কেনে আছে কৰ’না আক্ৰান্ত প্ৰাক্তন প্ৰধানমন্ত্ৰী ড০ মনমোহন সিং? জনালে কেন্দ্ৰীয় স্বাস্থ্যমন্ত্ৰীয়ে

কৰ’না আক্ৰান্ত প্ৰাক্তন প্ৰধানমন্ত্ৰী ড০ মনমোহন সিঙৰ শাৰীৰিক অৱস্থা বৰ্তমান সুস্থিৰ আৰু বৰ্তমান কোনো চিন্তাৰ কাৰণ নাই।

দেশৰ প্ৰাক্তন প্ৰধানমন্ত্ৰীগৰাকীক শীঘ্ৰে সুস্থ কৰি তোলাৰ বাবে চিকিৎসকসকলে  সৰ্বাত্মক প্ৰচেষ্টা চলাইছে।

মঙলবাৰে এক টুইট কৰি এই কথা জানিবলৈ দিছে কেন্দ্ৰীয় স্বাস্থ্যমন্ত্ৰী ডাঃ হৰ্ষবৰ্দ্ধনে।

কোভিড ভেকচিনৰ দুয়োটা ড’জেই গ্ৰহণ কৰাৰ পাছতো মাৰাত্মক ভাইৰাছৰ দ্বাৰা আক্ৰান্ত হৈছে ড০ সিং। শৰীৰত একাধিক লক্ষণ দেখা দিয়াৰ পাছত সোমবাৰে তেওঁক দিল্লীৰ এইমছত ভৰ্তি কৰা হৈছিল।

প্ৰাক্তন প্ৰধানমন্ত্ৰীগৰাকীৰ চিকিৎসাৰ বাবে চিকিৎসকৰ এটা বিশেষ টীম গঠন কৰা হৈছে। প্ৰায় নব্বৈৰ বছৰৰ ওচৰ চপা ড০ সিঙৰ শাৰীৰিক অৱস্থাক লৈ চিকিৎসকল উদ্বিগ্ন হৈ পৰিছিল যদিও সদ্যহতে তেওঁৰ শাৰীৰিক অৱস্থা সুস্থিৰ বুলি কোৱা হৈছে।

ডাঃ হৰ্ষবৰ্দ্ধনে টুইট কৰি কয়,’’এইমছত যিসকল চিকিৎসকে ড০ মনমোহন সিঙক নিৰীক্ষণ কৰি আছে, তেওঁলোকে জানিবলৈ দিছে যে তেওঁৰ অৱস্থা বৰ্তমান সুস্থিৰ। তেওঁক সৰ্বোত্তম চিকিৎসা সেৱা আগবঢ়োৱা হৈছে। আমি সকলোৱে তেওঁৰ আশু আৰোগ্য কামনা কৰিছো।‘’

Followed up on Dr Manmohan Singh Ji’s health with the medical team attending to him at AIIMS, Delhi. His condition is stable.

Best possible care is being provided to him. We all pray for his quick recovery.

— Dr Harsh Vardhan (@drharshvardhan) April 20, 2021

উল্লেখ্য যে দেওবাৰে দেশৰ কৰ’না পৰিস্থিতিক লৈ নিজৰ উদ্বিগ্নতা প্ৰকাশ কৰি ড০ সিঙে প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখিছিল। পত্ৰখনত তেওঁ নিজৰ পৰা ৫টা প্ৰস্তাৱো দাঙি ধৰিছিল।

বাতৰি অনুসৰি, যোৱা ৮এপ্ৰিলতে তেওঁ কৰ’না ভেকচিনৰ দ্বিতীয়টো ড’জ লৈছিল। কিন্তু সোমবাৰে ১০দিনৰ ভিতৰতে তেওঁ কৰ’নাত আক্ৰান্ত হ’ল।

সোমবাৰে অসুস্থ হৈ পৰাত ৮৮বছৰীয়া প্ৰাক্তন প্ৰধানমন্ত্ৰীগৰাকীৰ কৰ’না পৰীক্ষা কৰা হয় আৰু তেওঁৰ ৰিপ’ৰ্ট পজিটিভ অহাত পৰিয়ালৰ সদস্যসকলে তেওঁক হাস্পাতলত ভৰ্তি কৰায়।

প্ৰাক্তন প্ৰধানমন্ত্ৰীগৰাকীৰ আৰোগ্য কামনা কৰি প্ৰধানমন্ত্ৰী নৰেন্দ্ৰ মোদী, কংগ্ৰেছ নেতা ৰাহুল গান্ধীকে ধৰি বিভিন্নজনে টুইট কৰিছে।