বঙাইগাঁও জিলাত দেওবাৰে পুনৰ নতুনকৈ ৩০ জন ব্যক্তি ক’ভিড – ১৯ ত আক্ৰান্ত হৈছে ৷ আনহাতে মৃত্যু হৈছে এজন ব্যক্তিৰ ৷ মৃত ব্যক্তিজন জিলাখনৰ পাতিলাদহা কুশলাইগুৰিৰ মহানন্দ সৰকাৰ(৮০)।
ব্যক্তিজনৰ বঙাইগাঁও ল’ৱাৰ আসাম হাস্পতালত চিকিৎসাধীন অৱস্থাত মৃত্যু হয় ৷
ইপিনে জিলাখনত দেওবাৰে নতুনকৈ ৩০ জন ব্যক্তিৰ দেহত ক’ভিড প’জিটিভ ধৰা পৰাত বৰ্তমান ক’ভিডত আক্ৰান্ত সক্ৰিয় ৰোগীৰ সংখ্যা ৩০২ জন হৈছে ৷
ইয়াৰ ভিতৰত ২১১ জন ইনষ্টিটিউচনেল কোৱাৰেণ্টাইনত আৰু ৯১ জন ব্যক্তি হোম কোৱাৰেণ্টাইনত আছে ৷
সেইদৰে দেওবাৰৰ দিনটোত সুস্থ হৈ উঠিছে ১৮ জনকৈ ৰোগী ৷ যিটো ভাল খবৰ ৷ জিলাখনত দেওবাৰে মুঠ ১,৮৬৯ জন ব্যক্তিক ক’ভিড টেষ্ট কৰা হয় ৷
আনহাতে জিলাখনত ১ মাৰ্চৰ পৰা ৩০ মে’লৈ মুঠ ক’ভিডত আক্ৰান্ত ৰোগীৰ সংখ্যা বৃদ্ধি পাই ২,৭৩৯ জন হৈছে ৷
উল্লেখ্য যে শুকুৰবাৰে বঙাইগাঁও চহৰৰ জ্যোতি নগৰ ১৩ নং ৱাৰ্ডৰ ঊষাৰাণী সাহা ৰায়( ৭০) নামৰ মহিলা এগৰাকীৰ ক’ভিডত মৃত্যু হৈছিল ৷ মহিলাগৰাকীৰ ব্যক্তিগত খণ্ডৰ স্বাগত হাস্পতালত চিকিৎসাধীন অৱস্থাত মৃত্যু হৈছিল ৷
আনহাতে শনিবাৰে মাণিকপুৰ পালেংবাৰী মোনাকোচাৰ ৰতিকান্ত ৰায়( ৬০) নামৰ ব্যক্তিজনৰ ল’ৱাৰ আসাম হাস্পতালত চিকিৎসাধীন অৱস্থাত মৃত্যু হৈছিল৷
জিলাখনত ক’ভিডত আক্ৰান্তৰ সংখ্যা হ্ৰাস পাবলৈ ধৰিছে যদিও দৈনিক ক’ভিড আক্ৰান্ত ৰোগীৰ মৃত্যু হৈ আছে ৷
