বিগত চাৰি সপ্তাহ ধৰি সমগ্ৰ বিশ্বতে ক্ষিপ্ৰ গতিত বৃদ্ধি পাইছে কৰ’নাৰ সংক্ৰমণ। সেইদৰে বৃদ্ধি পাইছে মৃত্যুৰ সংখ্যাও। ইয়াৰ মাজতে এক ডাঙৰ শংকাৰ কথা সদৰী কৰিলে বিশ্ব স্বাস্থ্য সংস্থাৰ মুৰব্বী টেড্ৰ’ছ অধানম ঘেব্ৰিয়েছুছে।
তেওঁ দাবী কৰে যে সম্প্ৰতি যি পৰিস্থিতি চলি আছে তাত ইমান সহজে বিশ্ববাসীয়ে কৰ’নাৰ পৰা মুক্তি নাপাব।
অৱশ্যে, সঠিক নীতি-নিষেধাজ্ঞা পালনৰ জৰিয়তে কৰ’নাৰ নিয়ন্ত্ৰণ সম্ভৱ বুলি তেওঁ ব্যক্ত কৰে।
বিশ্ব স্বাস্থ্য সংস্থাৰ মুৰব্বীগৰাকীয়ে কয় যে আমি সকলোৱে বিচাৰো যে বিশ্ব অৰ্থনীতিয়ে পুনৰ মূৰ দাঙি উঠক। কিন্তু কৰ’না মহামাৰীৰ সমাপ্তি ঘটিবলৈ এতিয়াও বহু বাকী আছে। সেইবুলি আমি আশাহত হোৱাৰ কোনো কাৰণ নাই।
তেওঁ কয় যে চলিত বছৰৰ আৰম্ভণিৰ দুটা মাহত দেখা গৈছে যে সমগ্ৰ বিশ্বতে আক্ৰান্ত তথা মৃত্যুৰ সংখ্যা হ্ৰাস পাইছিল। ইয়াৰ পৰা এইটো স্পষ্ট যে কৰ’নাৰ নতুন ষ্ট্ৰেইনকো প্ৰতিৰোধ কৰাটো সম্ভৱ।
বিশ্বত বৰ্তমান ১৩কোটি ৭২লাখ ৪৯হাজাৰ ১৬৭জন লোক কৰ’না ভাইৰাছৰ দ্বাৰা আক্ৰান্ত হৈছে। সেইদৰে ২৯লাখ ৫৮হাজাৰ ২৪০ জন লোকৰ মৃত্যু হৈছে।
আনহাতে, এতিয়ালৈকে ১১কোটি ৪লাখ ২৭হাজাৰ ৪০৬জন লোক কৰ’নাৰ পৰা সুস্থ হৈ উঠিছে। বৰ্তমান বিশ্বত সক্ৰিয় ৰোগীৰ সংখ্যা হৈছে ২ কোটি ৩৮লাখ ৬৩হাজাৰ ৫২১জন।
