গোৱালপাৰা জিলাত পুনঃ বৃদ্ধি পাইছে কনটেইনমেন্ট জ’নৰ সংখ্যা৷ জিলাখনত ইতিমধ্যে নাৰেংগাবাৰী, বৰবৰী, ডুবাপাৰা আৰু পাখিৰীগুৰি, লালাৰড়ী অঞ্চলটোক কন্টেইনমেন্ট জ’ন হিচাপে ঘোষণা কৰাৰ পিছত পুনৰ আন এক অঞ্চলক কন্টেইনমেন্ট জ’ন ৰূপে ঘোষণা কৰিলে জিলা প্ৰশাসনে৷
জিলাখনত নতুনকৈ ঘোষিত কন্টেইনমেন্ট জ’নটো হৈছে কৃষ্ণাইৰ হস্তিনাপুৰ৷
কৃষ্ণাই আৰক্ষী থানাৰ অন্তৰ্গত পশ্চিম দায়ৰঙৰ হস্তিনাপুৰ গাঁওখনক কন্টেইনমেন্ট জ’ন হিচাপে ঘোষণা কৰি বুধবাৰে দণ্ডাধীশৰ উপস্থিতিত গাঁওঁখনত প্ৰৱেশ কৰা সকলো বাট পথ ছীল কৰি দিয়ে প্ৰশাসনে৷
উল্লেখ্য যে হস্তিনাপুৰ গাঁওখনৰ ৭০ টা পৰিয়ালৰ মুঠ ৩০ গৰাকী লোকৰ দেহত কৰোনা পজিটিভ ধৰা পৰাত জিলা প্ৰশাসনে ১২ মে’ তাৰিখে কন্টেইনমেন্ট জ’ন হিচাপে ঘোষণা কৰে এলেকাটোক৷
ইফালে গাঁওখনত কৰোনা ৰোগীৰ সংখ্যা আৰু বৃদ্ধি পোৱাৰ সম্ভাৱনা আছে৷ কাৰণ গাঁওখনৰ চুবুৰী এটাত এতিয়াও বহু লোক কৰোনা পৰীক্ষা কৰোৱা নাই বুলি স্থানীয় সূত্ৰত প্ৰকাশ৷
পৰিতাপৰ কথা এয়ে যে কৰোনা মহামাৰীৰ দ্বিতীয় লহৰত গ্ৰাম্যাঞ্চলৰ লোক অধিক হাৰত আক্ৰান্ত হৈছে যদিও গোৱালপাৰা জিলাৰ বহু সংখ্যক গাৱঁৰ লোক এই ক্ষেত্ৰত এতিয়াও সচেতন নহয়৷
যাৰ ফলত জিলাখনত দ্ৰুত গতিত বৃদ্ধি পাইছে কৰোনা পজিটিভ ৰোগীৰ সংখ্যা৷ জিলাখনত বৰ্তমানলৈ কৰোনা ৰোগীৰ সংখ্যা ৯২৩ গৰাকী৷ আনহাতে, ইতিমধ্যে জিলাখনত ১৮ গৰাকী লোকে প্ৰাণ হেৰুৱাইছে কৰোনা মহামাৰীত৷
