অদৃশ্য শক্তিৰ ওপৰত তীব্ৰ ক্ষোভ উজাৰিলে এজন লোকে।
আনকি মন্দিৰৰ বিগ্ৰহো ভাঙি চিঙি খাস্তাং কৰি পেলালে।
দিল্লীৰ দ্বাৰকাৰ কাকৰলা গাঁৱত সংঘটিত হৈছে এই কাণ্ড।
গাঁওখনৰে মহেশ (৪৫) নামৰ এজন লোকে তীব্ৰ খৰাঙৰ বাবে এটা হনুমান মন্দিৰত গৈ মূৰ্তিসমূহ ভাঙি পেলায়।
মঙলবাৰে লোকজনক দিল্লী আৰক্ষীয়ে ঘটনাটোৰ পাছতে গ্ৰেপ্তাৰ কৰে।
লোকজনে মূৰ্তিটো ভাঙি থৈ যোৱাৰ পাছত মন্দিৰটোৰ পূজাৰীজন তাত গৈ উপস্থিত হয় আৰু লগে লগে আৰক্ষীক খবৰ দিয়ে।
তাৰপাছতে হিন্দুত্ববাদী সংগঠন আৰু স্থানীয় বাসিন্দাসকলে ঘটনাটোৰ প্ৰতিবাদ সাব্যষ্ট কৰে।
তেওঁলোকে পথ বন্ধ কাৰ্যসূচীও হাতত লয়।
আৰক্ষীয়ে তেওঁলোকক আশ্বাস প্ৰদান কৰে যে অভিযুক্ত লোকজনক অচিৰেই গ্ৰেপ্তাৰ কৰা হ’ব।
মন্দিৰটোৰ চিচি টিভি ফুটেজৰ সহায়ত আৰক্ষীয়ে মহেশক গ্ৰেপ্তাৰ কৰে।
মহেশ বৃত্তিত এজন মুচি।
চিচি টিভি ফুটেজৰ ভিত্তি কৰি আৰক্ষীয়ে কয় যে মহেশে কমলাৰঙী পোচাক পৰিধান কৰি হাতত এখন কুঠাৰ লৈ মন্দিৰ প্ৰাংগনত প্ৰৱেশ কৰিছিল।
আৰক্ষীয়ে কয় যে কেৱল তিনিটাকৈ হনুমান মূৰ্তিয়ে নহয়, মহেশে মন্দিৰ চৌহদৰ উদ্ভিদ আৰু বিভিন্ন পাত্ৰসমূহৰো ধ্বংসসাধন কৰে।
আৰক্ষীৰ জেৰাত মহেশে কয় যে আৰাধ্য দেৱতাৰ ওপৰত তেওঁৰ খং উঠাৰ বাবেই এই কাণ্ড সংঘটিত কৰিলে।
তেওঁৰ খঙৰ কাৰণ হ’ল আৰাধ্য দেৱতাই অঞ্চলটোৰ তাপমাত্ৰা বৃদ্ধি কৰি বৰষুণৰ পৰিমাণ কমাই দিছে।
আৰক্ষীয়ে মহেশৰ ওপৰত ভাৰতীয় দণ্ডবিধি আইনৰ ২৯৫ ধাৰা আৰু ২৯৫ এ ধাৰামতে এটা গোচৰ ৰুজু কৰিছে।
আৰক্ষীয়ে কয় যে, অভিযুক্ত মহেশে ব্যৱহাৰ কৰা কুঠাৰখনো উদ্ধাৰ কৰা হৈছে।
