ইটালীৰ এখন তিনি হাজাৰ পুৰণি এখন চহৰ এতিয়া ধ্বংস মুখত। প্ৰকৃতিৰ ৰোষত পৰিয়েই ধ্বংসৰ পথলৈ গতি কৰিছে এই চহৰখন।
এই চহৰখনক এতিয়া কোৱাহয় ‘ডাইং টাউন’। অৰ্থাৎ মৃতপ্ৰায় চহৰ। ইটালীৰ এই চহৰখনৰ নাম হৈছে চিভিতা।
প্ৰকৃতিৰ ৰোষত পৰি চহৰখন বৰ্তমান ইয়াৰ পৰিসৰৰ মাত্ৰ এক তৃতীয়াংশহে আছেগৈ। ইমান পুৰণি চহৰখন ক্ৰমে ভূমিস্খলন, ভূমিক্ষয়ৰ ফলত ধ্বংসৰ মুখলৈ গতি কৰিছে। চহৰখন এখন পাহাৰৰ মূৰত অৱস্থিত।
চহৰখনৰ বাসিন্দা কিছুমানে ইউনেস্কোক আবেদন জনাইছে যাতে তেওঁলোকে এই স্থান এৰি গ’লেও তেওঁলোকৰ ঘৰসমূহ ৰক্ষা কৰাৰ চেষ্টা কৰে। কিয়নো, নহ’লে ইটালীৰ এক ইতিহাস চিৰদিনৰ বাবে হেৰাই যাব।
কেইবাশ বছৰ আগলৈকে বিভিন্ন পথেৰে চহৰখনলৈ আন প্ৰদেশৰ সংযোগ আছিল। কিন্তু সঘনাই হোৱা ভূমিস্খলন, ভূমিকম্প আদিৰ বাবে চহৰখন ক্ৰমে সৰু হৈ পৰিবলৈ আৰম্ভ কৰে।
ইপিনে, আন প্ৰদেশৰ সৈতে যোগাযোগ বন্ধ হৈ পৰাৰ লগতে প্ৰাকৃতিক কাৰণতে সৰু হৈ পৰাত মানুহ তাৰপৰা আঁতৰি যাবলৈ আৰম্ভ কৰে।
ভূতত্ত্ববিদৰ মতে নিৰৱিচ্ছিন্ন ভূমিস্খলন, ভূমিকম্প, ভূমিক্ষয় আদিৰ ফলত চিভিতা চহৰ অতি ক্ষুদ্ৰ পৰিসৰত পৰিণত হৈছে। চহৰখনত এতিয়া মাত্ৰ কেইটামান পথ তথা কেইটামান ঘৰ তথা গীৰ্জাহে অৱশিষ্ট ৰৈছে।
চহৰখনক ৰক্ষা কৰাৰ প্ৰচেষ্টা অব্যাহত ৰখা হৈছে যদিও সেয়া আৰু কিমানদিন বৰ্তি থাকে সেয়া কোৱা টান।
ৰোমান শাসনৰ সাক্ষী চহৰখনে মধ্যযুগ অতিক্ৰম কৰি আধুনিক যুগত আহি এক শীৰ্ণকায় অৱস্থাত উপনীত হৈছে। এক বিৰাট ইতিহাসৰ স্মৃতি কঢ়িয়াই অহা চহৰখন এতিয়া মৃত ইতিহাসত পৰিণত হ’বলৈ আগবাঢ়িছে।
বৰ্তমান চহৰখনৰ আয়তন দুখন ফুটবল খেলপথাৰৰ সমানহে আছেগৈ। চহৰখনৰ এই অৱশিষ্ট অংশ ৰক্ষা কৰাৰ বাবে দেশখনৰ প্ৰশাসনে যৎপৰোনাস্তি চেষ্টা চলাইছে।
