মাহৰ আৰম্ভণিতে শ্বেয়াৰ বজাৰত ডাঙৰ জোকাৰণি। বৃহস্পতিবাৰে ব্যৱসায়ৰ মাজভাগত চেন্সেক্সৰ মূল্য ১০০০ পইণ্টতকৈ অধিক হ্ৰাস পোৱাৰ বিপৰীতে নিফটিৰ মূল্যও ২২,৩০০ পইণ্টৰ তললৈ নামি আহিছে।
কেইঘণ্টামানৰ ভিতৰতে বিএছইত তালিকাভুক্ত কোম্পানীসমূহৰ মুঠ বজাৰ মূল্য প্ৰায় ৯ লাখ কোটি টকা হ্ৰাস পায়। বিদেশী বিনিয়োগকাৰীৰ ধাৰাবাহিকভাৱে শ্বেয়াৰ বিক্ৰী, আমেৰিকাৰ বণ্ডৰ সুদৰ হাৰ বৃদ্ধি আৰু টকাৰ মূল্য হ্ৰাসে বজাৰত চাপৰ সৃষ্টি কৰিছে।
এই ক্ষেত্ৰত আটাইতকৈ ডাঙৰ চাপ হৈছে বিদেশী বিনিয়োগকাৰীয়ে ধন উলিয়াই নিয়া। ৩০ ছেপ্টেম্বৰত বিদেশী বিনিয়োগকাৰীয়ে এদিনতে ভাৰতীয় ষ্টকৰ পৰা প্ৰায় ১০,১৪৮ কোটি টকা উলিয়াইছিল। ছেপ্টেম্বৰ মাহত তেওঁলোকৰ মুঠ শ্বেয়াৰ বিক্ৰী প্ৰায় ৪৬ হাজাৰ কোটি টকা হয়। যোৱা দুটা ব্যৱসায়িক দিনত মুঠ বিক্ৰীৰ পৰিমাণ ২০ হাজাৰ কোটি টকাতকৈও অধিক।
শ্বেয়াৰ বজাৰৰ এটা অংশই বিশ্বাস কৰে যে বিদেশীসকলৰ এই প্ৰৱণতাৰ আঁৰত আছে আন্তঃৰাষ্ট্ৰীয় বজাৰৰ পৰিস্থিতি। আমেৰিকাত বণ্ডৰ সুদ বৃদ্ধিৰ লগে লগে তুলনামূলকভাৱে নিৰাপদ সম্পত্তিত বিনিয়োগ আকৰ্ষণীয় হৈ পৰিছে। ফলত ভাৰতৰ দৰে উদীয়মান বজাৰ এৰি বিদেশী পুঁজিৰ ওলাই যোৱাৰ চাপ বাঢ়িছে।
বৃহস্পতিবাৰে আমেৰিকাৰ ১০ বছৰীয়া ট্ৰেজাৰী বণ্ডৰ সুদৰ হাৰ ৫.৩ শতাংশৰ ওপৰত বৃদ্ধি পায়। এই পৰিস্থিতিত আমেৰিকাৰ বণ্ডত বিনিয়োগ কৰি তুলনামূলকভাৱে অধিক ৰিটাৰ্ণ পোৱাৰ সুযোগে এনে পৰিস্থিতিৰ সৃষ্টি কৰিছে যে বিদেশী বিনিয়োগকাৰীয়ে ভাৰতীয় ষ্টকৰ প্ৰতি আগ্ৰহ হেৰুৱাব পাৰে। ইয়াৰ লগত যোগ হৈছে টকাৰ মূল্য হ্ৰাস।
বৃহস্পতিবাৰে ডলাৰৰ বিপৰীতে ৯৬ৰ সীমা অতিক্ৰম কৰিলে টকা। দিনটোৰ এটা সময়ত এটা ডলাৰ কিনিবলৈ প্ৰায় ৯৬.৩১ টাকা খৰচ হয়। বিদেশী বিনিয়োগকাৰীৰ বাবে যেতিয়া টকা কমি যায়, তেতিয়া ভাৰতীয় সম্পত্তিৰ ওপৰত ডলাৰৰ ৰিটাৰ্ণো কমি যায়। গতিকে তেওঁলোকে প্ৰয়োজনীয় পদক্ষেপ গ্ৰহণ কৰে।
ইফালে আন্তঃৰাষ্ট্ৰীয় বজাৰত খাৰুৱা তেলৰ মূল্যও ভাৰতীয় বজাৰৰ বাবে এক অতিৰিক্ত চিন্তাৰ কাৰণ। ইৰাণৰ সংঘাত আৰু যোগানৰ অনিশ্চয়তাই ইন্ধনৰ মূল্য অস্থিৰ কৰি তুলিছে। তেলৰ দাম বৃদ্ধি হ’লে কোম্পানীসমূহৰ আমদানি ব্যয়, মূল্যবৃদ্ধি আৰু উৎপাদন ব্যয়ৰ ওপৰত হেঁচা পৰিব পাৰে।
এই সকলোবোৰে বজাৰৰ অস্থিৰতাত প্ৰভাৱ পেলাইছে। ভাৰতীয় বজাৰৰ অস্থিৰতা সূচকাংকও বৃদ্ধি পাইছে। ফলত বৃহস্পতিবাৰে ভাৰতীয় শ্বেয়াৰ বজাৰে বিদেশী বিক্ৰী, বণ্ডৰ সুদ, মুদ্ৰাৰ দুৰ্বলতা আৰু তেলৰ অনিশ্চয়তা- চাৰিটা দিশৰ চাপত আন পুনৰ ডাঙৰ আঘাত লাভ কৰে।
