শনিবাৰে গুৱাহাটী চিকিৎসা মহাবিদ্যালয় আৰু চিকিৎসালয়ত সম্বোধন কৰা এক সংবাদ মেলত ৰাজ্যৰ স্বাস্থ্য মন্ত্ৰী ডঃ হিমন্ত বিশ্ব শৰ্মাই ৰাজ্যৰ বৰ্তমান কোভিড পৰিস্থিতিৰ সম্পৰ্কে এক ছায়া চিত্ৰ দাঙি ধৰে।
মন্ত্ৰীগৰাকীয়ে কয় যে ৰাজ্যত কোভিড সংক্ৰমণ পূৰ্বৰ কিছুদিনতকৈ বৃদ্ধি পালেও ই নিয়ন্ত্ৰণাধীন হৈয়ে আছে।
ৰাজ্যৰ কোভিড আক্ৰান্তৰ হাৰ এতিয়াও ১ শতাংশ তলত বুলি উল্লেখ কৰি মন্ত্ৰীগৰাকীয়ে কয় যে যোৱা ১১ এপ্ৰিলৰ পৰা ১৬ তাৰিখলৈকে সংক্ৰমণৰ হাৰ মাত্ৰ ০.৮৮ শতাংশহে। ৰাজ্যত কোভিড টেষ্টৰ পৰিমাণ দৈনিক ৫০ হাজাৰৰ ওপৰলৈ বৃদ্ধি কৰা বুলিও সদৰী কৰিছে মন্ত্ৰী শৰ্মাই।
ইফালে ৰাজ্যৰ শিক্ষা বিভাগে জিলা উপায়ুক্তলৈ এক পত্ৰ প্ৰেৰণ কৰি যিসমূহ জিলাত দৈনিক ১০০ টাকৈ বা তাতোধিক কোভিড পজিটিভ লাভ কৰিব সেই জিলাৰ প্ৰাথমিক বিদ্যালয়সমূহ বন্ধ কৰাৰ নিৰ্দেশ দিয়া বুলিও উল্লেখ কৰিছে মন্ত্ৰীগৰাকীয়ে।
এই ক্ষেত্ৰত চৰকাৰীভাৱে কোনো নীতি নিৰ্দেশনা জাৰি কৰা নহয়, জিলা কৰ্তৃপক্ষই জিলাখনত দৈনিক ১০০ টাকৈ কোভিড পজিটিভ কেচ লাভ কৰাৰ লগে লগে প্ৰাথমিক বিদ্যালয়সমূহ বন্ধ কৰি দিব পাৰিব।
আনহাতে অসম চৰকাৰে ৰাজ্যখনৰ সমগ্ৰ জিলাসমূহত মাস্ক পৰিধান নকৰা যিকোনো ব্যক্তিৰ ওপৰত ১০০০ টকাৰ জৰিমনা আৰোপ কৰাৰ নিৰ্দেশও প্ৰদান কৰিছে।
স্বাস্থ্য মন্ত্ৰীগৰাকীৰ মতে ৰাজ্যখনৰ চিকিৎসালয়সমূহত কোভিড-১৯ ৰোগীৰ চিকিৎসাৰ বাবে ৰেমডেচিভিৰ বেজী পৰ্যাপ্ত পৰিমাণে আছে। কোভিড ৰোগীৰ বাবে আইচিইউ, ভেণ্টিলেশ্যনৰ বিচনাও পৰ্যাপ্ত পৰিমাণে মজুত আছে বুলি মন্ত্ৰীগৰাকীয়ে প্ৰকাশ কৰিছে।
তেওঁ লগতে কয় যে অসমত কোভিড সংক্ৰমণৰ গতি দেশৰ অন্য ৰাজ্যৰ তুলনাত তেনেই মন্থৰ।
ভাইৰাছবিধ যিহেতু খুব সোনকালে সংক্ৰমিত হয় সেয়ে ৰাজ্যৰ বাহিৰৰ পৰা অহা ঘৰৰ কোনো মানুহৰ সৈতে সম্পৰ্কলৈ অহাৰ পৰা বিৰত থাকিবলৈও ৰাজ্যবাসীক আহ্বান জনায় স্বাস্থ্যমন্ত্ৰীগৰাকীয়ে।
ইফালে যোৱা ২৪ ঘণ্টাৰ ভিতৰত ৰাজ্যত ৫৭৩ গৰাকী কোভিড পজিটিভ পোৱা গৈছে।
শুকুৰবাৰলৈকে ৰাজ্যখনত ২,২২,৯৪০ গৰাকী লোক কোভিড পজিটিভ বুলি উল্লেখ কৰি বৰ্তমান ৪,০৮৯ গৰাকী ৰোগীৰ শৰীৰত কোভিড এক্টিভ হৈ আছে বুলিও কয় মন্ত্ৰীগৰাকীয়ে।
উল্লেখ্য যে ৰাজ্যত কোভিড আক্ৰান্ত হৈ ১,১২৭ গৰাকী লোকৰ মৃত্যু হৈছে।
আনহাতে হাইস্কুল শিক্ষান্ত পৰীক্ষাৰ সন্দৰ্ভত নতুন চৰকাৰেহে সিদ্ধান্ত ল’ব বুলিও এক তাৎপৰ্যপূৰ্ণ মন্তব্য কৰিছে মন্ত্ৰীগৰাকীয়ে।
ৰাজ্যত লকডাউনৰ সম্ভাৱনাৰ কথাও অস্বীকাৰ কৰে মন্ত্ৰী হিমন্ত বিশ্ব শৰ্মাই। আনহাতে বিশাল সংখ্যক জনতা উপস্থিত থকা নিৰ্বাচনী সভাসমূহৰ বাবে ৰাজ্যত কোভিড সংক্ৰমণ বৃদ্ধি পোৱাৰ কোনো তথ্যা স্বাস্থ্য বিভাগে লাভ কৰা নাই বুলিও মন্তব্য কৰে মন্ত্ৰী শৰ্মাই।
