বিগত কেইদিনমান ধৰি কৰ’না সংক্ৰমণৰ হাৰ নিম্নগামী হৈছিল যদিও বৃহস্পতিবাৰে সংক্ৰমণৰ সংখ্যা পুনৰ বৃদ্ধিৰ ঘটনাই উদ্বেগৰ সৃষ্টি কৰিছে।
যোৱা ২৪ ঘন্টাত দেশত কৰ’না সংক্ৰমণৰ ঘটনা বহুখিনি বৃদ্ধি পাইছে। তদুপৰি, কৰ’নাৰ পৰা আৰোগ্য লাভ কৰা ৰোগীৰ সংখ্যা পূৰ্বৰ দিনৰ তুলনাত হ্ৰাস পাইছে।
সেইদৰে কৰ’নাত মৃত্যুৰ সংখ্যা পূৰ্বৰ দিনটোৰ তুলনাত কিছু কমিলেও সেয়া মুঠেও স্বস্তিদায়ক নহয়।
বৃহস্পতিবাৰে কেন্দ্ৰীয় স্বাস্থ্য মন্ত্ৰ্যালয়ে প্ৰকাশ কৰা তথ্য অনুসৰি যোৱা ২৪ ঘণ্টাত দেশত মুঠ ক’ৰ’নাত আক্ৰান্ত হৈছে ৩ লাখ ৬২হাজাৰ ৭২৭ জন লোক।
সেইদৰে, বৰ্তমান দেশত মুঠ কৰ’না আক্ৰান্ত ৰোগীৰ সংখ্যা ২কোটি ৩৭লাখ ৩হাজাৰ ৬৬৫জনলৈ বৃদ্ধি পাইছে।
মন্ত্ৰ্যালয়ে প্ৰকাশ কৰা অনুসৰি দেশত মুঠ কৰ’না আক্ৰান্ত মৃত্যুৰ সংখ্যা হৈছেগৈ ২লাখ ৫৮ হাজাৰ ৩১৭ জন।
সেইদৰে যোৱা ২৪ ঘণ্টাত দেশত ৪ হাজাৰ ১২০ জন কোভিড আক্ৰান্তৰ মৃত্যু হৈছে।
ইপিনে, দেশত যোৱা ২৪ ঘন্টাত কৰ’নাৰ পৰা আৰোগ্য লাভ কৰিছে ৩লাখ ৫২হাজাৰ ১৮১ জন ৰোগীয়ে। সেইদৰে দেশত কৰ’নাৰ পৰা আৰোগ্য লাভ কৰা মুঠ ৰোগীৰ সংখ্যা হৈছে ১কোটি ৯৭লাখ ৩৫ হাজাৰ ৮২৩ জন লোক।
আনহাতে, বৰ্তমানেও দেশত চিকিৎসাধীন হৈ থকা কৰ’না ৰোগীৰ সংখ্যা হৈছে ৩৭লাখ ১০হাজাৰ ৫২৫জন।
বৰ্তমানলৈ দেশত ১৭কোটি ৭২ লাখ ১৪ হাজাৰ ২৫৬ জন লোকক কৰ’নাৰ ভেকচিন প্ৰদান কৰা হৈছে।
ইপিনে, কৰ’নাৰ দ্বিতীয়টো ঢৌৰ সন্ত্ৰাসৰ মাজতে বিশেষজ্ঞসকলে তৃতীয় ঢৌৰ আশংকা প্ৰকাশ কৰিছে। চলিত বছৰৰ মাজভাগতে দেশত তৃতীয় ঢৌ আহি পৰাৰ সম্ভাৱনাও ব্যক্ত কৰিছে।
