আনন্দ উল্লাসৰ মাজতে বিয়াৰ অনুষ্ঠান আৰম্ভ হৈ গৈছে, কেৱল মাল্যদান পৰ্বৰ বাবে দৰাঘৰীয়া কইনাঘৰীয়া সকলো অপেক্ষা কৰি আছে।
ঠিক সেই সময়তে হঠাৎ অসুস্থ হৈ পৰে কইনা।
কিছু মুহূৰ্তৰ পাছতে মৃত্যুও হ’ল কইনাগৰাকী।
কইনাৰ মৃত্যুৰ পাছত কইনাৰ ভণীয়েকক বিয়া কৰাবলগা হয় দৰাই।
শোকাৱহ ঘটনাটো সংঘটিত হৈছে উত্তৰপ্ৰদেশৰ এটাৱাহ জিলাৰ চমচপুৰ গাঁৱত।
গাঁওখনৰ সুৰভী নামৰ যুৱতীগৰাকীৰ বিয়া হৈছিল নিকটৱৰ্তী নাওলি গাঁৱৰ মংগেশ কুমাৰৰ স’তে।
কিন্তু মাল্যবৰণৰ সময়তে অসুস্থ হৈ পৰে সুৰভী।
লগে লগে সুৰভীক হস্পিতাললৈ লৈ যোৱা হয়।
কিন্তু চিকিৎসকসকলে সুৰভীৰ হৃদৰোগত আক্ৰান্ত হৈ মৃত্যু হোৱা বুলি ঘোষণা কৰে।
বিয়াৰ আনন্দ উল্লাস পৰ্যবসিত হয় শোকাকূল পৰিৱেশলৈ।
শোকাকূল পৰিৱেশৰ মাজতে দৰা মংগেশে প্ৰস্তাৱ দিয়ে যে বিবাহানুষ্ঠান ভংগ নকৰি সুৰভীৰ ভণী নিশাকে বিয়া কৰিবলৈ বিচাৰে তেওঁ।
লগে লগে কইনাপক্ষ সেই প্ৰস্তাৱত ৰাজী হৈ যায়।
যেতিয়া ঘৰখনৰ এগৰাকী জীয়ৰীৰ বিবাহ হৈ আছিল, আন এগৰাকী জীয়ৰীৰ মৃতদেহ আন এটা ঘৰত থোৱা আছিল।
কইনা বিদায়ৰ পাছতে সুৰভীৰ শেষকৃত্য সম্পন্ন কৰে পৰিয়ালটোৱে।
