আৰক্ষীয়ে গ্ৰেপ্তাৰ কৰা বন্যপ্ৰাণী চোৰাং সৰবৰাহকাৰী প্ৰদীপ কুমাৰক দেওবাৰে এখন বিশেষ আদালতে চাৰিদিনৰ আৰক্ষী জিম্মালৈ প্ৰেৰণ কৰে।
গুৱাহাটীৰ দাঁতিকাষৰীয়া যোৰাবাটত ৩৭ টা বিৰল প্ৰজাতিৰ জন্তু তথা সৰীসৃপ জব্দ কৰা ঘটনাৰ লগত জড়িত থকাৰ অভিযোগত শনিবাৰে কুমাৰক আৰক্ষীয়ে গ্ৰেপ্তাৰ কৰিছিল।
আইজলৰ পৰা গুৱাহাটীলৈ বন্যপ্ৰাণীসমূহ কঢ়িয়াই অনা গাড়ীখনৰ চালকজনকো জিম্মাত ৰখা হৈছে। যোৰাবাটত কেৱল এটা আৰক্ষী চকীহে থকালৈ চাই গোচৰটো বশিষ্ঠ থানালৈ বদলি কৰা হৈছে।
কুমাৰ বন্যপ্ৰাণী সুৰক্ষা আইনৰ ৫১ নং ধাৰাৰ অধীনত গ্ৰেপ্তাৰ কৰা হৈছে।
তদন্তকাৰী বিষয়া জ্যোতি প্ৰসাদ সন্দিকৈয়ে কয়, ‘’ যোৰাবাট আৰক্ষী চকীৰ পৰা গোচৰটো বদলি কৰাৰ পিছত আমি অভিযুক্তগৰাকীৰ বিৰুদ্ধে বন্যপ্ৰাণী আইনৰ ৫১ ধাৰাৰ অধীনত এটা গোচৰ ৰুজু কৰিছো। আমি পৰৱৰ্তী তদন্ত আৰু কুমাৰক জেৰা কৰাৰ বাবে ১০ দিনৰ জিম্মাত বিচাৰিছিলো যদিও আদালতে চাৰিদিনৰহে অনুমতি দিয়ে। আমি বন বিভাগৰ পৰা উদ্ধাৰ হোৱা বন্যপ্ৰাণীৰ এক প্ৰতিবেদন বিচাৰিছো যিবোৰৰ বেছিভাগেই বিলুপ্তপ্ৰায় প্ৰজাতিৰ।‘’
সূত্ৰসমূহে কয় যে বিলুপ্তপ্ৰায় বন্যপ্ৰাণীসমূহক চিনাক্ত কৰিবই লগাব কিয়নো সেইবোৰ আইনৰ আওতাত নপৰে।
বিশেষজ্ঞসকলে জনোৱা মতে সেইবোৰ বিলুপ্তপ্ৰায় প্ৰজাতিৰ বন্যপ্ৰাণীৰ আন্তৰ্জাতিক ব্যৱসায়ৰ নিয়মত পৰে নে নপৰে সেয়া নিশ্চিত কৰিব লাগিব। যদি পৰে তেতিয়া আমদানি-ৰপ্তানি নীতিৰ অধীনত কিবা ব্যৱস্থা গ্ৰহণ কৰিব পৰা যাব।
বন্যপ্ৰাণী বিশেষজ্ঞ বিভৱ তালুকদাৰে কয় যে তাৎপৰ্যপূৰ্ণ কথাটো হ’ল তেওঁলোক ম্যানমাৰৰ পৰা আহিছিল আৰু উত্তৰ প্ৰদেশলৈ গৈ আছিল। ‘’ সংশ্লিষ্ট সংস্থাসমূহৰ দ্বাৰা এই দিশটোৰ পুংখানুপুংখ তদন্তৰ প্ৰয়োজন আছে,’’-তালুকদাৰে কয়।