এজন আৰক্ষী পৰিদৰ্শক আৰু দুজন কনিষ্টবলক এটা আমোদজনক ঘটনাৰ বাবে চাকৰিৰ পৰা নিলম্বন কৰা হৈছে।
আৰক্ষী দুজনে এখন ধাবাত খাদ্য খোৱাৰ পাছত যেতিয়া ধাবাৰ মালিকে বিলৰ পইচা বিচাৰে, আৰক্ষী দুজনে লগালগ মালিকজনক গ্ৰেপ্তাৰ কৰে।
আৰক্ষী দুজনে মিছাকৈ কয় যে ধাবাখনত তেওঁলোকে অবৈধ মৰণাস্ত্ৰ, অবৈধ সুৰা আৰু ভাঙৰ সন্ধান লাভ কৰিছে।
ঘটনাটো সংঘটিত হৈছিল ৪ ফেব্ৰুৱাৰীত, উত্তৰ প্ৰদেশৰ এটাহ জিলাত।
অভিযোগ অনুসৰি, ধাবাখনত গৈ দুজন আৰক্ষীয়ে খাদ্য খায় আৰু শেষত যেতিয়া ধাবাৰ মালিকে বিলৰ পইচা বিচাৰে, ওলোটাই ধাবাৰ মালিক আৰু আন ৯জন কৰ্মচাৰীহে গ্ৰেপ্তাৰৰ সম্মুখীন হয়।
ঘটনাটো সংঘটিত হোৱা ৪০ দিনৰ পাছতহে জ্যেষ্ঠ আৰক্ষী বিষয়াসকলে সমগ্ৰ ঘটনাটো পোহৰলৈ আনে আৰু অনুসন্ধান অব্যাহত ৰাখিছে।
ধাবাৰ মালিকজনৰ ভায়েক প্ৰবীন কুমাৰে সাংবাদিকক কয় যে ৪ ফেব্ৰুৱাৰীৰ দিনা ৰাতি দুই বজাত আৰক্ষী দুজনে ধাবাখনলৈ গৈ বিলাসী খাদ্য গ্ৰহণ কৰে।
তেওঁ জনায় যে আৰক্ষী দুজন ধাবাখনৰ নিয়মীয়া গ্ৰাহক কিন্তু বিল পৰিশোধ কৰাত ইয়াৰ পূৰ্বেও আপত্তি দৰ্শাইছিল।
তেওঁ জনায় যে ৪ ফেব্ৰুৱাৰীৰ দিনা আৰক্ষীকেইজন মাতাল অৱস্থাত আছিল আৰু ধাবাৰ মালিকজনক ভাবুকি প্ৰদান কৰিছিল।
তাৰ পাছত দুখন আৰক্ষী জিপ আহি ধাবাখনত উপস্থিত থকা সকলোকে উঠাই লৈ যায়।
আজি এটাহ আৰক্ষী থানাই টুইটাৰযোগে জনায় যে আৰক্ষীকেইজনৰ ওপৰত আৰোপিত অভিযোগ সঁচা।
