ৰাজনীতিত বৈৰী, বন্ধু বুলি কোনো কথা নাই। জনতাক মোহাচ্ছন্ন কৰি ৰাখি ক্ষমতাৰ বাঘজৰী হাতত লোৱাটোৱেই হৈছে চতুৰ ৰাজনীতিকৰ লক্ষ্য। অসমতো ৰাজনীতিৰ নতুন পৰিভাষাই পৰম্পৰাগত ধাৰাক ‘অচল টকা’ কৰি তুলিছে।
বৰ্তমানৰ মুখ্যমন্ত্ৰী ড০হিমন্ত বিশ্ব শৰ্মাই অগপৰ কাৰ্যালয়তো এদিন বিবাহ ভৱনলৈ পৰিণত হ’ব বুলি ভৱিষ্যদ্বাণী কৰিছিল।
সেইদৰে অগপৰ নেতাসকলেও এসময়ত নেতাগৰাকীক আঞ্চলিক-জাতীয়তাবাদ বিৰোধী নেতা হিচাপে অভিহিত কৰি আহিছিল। কিন্তু সময় পৰিৱৰ্তন হৈছে, সন্মুখত ‘সমাগত সময়’।
সোমবাৰে চৰকাৰৰ মিত্ৰদল অসম গণ পৰিষদৰ আমবাৰীস্থ মুখ্য কাৰ্য্যালয়ত উপস্থিত হৈ দলটোৰ বিষয়ববীয়া আৰু সদস্যসকলৰে মতবিনিময় কৰে মুখ্যমন্ত্ৰী ড০ হিমন্ত বিশ্ব শৰ্মাই।
অসম বিধান সভাৰ পৰা পোনে পোনে অসম গণ পৰিষদৰ কাৰ্য্যালয়ত উপস্থিত হোৱা মুখ্যমন্ত্ৰী গৰাকীক দলটোৰ নেতৃত্বৰ লগতে বিভিন্ন স্তৰৰ বিষয়ববীয়া আৰু সদস্যসকলে বিপুল বাৱে আদৰণি জনায়।
দলৰ সভাপতি তথা মন্ত্ৰী অতুল বৰা, কাৰ্য্যকৰী সভাপতি তথা মন্ত্ৰী কেশৱ মহন্ত, জ্যেষ্ঠ নেতা ফণীভূষণ চৌধুৰী, সাধাৰণ সম্পাদক বীৰেন্দ্ৰ প্ৰসাদ বৈশ্য, ৰমেন্দ্ৰ নাৰায়ণ কলিতা, ডাঃ কমলাকান্ত কলিতা, নুৰুল হুছেইন, হিৰণ্য কুমাৰ কোৱঁৰ, প্ৰবীন হাজৰিকা, ভূপেন ৰায়, মনোজ শইকীয়া, সত্যব্ৰত কলিতা, পোণাকন বৰুৱা, বিধায়কসকল, সম্পাদক প্ৰচাৰ ড০ তপন দাস, সম্পাদক তথ্য প্ৰযুক্তি মণি মাধৱ মহন্ত আদি উপস্থিত থাকে।
সভাপতি অতুল বৰাই মুখ্যমন্ত্ৰীৰ উপস্থিতিয়ে মিত্ৰতাৰ ৰাজনীতিৰ বিশ্বাসযোগ্যতাক অধিক দৃঢ় কৰিলে বুলি মতপোষণ কৰে। বৰাই কয় যে, দলে মুখ্যমন্ত্ৰীক ৰাজ্যখনৰ স্বাৰ্থত সকলোধৰণৰ সহায়ৰ অংগীকাৰ প্ৰকাশ কৰে।
কাৰ্য্যকৰী সভাপতি তথা মন্ত্ৰী কেশৱ মহন্তই বিশ বছৰৰ পাছত এগৰাকী মুখ্যমন্ত্ৰীয়ে দলৰ কাৰ্য্যালয়ত উপস্থিত হোৱা কাৰ্য্যই জাতীয় জীৱনৰ বাবে অৰ্থৱহ বুলি মন্তব্য কৰিছে।
মুখ্যমন্ত্ৰী ড০ হিমন্ত বিশ্ব শৰ্মাই ঐক্যবদ্ধ ভাৱে ৰাজ্যখনৰ স্বাৰ্থত আত্মনিয়োগ কৰাত গুৰুত্ব আৰোপ কৰে। দলীয় দৃষ্টিকোণ সুকীয়া হ’লেও অসমৰ স্বাৰ্থত আমি ঐক্যবদ্ধ বুলি মুখ্যমন্ত্ৰী শৰ্মাই দৃঢ়মত পোষণ কৰে।
