কোভিড-১৯ত আক্ৰান্ত হৈ আজি পৰলোকপ্ৰাপ্তি ঘটা অসমীয়া সাহিত্য জগতৰ মহীৰূহ, অসম সাহিত্যসভাৰ প্ৰাক্তন সভাপতি, সাহিত্য একাডেমী বিজয়ী, পদ্মশ্ৰী ড০ লক্ষ্মীনন্দন বৰাৰ বিয়োগত ৰাজ্যখনৰ বিভিন্ন দল-সংগঠন,ব্যক্তি তথা অনুষ্ঠানে গভীৰ শোক প্ৰকাশ কৰিছে।
বিশিষ্ট সাহিত্যিকগৰাকীৰ মৃত্যুত গভীৰ শোক প্ৰকাশ কৰি মুখ্যমন্ত্ৰী ড০ হিমন্ত বিশ্ব শৰ্মাই কয়, ‘’অপূৰ্ব কথনশৈলীৰে জনজীৱনক গভীৰভাবে চুই যোৱা বিৰল প্ৰতিভাধৰ সাহিত্যিক লক্ষ্মীনন্দন বৰাদেৱৰ পৰলোকপ্ৰাপ্তিত ৰাজ্যৰ সাহিত্য জগতৰ এক বৰ্ণিল অধ্যায়ৰ পৰিসমাপ্তি ঘটিল। প্ৰয়াত সাহিত্যিকগৰাকীৰ বিদেহ আত্মাৰ চিৰশান্তি কামনা কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জনাইছোঁ।‘’
আনহাতে, ড০ বৰাৰ বিয়োগত প্ৰাক্তন মুখ্যমন্ত্ৰী সৰ্বনন্দ সোণোৱালেও শোক প্ৰকাশ কৰিছে। এক শোকবাৰ্তাত সোণোৱালে কয়, ‘’বিশিষ্ট সাহিত্যিক, শিক্ষাবিদ তথা অসম সাহিত্য সভাৰ প্ৰাক্তন সভাপতি লক্ষ্মীনন্দন বৰাদেৱৰ বিয়োগত মৰ্মাহত হৈছোঁ। তেখেতৰ অনন্য সাহিত্যকৰ্মত সাৱলীলভাৱে প্ৰতিফলিত হৈছিল অসমৰ জনজীৱনৰ বিভিন্ন দিশ। তেখেতৰ বিয়োগ আমাৰ জাতীয় জীৱনৰ লগতে সাহিত্য জগতৰ বাবে এক অপূৰণীয় ক্ষতি। বৰাদেৱৰ শোকস্তব্ধ পৰিয়াল তথা অজস্ৰ গুণমুগ্ধলৈ মোৰ গভীৰ সমবেদনা জ্ঞাপন কৰাৰ লগতে তেখেতৰ বিদেহ্ আত্মাৰ চিৰশান্তি কামনা কৰিছোঁ।‘’
অন্য এক মহীৰূহৰ মহাপ্ৰয়াণ! বুলি উল্লেখ কৰি অসম জাতীয় পৰিষদৰ সভাপতি লুৰিণজ্যোতি গগৈয়ে কয়, ‘’অসমীয়া ভাষা-সাহিত্যক অনন্য সম্ভাৰেৰে সমৃদ্ধিশালী কৰি, মহাপুৰুষ গুৰুদুজনাৰ জীৱনী উপন্যাস ৰচনা কৰাৰ লগতে ‘কায়কল্প’ৰ দৰে বিজ্ঞানভিত্তিক উপন্যাসেৰে সৰস্বতী সন্মানৰ অধিকাৰী, ‘অসম সাহিত্য সভা’ৰ প্ৰাক্তন সভাপতি,’গৰীয়সী’ ৰ সম্পাদক লক্ষ্মীনন্দন বৰাদেৱৰ বিয়োগে আমাক শোকাহত কৰিছে। তেখেতৰ বিয়োগে অসমীয়া ভাষা-সাহিত্যৰ ভঁৰালত এক শূণ্যতা সৃষ্টি কৰাৰ উপৰি অসমৰ জাতীয়তাবাদী চিন্তা-চৰ্চাৰ ক্ষেত্রতো এক বৃহৎ ক্ষতি সাধন কৰিলে। সদ্যবিদায়ী লক্ষ্মীনন্দন বৰাদেৱৰ বিদেহ আত্মাৰ বৈকুণ্ঠপ্ৰাপ্তি কামনা কৰাৰ লগতে শোকদগ্ধ পৰিয়ালবৰ্গলৈ গভীৰ সমবেদনা জ্ঞাপন কৰিছো।‘’
অসম সাহিত্য সভাৰ প্ৰাক্তন সভাপতি, বিশিষ্ট শিক্ষাবিদ, অসমৰ সাহিত্য-সংস্কৃতিৰ জগতৰ এক ধ্ৰুৱতৰা সৰস্বতী ড০ লক্ষ্মীনন্দন বৰাৰ পৰলোক প্ৰাপ্তিত অসম সত্ৰ মহাসভাই গভীৰ শোক প্ৰকাশ কৰিছে।
এক শোকবাৰ্তাত অসম সত্ৰ মহাসভাৰ প্ৰধান সম্পাদক কুসুম কুমাৰ মহন্তই কয় যে অসম সত্ৰ মহাসভাই এজন আজীৱন সদস্য তথা নিষ্ঠাবান সত্ৰপ্ৰেমিক হেৰুৱালে।
স্বনামধন্য ড০ বৰাদেৱৰ বিয়োগত অসমীয়া সমাজৰ বিস্তৰ ক্ষতি সাধন হ’ল বুলি উল্লেখ কৰাৰ লগতে অসম সত্ৰ মহাসভাই তেখেতৰ আত্মাৰ সদগতিৰ বাবে ঈশ্বৰৰ ওচৰত প্ৰাৰ্থনা জনাই আৰু শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে।
অসম সাহিত্য সভাৰ প্ৰাক্তন সভাপতি, বিশিষ্ট সাহিত্যিক ড০ লক্ষীনন্দন বৰাৰ মৃত্যুত সমগ্ৰ অসমত শোকৰ ছাঁ পৰিছে। লক্ষীনন্দন বৰাৰ মৃত্যুত অসম কবি সন্মিলনৰ প্ৰাক্তন সভাপতি তথা বিশিষ্ট কবি, সাহিত্যিক, বুৰঞ্জীবিদ প্ৰেম গগৈয়েও শোক প্ৰকাশ কৰে।
ইতিমধ্যে ৰাজ্যখনৰ বৌদ্ধিক সমাজৰ লগতে বিভিন্ন শ্ৰেণীৰ ব্যক্তি, দল-সংগঠন, অনুষ্ঠান-প্ৰতিষ্ঠানে বিশিষ্ট সাহিত্যিক গৰাকীৰ বিয়োগত শোক প্ৰকাশ কৰি শ্ৰদ্ধাঞ্জলি জ্ঞাপন কৰিছে।
