সম্পূৰ্ণ অগণতান্ত্ৰিক প্ৰক্ৰিয়াৰে ক্ষমতা কাঢ়ি লোৱা ম্যানমাৰৰ সামৰিক শাসকৰ বিৰুদ্ধে ক্ৰমাৎ শক্তিশালী ৰূপত থিয় দিছে দেশ খনৰ নৃ-গোষ্ঠীয় বিদ্ৰোহী সংগঠন সমূহে।
সংবাদ প্ৰতিষ্ঠানে প্ৰকাশ কৰা মতে ম্যানমাৰ-চীন সীমান্তৰ জাদে নামৰ চহৰ খনত থকা এখন আৰক্ষী চকীত ভয়ংকৰ আক্ৰমণ সংঘটিত কৰে। আক্ৰমণটো ইমানেই ভয়াৱহ আছিল যে এখন আৰক্ষীৰ বাহন জ্বলন্ত অৱস্থাতে ওপৰলৈ চিটিকি পৰে।
শেহতীয়াকৈ প্ৰকাশ পোৱা আক্ৰমণৰ ভিডিঅ’টোত বহু কেইজন নিৰাপত্তৰক্ষীৰ মৃতদেহ পৰি থকা দেখা গৈছে। সেনাৰ বিৰুদ্ধে এই আক্ৰমণৰ ঘটনাটো সংঘটিত কৰিছে সেনা অভ্যুত্থানৰ পিছতে গঠন হোৱা পিপ’লছ ডিফেঞ্চ পোৰ্চ নামৰ বিদ্ৰোহী সংগঠনটোৱে।
জানিব পৰা মতে এই আক্ৰমণত ১৫ জন চৰকাৰী নিৰাপত্তাৰক্ষী নিহত হৈছে।
উল্লেখ্য ৰক্তাক্ত ম্যানমাৰলৈ আজিও উভতি অহা নাই শান্তি। প্ৰায় প্ৰতিদিনেই দেশ খনৰ সামৰিক শাসকে হত্যা কৰি গৈছে ইজনৰ পিছত সিজনকৈ লোক।
নিৰস্ত্ৰ প্ৰতিবাদকৰীৰ বিৰুদ্ধে জিঘাংসু আক্ৰমণ সংঘটিত কৰা ম্যানমাৰৰ সেনাৰ বিৰু্দ্ধে এইবাৰ সশস্ত্ৰ প্ৰতিৰোধ গঢ়ি তোলাৰ বাবে সাজু হৈছে দেশ খনৰ কেইবাটাও বিদ্ৰোহী সংগঠন।
সেইমৰ্মে বহু কেইটা বিদ্ৰোহী সংগঠনে সেনাক উৎখাত কৰাৰ বাবে সন্মিলিত ভাবে যুঁজ দিয়াৰ সংকল্প লৈছে।
ইতিমধ্যে দেশ খনৰ বহু ঠাইত ম্যানমাৰৰ সেনাৰ বিৰুদ্ধে বিদ্ৰোহী সংগঠনে ভয়ংকৰ আক্ৰমণো সংঘটিত কৰিছে।
ম্যানমাৰৰ বিদ্ৰোহী সংগঠন কাৰণে নেচনেল ইউনিয়নে সকলো বিদ্ৰোহ সংগঠনকে একত্ৰিত হৈ সেনৰ বিৰুদ্ধে যুঁজ দিয়াৰ আহ্বান জনাইছিল।
সংগঠনটোৰ নেতা জেনেৰেল বাও কেয়াওৱে বহু কেইটা বিদ্ৰোহী সংগঠনলৈ লিখা পত্ৰত এইবুলি উল্লেখ কৰিছিল যে বিগত ৭০ বছৰে এনে সুযোগ অহা নাছিল। এতিয়া সেনাৰ বিৰুদ্ধে ঐক্যবদ্ধভাবে যুঁজাৰ সময় আহি পৰিছে।
ম্যানমাৰত সেনাৰ অভ্যুত্থানৰ পাছত গণতন্ত্ৰকামী নাগৰিকৰ প্ৰতিবাদত গুলী চলাই তথা বিভিন্ন স্থানত অভিযান চলাই সাতশৰো অধিক লোকক হত্যা কৰা হৈছে।
বাতৰি অনুসৰি, বহু সংখ্যক লোকক গুলীয়াই নিহত কৰাৰ উপৰি এতিয়ালৈকে ৩হাজাৰ ১২জন লোকক কাৰাবন্দী কৰি ৰখা হৈছে।
তদুপৰি, ৬৫৬জন লোকৰ বিৰুদ্ধে গ্ৰেপ্তাৰী পৰোৱানা জাৰি কৰা হৈছে। এইসকলৰ ভিতৰত আছে দেশখনৰ ৰাজনীতিক, চেলিব্ৰেটি তথা সাধাৰণ নাগৰিক।
উল্লেখযোগ্য যে যোৱা নৱেম্বৰত অনুষ্ঠিত দেশখনৰ নিৰ্বাচনত প্ৰৱঞ্চনাৰ অভিযোগ তুলি ম্যানমাৰৰ সেনা বাহিনীয়ে যোৱা ১ ফেব্ৰুৱাৰীত ক্ষমতা দখল কৰে।
সেনাই দেশখনৰ ৰাষ্ট্ৰপতি উইন্ট মিন্ট তথা তদানীত্বন শাসকীয় দলৰ এন এল ডিৰ নেত্ৰী আং ছান ছ্যু কীকে ধৰি শীৰ্ষ ৰাজনৈতিক নেতাসকলক গ্ৰেপ্তাৰ কৰে।
