ভোট গণনাৰ অন্তত ১২৪ নং মাৰ্ঘেৰিটা বিধান সভা সমষ্টিত বিজেপি প্ৰাৰ্থী ভাস্কৰ শৰ্মাই নিকটতম প্ৰতিদ্বন্দ্বী ভাৰতীয় জাতীয় কংগ্ৰেছৰ প্ৰাৰ্থী মনোৰঞ্জন বৰগোহাঁইক ৫৮ হাজাৰৰো অধিক ভোটৰ ব্যৱধানত পৰাজিত কৰি দ্বিতীয়বাৰলৈ বিধান সভালৈ নিৰ্বাচিত হৈছে।
বিগত ২০১৬ ৰ বিধান সভাৰ সাধাৰণ নিৰ্বাচনত অসম চৰকাৰৰ প্ৰভাৱশালী মন্ত্ৰী তথা মাৰ্ঘেৰিটাৰ ১৭ বছৰীয়া জনপ্ৰতিনিধি প্ৰদ্যুৎ বৰদলৈক ২২,৭৪৪ টা ভোটৰ ব্যৱধানত পৰাস্ত কৰি প্ৰথমবাৰলৈ অসম বিধান সভালৈ নিৰ্বাচিত হৈছিল।
ৰাজনীতিৰ অ আ ক খ নজনা ভাস্কৰে তৰুণ গগৈ নেতৃত্বাধীন কংগ্ৰেছ চৰকাৰৰ কেইবাটাও গুৰুত্বপূৰ্ণ দপ্তৰ লাভ কৰি প্ৰভাৱ বিস্তাৰ কৰা প্ৰদ্যুতক পৰাজিত কৰাটো তেতিয়া ঐতিহাসিক ঘটনাৰূপেই বিবেচিত হৈছিল।
উল্লেখ্য যে প্ৰথমটো ৰাউণ্ডত ২৫৩ টা ভোটত অগ্ৰগতি লাভেৰে আৰম্ভ হোৱা ভোট গণনাৰ অষ্টাদশ ৰাউণ্ডলৈকে প্ৰতিটো ৰাউণ্ডতে বিজেপি প্ৰাৰ্থী ভাস্কৰে অগ্ৰগতিৰ ধাৰাবাহিকতা বজাই ৰাখি ৮৬,৬৩৩ টা ভোট লাভ কৰি বিজয় সাব্যস্ত কৰে।
নিকটতম প্ৰতিদ্বন্দ্বী কংগ্ৰেছৰ মনোৰঞ্জন বৰগোহাঁইক ৫৮ হাজাৰ ৫১৬ টা ভোটৰ ব্যৱধানত পৰাস্ত কৰে।
মনোৰঞ্জন বৰগোহাঁইয়ে লাভ কৰে ২৮,১১৭ টা ভোট। তৃতীয় স্থানত থকা অসম জাতীয় পৰিষদৰ প্ৰাৰ্থী সঞ্জয় কুমাৰ দেৱে ২২,৭৮৭ টা ভোট লাভ কৰাৰ বিপৰীতে তিনি নিৰ্দলীয় প্ৰাৰ্থী ক্ৰমে ইগনেছিয়াছ এক্কা, ভোগেশ্বৰ শ্যাম আৰু ৰণ্টু সোণোৱালে লাভ কৰে ক্ৰমে ১০,৩১৩ টা, ১,২৮২ টা আৰু ১,৪৪৫ টা ভোট। ন’টা ভোটৰ সংখ্যা ২,৫৬৩ টা।
