শিৱসাগৰ বিধানসভা সমষ্টিৰ সংখ্যালঘু ভোটদাতা ৰাইজক উদ্দেশ্যি কোনো দুষ্ট চক্ৰই সচেতন নাগৰিক সমাজ নামেৰে কোনো চিল-মোহৰ অবিহনে “আমি ভোট কাক দিম” শীৰ্ষক এক গোহাৰি পত্ৰ ঘৰে ঘৰে বিতৰণ কৰা কাৰ্যৰ বিৰুদ্ধে সদৌ শিৱসাগৰ অনুসুচীত জাতি ছাত্ৰ সন্থা, অসম ছাত্ৰ যুৱ সন্মিলন আৰু সদৌ অসম মৰিয়া ছাত্ৰ সন্থাই শুকুৰবাৰে শিৱসাগৰ সদৰ থানাত এজাহাৰ দাখিল কৰে।
ৰাজ্যৰ প্ৰথম পৰ্যায়ৰ নিৰ্বাচনী প্ৰচাৰৰ অন্ত পৰাৰ কিছুপূৰ্বে শিৱসাগৰৰ বিভিন্ন প্ৰান্তত এটা বিশেষ সম্প্ৰদায়ক কেন্দ্ৰ কৰি বিতৰণ কৰা হৈছে এই বেনামী গোহাৰি পত্ৰ।
বেনামী গোহাৰি পত্ৰখনৰ যোগেদি ৰাইজৰ দলৰ সভাপতি তথা শিৱসাগৰ সমষ্টিৰ প্ৰাৰ্থী অখিল গগৈৰ বিষয়ে ভুৱা আৰু আপত্তিজনক প্ৰচাৰ চলোৱা হৈছে।
বিশেষকৈ শিৱসাগৰৰ সাতামপুৰুষীয়া ঐক্য সম্প্ৰীতি বিনষ্ট কৰিবলৈ চেষ্টা কৰি মনোনীত প্ৰাৰ্থী হিচাপে শিৱসাগৰ সমষ্টিৰ পৰা প্ৰতিদ্বন্দ্বিতা আগবঢ়োৱা কৃষক নেতা কাৰাৰুদ্ধ অখিল গগৈৰ বিৰুদ্ধে মনে সজা অভিযোগ উত্থাপন কৰি সংগ্ৰামী নেতাজনক জনমানসত হেয় প্ৰতিপন্ন কৰি এক বিশেষ ৰাজনৈতিক দলক লাভাম্বিত কৰা বুলি ধাৰণা কৰা হৈছে।
কোনো এক বিশেষ ৰাজনৈতিক দলক লাভাম্বিত কৰাৰ কু-চক্ৰান্তত লিপ্ত হোৱা আৰু অপপ্ৰচাৰত জড়িত তথাকথিত বেনামী সচেতন নাগৰিক সমাজৰ বিৰুদ্ধে বিহীত ব্যৱস্থা ল’বলৈ শিৱসাগৰ আৰক্ষী অধীক্ষকক দাবী জনায় এজাহাৰ দাখিল কৰে সংগঠন সমুহে।
সভাপতি, সম্পাদক আদিৰ কোনো নাম নথকা সচেতন নাগৰিক সমাজ নামেৰে প্ৰচাৰ কৰা এই বেনামী গোহাৰি পত্ৰৰ যোগেদি স্বাস্থ্যজনিত কাৰণত প্ৰশাসনে অখিল গগৈক চিকিৎসালয়ত ৰখা কাৰ্যক প্ৰশ্নৰ আওঁতালৈ আনি ন্যায়িক ব্যৱস্থাটোক ভেঙুচালি কৰাৰ অভিযোগ উত্থাপন কৰে সংগঠনৰ কৰ্মকৰ্তাসকলে ।
