এগৰাকী শিক্ষকৰ যৌন আতিশয্যৰ প্ৰতিবাদত গুজৰি উঠিল বিদ্যালয়খনৰ ছাত্ৰ-ছাত্ৰীসকল।
পদ্ম সেসাদদ্ৰী বালা ভৱন স্কুল নামৰ চেন্নাইৰ এখন শীৰ্ষস্থানীয় বিদ্যালয়ত সংঘটিত হৈছে এই চাঞ্চল্যকৰ ঘটনা।
ছাত্ৰ-ছাত্ৰীসকলে শিক্ষকগৰাকীৰ ওপৰত যথাযোগ্য ব্যৱস্থা ল’বলৈ অনলাইন অভিযান আৰম্ভ কৰিছে।
ছাত্ৰ-ছাত্ৰীসকলে জনোৱামতে, লকডাউনৰ সময়ত অনলাইন ক্লাছত শিক্ষকজনে এখন টাৱেল পিন্ধি ক্লাছ লৈছিল।
তেওঁ ছাত্ৰীসকললৈ হোৱাটচাপযোগেও কামুকসুলভ বাৰ্তাও প্ৰেৰণ কৰিছিল।
তদুপৰি শিক্ষকজনে এগৰাকী ছাত্ৰীক চিনেমা চাবলৈও লগ ধৰাৰ কথা ছাত্ৰ-ছাত্ৰীসকলে জানিবলৈ দিছে।
ছাত্ৰ-ছাত্ৰীসকলে সামাজিক মাধ্যমযোগে অভিযোগ কৰে বিদ্যালয় কৰ্তৃপক্ষক শিক্ষকগৰাকীৰ যৌন আতিশয্যৰ বিষয়টো উত্থাপন কৰাৰ পাছতো কোনো ব্যৱস্থা লোৱা হোৱা নাই।
বিদ্যালয়খনৰ প্ৰাক্তন ছাত্ৰ-ছাত্ৰীসকলেও বিদ্যালয় কৰ্তৃপক্ষলৈ এখন বিজ্ঞপ্তি প্ৰেৰণ কৰিছে।
বিজ্ঞপ্তিখনত প্ৰকাশ কৰা মতে, একাউণ্টেন্সি এণ্ড বিজনেছ ষ্টাডিজৰ ৰাজাগোপালন নামৰ এই শিক্ষকজনে যোৱা ২০ বছৰ ধৰি এনেধৰণে বিদ্যালয়খনৰ ছাত্ৰীসকলৰ ওপৰত যৌন নিৰ্যাতন চলাই আহিছে।
তদুপৰি ভুক্তভোগী ছাত্ৰীসকলে তেওঁৰ বিৰুদ্ধে কিবা অভিযোগ উত্থাপন কৰিলে শিক্ষকজনে পৰীক্ষাৰ নম্বৰ কমাই দিয়াৰো ভাবুকি প্ৰদান কৰি আহিছে বুলি বিজ্ঞপ্তিখনত প্ৰকাশ কৰা হৈছে।
বিজ্ঞপ্তিখনত শিক্ষকজনৰ ওপৰত অনুসন্ধান চলাই নিলম্বণ জনাবলৈ বিদ্যালয়খনক দাবী জনোৱা হৈছে।
ৰাজ্যখনৰ শাসনাধিষ্ঠ দল ডিএমকেৰ সাংসদ কানিমঝীয়ে বিষয়টো সম্পৰ্কত ব্যৱস্থা লোৱা হ’ব বুলি জনাইছে।
আনহাতে, বিদ্যালয় কৰ্তৃপক্ষই জনাইছে শিক্ষকগৰাকীৰ বিৰুদ্ধে পূৰ্বতে এনেধৰণৰ অভিযোগ কৰ্তৃপক্ষই লাভ কৰা নাই।
অতি শীঘ্ৰে এনেধৰণৰ অভিযোগৰ ক্ষেত্ৰত ‘শূণ্য সহনশীল’ ব্যৱস্থা ল’ব বুলিও কৰ্তৃপক্ষই জনাইছে।
