কোভিডৰ সংক্ৰমণে দেশত ত্ৰাসৰ সৃষ্টি কৰাৰ সময়তে এতিয়া বিভিন্ন পক্ষৰ সমালোচনাৰ পাত্ৰ হৈ পৰিছে প্ৰধানমন্ত্ৰী নৰেন্দ্ৰ মোদী।
ক’ৰ’নাৰ সংক্ৰমণৰ বাবে চৰকাৰৰ কেতবোৰ ভুল নীতিয়েই দায়ী বুলি একাধিক উচ্চ ন্যায়ালয়ে মন্তব্য কৰিই অহাৰ সময়তে আজি মোদীলৈ এখন পত্ৰ প্ৰেৰণ কৰে দেশৰ ১১৬ গৰাকী অৱসৰপ্ৰাপ্ত প্ৰশাসনিক বিষয়াই।
পত্ৰ খনত প্ৰশাসনিক বিষয়া কেইগৰাকীয়ে স্পষ্ট ভাবে এই কথা উল্লেখ কৰিছে যে কোভিড ব্যৱস্থাপনাৰ ক্ষেত্ৰত মোদীৰ চৰকাৰে যেনেধৰণৰ ব্যৱস্থা গ্ৰহণ কৰিব লাগিছিল তেনে ব্যৱস্থা গ্ৰহণ কৰা হোৱা নাছিল।
ৰাজ্য সমূহক কোভিড নিয়ন্ত্ৰণৰ বাবে মোকলাই দিবলগীয়া পূঁজিও মোদীৰ চৰকাৰে সঠিক সময়ত মোকলাই দিয়া নাছিল বুলি পত্ৰ খনত অভিযোগ কৰা হৈছে।
কোভিড নিয়ন্ত্ৰণৰ ক্ষেত্ৰত মোদীৰ চৰকাৰে বিশেষজ্ঞ কমিটিৰ পৰামৰ্শ মুঠেও গ্ৰহণ নকৰা বুলি উল্লেখ কৰি প্ৰাক্তন প্ৰশাসনিক বিষয়াকেইগৰাকীয়ে লিখিছে যে ৰাজ্য সমূহৰ সৈতেও মোদীৰ চৰকাৰে কোভিডৰ ব্যৱস্থাপনাৰ বিষয়ত কোনো সমন্বয় ৰক্ষা কৰি চলা নাছিল বুলি পত্ৰ খনত মুকলিকৈয়ে অভিযোগ কৰা হৈছে।
পত্ৰখনত কোৱা হৈছে ‘আন্তঃৰাষ্ট্ৰীয় বিশেষজ্ঞ আৰু আমাৰ বিজ্ঞানীসকলে বাৰে বাৰে সতৰ্ক কৰি দিয়াৰ পিছতো, কোভিডৰ প্ৰথমটো ঢৌ শাম কটাৰ পিছত যিখিনি সময় পোৱা গৈছিল সেই সময় খিনিত চৰকাৰে স্বাস্থ্যকৰ্মী,চিকিৎসালয়ৰ বিচনা,অক্সিজেনৰ যোগান, ভেণ্টিলেটৰ , দৰৱ আদিৰ যোগান নিশ্চিত কৰাৰ ব্যৱস্থা হাতত ল’ব পাৰিব লাগিছিল’।
এনেবোৰ বিফলতাৰ বাবেই মোদীৰ আত্মনিৰ্ভৰ ভাৰতৰ শ্ল’গান চৰকাৰ খনৰ বাবেই বুমেৰাং হৈ পৰিছে। আত্মনিৰ্ভৰ ভাৰতৰ কথা কোৱা মোদীৰ চৰকাৰে এতিয়া বাহিৰৰ দেশৰ পৰা সহায় বিচাৰিবলগীয়া হৈছে।
২০২০ চনৰ মাৰ্চ মাহত দেশত কোভিডৰ প্ৰথম সংক্ৰমণ আৰম্ভ হোৱাৰ সময়ৰে পৰাই মোদীৰ চৰকাৰে ৰাজ্য সমূহক কোভিড নিয়ন্ত্ৰণৰ বাবে সঠিক ভাবে পূঁজিৰ যোগান ধৰাত ব্যৰ্থ হোৱাৰ বিষয়টোও পত্ৰ খনত উদঙাই দিয়া হৈছে।
PM-CARES fund ৰ বিষয়ে প্ৰশ্ন উত্থাপন কৰি পত্ৰ খনত লিখা হৈছে—’প্ৰধানমন্ত্ৰীৰ ৰাষ্ট্ৰীয় দুৰ্যোগ পূঁজি এটা থকাৰ পিছতো PM-CARES fund গঠন কৰা হ’ল। এই পূঁজিত কিমান ধন জমা হ’ল, কিমান খৰচ হ’ল তাৰ কোনো হিচাব আজিলৈকে নাই’।
মোদীক সমালোচনাৰে থকা-সৰকা কৰা পত্ৰ খনত স্বাক্ষৰ কৰিছে ক্ৰমে ভাৰতীয় প্ৰশাসনিক সেৱাৰ প্ৰাক্তন বিষয়া অনিতা অগ্নিহোত্ৰী, অশোক বাজপেয়ী,শিৱশংকৰ মেনন,অদিতি মেহতা,সুশীল ডুবে,নিতীন দেশাই,মীনা গুপ্তা,দীপা হৰি,অমিতাভ মাথুৰ আদি ব্যক্তিসকলে।
