছে।
এইক্ষেত্ৰত ৰোহিতে সতীৰ্থ বেটছমেন চেতেশ্বৰ পুজাৰাক ১০ নম্বৰ স্থানলৈ পিচুৱাই পঠায়।
ৰোহিতৰ পূৰ্বে ৮ নম্বৰ স্থানত আছিল পুজাৰা। কিন্তু চলিত শৃংখলাটোত পুজাৰাই বিশেষ বৰঙণি আগবঢ়াবলৈ সক্ষম হোৱা নাই।
ৰেংকিঙৰ শীৰ্ষ দহত আন এজন ভাৰতীয় বেটছমেন বিৰাট কোহলীয়ে পঞ্চম স্থান অক্ষুণ্ণ ৰাখিছে।
নিউজিলেণ্ডৰ কেন উইলিয়ামছন, অষ্ট্ৰেলিয়াৰ ষ্টিভ স্মিথ, মাৰনুছ লাবুচেনে আৰু ইংলেণ্ডৰ জ’ ৰুটে ক্ৰমে প্ৰথম, দ্বিতীয়, তৃতীয় আৰু চতুৰ্থ স্থান অক্ষট ৰাখিছে।
আনহাতে বলিং ৰেংকিঙত ভাৰতীয় অফ স্পীনাৰ ৰবীচন্দ্ৰন অশ্বীনে এটা স্থান আগুৱাই গৈ ৩ নম্বৰ স্থানত উপনীত হৈছে।
চলিত টেষ্ট শৃংখলাটোত তেওঁ সৃষ্টি কৰা স্পীনৰ যাদুৰ বাবেই এই সফলতা লাভ কৰিছে।
ইংলেণ্ডৰ বিৰুদ্ধে চলিত শৃংখলাটোত তেওঁ বৰ্তমানলৈকে ২৪টাকৈ উইকেট হস্তগত কৰি চমক সৃষ্টি কৰিছে।
ৰেংকিংখনত অশ্বীনেই হৈছে একমাত্ৰ স্পীনাৰ, যি ভাৰতক প্ৰতিনিধিত্ব কৰিছে।
আনহাতে, শৃংখলাটোৰ দ্বিতীয় টেষ্টৰ দ্বাৰা নিজৰ টেষ্ট কেৰিয়াৰৰ অভিষেক ঘটোৱা অক্ষৰ পেটেলেও পূৰ্বৰ ৩৮সংখ্যক স্থানৰ পৰা ৩০ নম্বৰ স্থানত উপনীত হৈছে।
ইতিমধ্যে অক্ষৰে ২খন টেষ্ট মেচ খেলিয়ে ১৮টাকৈ উইকেট লাভ কৰিছে।
শীৰ্ষ দহৰ ৯ নম্বৰ স্থানত ফাষ্ট বলাৰ যশপ্ৰীত বুমৰাহে নিজৰ স্থান অক্ষট ৰাখিছে।
আনহাতে অষ্ট্ৰেলিয়াৰ পেট কামিনছে প্ৰথম স্থান অক্ষুণ্ণ ৰাখিছে।
