কোভিড পৰিস্থিতিৰ ভয়াবহ পৰিস্থিতিৰ মাজতে সভ্য সমাজক লজ্জানত কৰি এজন লোকক ডাইনী সজাই হত্যা কৰাৰ ঘটনাই তামুলপুৰ মহকুমাৰ কুমাৰীকাটাত তীব্ৰ চাঞ্চল্যৰ সৃষ্টি কৰিছে।
ঘটনাৰ বিৱৰণীৰ মতে সোমবাৰে তামুলপুৰ থানাৰ অন্তৰ্গত কুমাৰীকাটা আৰক্ষী চকীৰ অধীনৰ ভাৰত-ভূটান সীমান্তৰ আংগাৰকাটাৰ বৈগ্ৰীবাৰী নামৰ গাঁওখনত অন্ধবিশ্বাসৰ বশৱৰ্তী হৈ ডাইনী সজাই গাঁওখনৰ ৰাইজে মৰিয়াই মৰিয়াই বীৰেন বড়ো নামৰ পঞ্চাশ বছৰীয়া লোক এজনক হত্যা কৰে।
কুমাৰীকাটা আৰক্ষী চকীৰ ভাৰপ্ৰাপ্ত বিষয়া নিলভজ্যোতি নাথে সংবাদ মাধ্যমৰ আগত প্ৰকাশ কৰা মতে আংগাৰকাটাৰ বৈগ্ৰীবাৰী গাঁওৰ ৰাইজে কোনো দুষ্ট বেজৰ কু-চক্ৰান্তত পাৰি গাঁওখনৰ বীৰেন বড়ো নামৰ লোকজনৰ বাবে গাঁওখনত অপায় অমংগলৰ ঘটনা সংঘটিত হৈ থকা বুলি বীৰেনক সন্দেহ কৰে।
এই সংক্ৰান্তত আজি দিনৰ ভাগত গাঁওখনত প্রায় দুই শতাধিক লোক সমবেত হৈ সভা পাতে। সভাত বীৰেন বড়োক মাতি আনি লাঠীৰে প্ৰহাৰ কৰি, চৰ-ঘোচা মাৰি, ভৰিৰে গুৰিয়াই তেওঁ এজন ডাইনী (ডাইনা) হয় বুলি সৈ কাঢ়িবলৈ কয় আৰু তেওঁৰ ওপৰত ভীষণ শাৰীৰিক অত্যাচাৰ চলায়।
এই ঘটনা সন্দৰ্ভত কোনো সচেতন ব্যক্তিয়ে কুমাৰীকাটা আৰক্ষীক খবৰ দিয়াত কুমাৰীকাটা আৰক্ষী চকীৰ ভাৰপ্ৰাপ্ত বিষয়া নিলভজ্যোতি নাথৰ নেতৃত্বত এটি আৰক্ষীৰ দল ঘটনাস্থলীত উপস্থিত হয় আৰু আৰক্ষীয়ে ৰাইজৰ কবলৰ পৰা বীৰেনক উদ্ধাৰ কৰাৰ চেষ্টা চলায়।
আৰক্ষীয়ে বীৰেনক উদ্ধাৰ কৰিবলৈ যোৱাত গাঁওখনৰ ৰাইজ আৰক্ষীৰ বিৰুদ্ধে উগ্ৰ মূৰ্তি ধাৰণ কৰে আৰু আৰক্ষীৰ সন্মুখতে বীৰেনক মাৰধৰ অব্যাহত ৰাখে। উন্মত্ত জনতাৰ আক্ৰমণত কুমাৰীকাটা আৰক্ষী চকীৰ ভাৰপ্ৰাপ্ত বিষয়াগৰাকীও আহত হয়।
আৰক্ষীয়ে মুমূৰ্ষ অৱস্থাত বীৰেনক আৰক্ষীৰ গাড়ীত উঠোৱাত স্থানীয় উন্মত্ত ৰাইজে আৰক্ষীৰ গাড়ীত আক্ৰমণ কৰি গাড়ীখনৰ বিস্তৰ ক্ষতি সাধন কৰে। আৰক্ষীয়ে বীৰেন বড়োক সংকটজনক অৱস্থাত কুমাৰীকাটা ৰাজ্যিক চিকিৎসালয়ত ভৰ্তি কৰায় যদিও চিকিৎসাধীন অৱস্থাত বীৰেন বড়োৰ মৃত্যু হয়।
ইফালে উন্মত্ত ৰাইজে বীৰেন বড়োৰ ঘৰ দুৱাৰো ভাঙি লণ্ড ভণ্ড কৰে। বীৰেন বড়োৰ পৰিয়ালৰ আন সদস্যসকলে কথমপি প্ৰাণ ৰক্ষা কৰিবলৈ সক্ষম হয়।
ঘটনাৰ খবৰ পাই তামুলপুৰ মহকুমা আৰক্ষী বিষয়া অসীমা কলিতা, তামুলপুৰ চক্ৰৰ চক্ৰ বিষয়া তথা দণ্ডাধীশ ৰূপকমল ৰাভা, তামুলপুৰ আৰক্ষী থানাৰ ভাৰপ্ৰাপ্ত বিষয়া দ্বীপেন কলিতা, কুমাৰীকাটা আৰক্ষী চকীৰ ভাৰপ্ৰাপ্ত বিষয়া নিলভজ্যোতি নাথসহ আৰক্ষীৰ এটি বিশাল দল ঘটনাস্থলীত উপস্থিত হয়।
ঘটনাস্থলীত উপস্থিত ৰাইজে কোভিডৰ নীতি নিয়ম উলংঘা কৰি কিয় সভা পাতি আইন নিজৰ হাতত লৈছে বুলি আৰক্ষীয়ে প্ৰশ্ন কৰাত গাঁওবাসীয়ে আৰক্ষীৰ লগত তৰ্ক বিতৰ্কত লিপ্ত হয়।
উন্মত্ত জনতাই আৰক্ষীৰ লোকক পুনৰ আক্ৰমণৰ বাবে উদ্যত হোৱাত আৰক্ষীয়ে উন্মত্ত জনতাক ছত্ৰভংগ দিয়াবলৈ গাঁওবাসীৰ ওপৰত লাঠীচালনা কৰে আৰু হত্যাকাণ্ডৰ লগত জড়িত থকাৰ সন্দেহত আৰু আৰক্ষীক আক্ৰমণ কৰাৰ অপৰাধত পাঁচজন লোকক আটক কৰি কুমাৰীকাটা আৰক্ষী চকীলৈ লৈ আনে।
আটকাধীন লোক কেইজন হৈছে গাঁওখনৰেই লক্ষীন্দ্ৰ বড়ো (৩২), চোনছ নাৰ্জাৰী (২১), বীৰখাং বসুমতাৰী (২৩), ৰিংখাং বসুমতাৰী (২১), ৰাজেন নাৰ্জাৰী (৪৭)।
ইফালে ঘটনাৰ খবৰ পাই তামুলপুৰ মহকুমাৰ মহাকুমাধিপতি ডাঃ বেদাংগ তালুকদাৰ কুমাৰীকাটাত উপস্থিত হৈ ঘটনাৰ বুজ লয়। ঘটনা সন্দৰ্ভত তামুলপুৰ আৰক্ষী থানাত এটি গোচৰ ৰুজু কৰা হৈছে আৰু ঘটনাৰ তদন্ত অব্যাহত ৰাখিছে।
ঘটনাৰ লগত জড়িত আৰু অধিক লোকক আৰক্ষীয়ে আটক কৰিব পাৰে। ইপিনে কুমাৰীকাটা ৰাজ্যিক চিকিৎসালয়ৰ পৰা বীৰেন বড়োৰ মৃতদেহ কুমাৰীকাটা আৰক্ষী চকীলৈ নিয়া হৈছে। কাইলৈ মৃতদেহ মাৰণোত্তৰ পৰীক্ষাৰ বাবে বাক্সা জিলা সদৰ মুছলপুৰলৈ পঠোৱা হ’ব।
