সমগ্ৰ দেশৰ লগতে অসমতো কোভিডে ভয়াবহ ৰূপ ধাৰণ কৰিছে। চহৰাঞ্চলৰ সমান্তৰালকৈ গ্ৰাম্যাঞ্চল তথা চাহ বাগিচা অঞ্চলটো ক্ৰমাৎ গণ সংক্ৰমণ বৃদ্ধি পাইছে।
বিশেষকৈ চাহ বাগিচা অঞ্চলত কভিডৰ সংক্ৰমণে সকলোকে আতংকিত কৰাৰ সময়তে যোৰহাট জিলাৰ টীয়কৰ কাকজান বাগিছা কৰ্তৃপক্ষই বাগিচাৰ চিকিৎসালয়তে কোভিড কেয়াৰ চেন্টাৰ স্থাপন কৰি এক আদৰ্শ প্ৰদৰ্শন কৰিছে।
এছিয়াৰ ভিতৰতে দ্বিতীয় সৰ্ববৃহৎ এই কাকজান বাগিচাত আছে পাঁচটাকৈ ডিভিজন, জনসংখ্যা প্ৰায় ১৩,০০০।
এইসকল বাগিচাৰ কৰ্মচাৰী তথা শ্ৰমিকৰ সুবিধাৰ্থে বাগিচাৰ কৰ্তৃপক্ষই চৰকাৰী সকলো কোভিড নীতি অৱলম্বন কৰি ২১ খন বিচনাযুক্ত এটা কোভিড ৱাৰ্ড গঠন কৰি ইতিমধ্যে পাঁচজনকৈ কোভিড ৰোগীক চোৱা চিতা কৰি আছে।
লগতে দুই এদিনৰ ভিতৰতে বাগিচাৰ সকলো শ্ৰমিক-কৰ্মচাৰীৰ কোভিড পৰীক্ষাৰ ব্যৱস্থা গ্ৰহণৰ দিহা কৰিছে বুলিও জানিবলৈ দিছে চিকিৎসাকৰ্মীয়ে।
ইপিনে ৰাইজৰ মাজত গৈ সজাগতা সৃষ্টিৰ অৰ্থে বিভিন্ন সময়ত প্ৰাৰম্ভিক কোভিড নীতি অৱগত কৰাৰ সমান্তৰালকৈ মাস্ক ছেনিটাইজাৰ আদিও প্ৰদান কৰিছে কৰ্তৃপক্ষই।
