অতি শীঘ্ৰে ১০খন আই চি ইউ বিচনাসহ ১০০ খন বিচনা সংযুক্ত হ’ব মাৰ্ঘেৰিটা অসামৰিক চিকিৎসালয়ত। এই আশ্বাস তিনিচুকীয়া জিলাৰ নৱনিযুক্ত উপায়ুক্ত পাৱাৰ নৰসিং শম্ভাজীৰ।
দেওবাৰে মাৰ্ঘেৰিটা মহকুমাধিপতি কাৰ্যালয় সভাকক্ষত মাৰ্ঘেৰিটা মহকুমাৰ সাংবাদিকসকলৰ উপস্থিতিত তিনিচুকীয়া জিলাৰ নৱনিযুক্ত উপায়ুক্তৰে অনুষ্ঠিত সৌজন্যমূলক সাক্ষাৎ তথা আলোচনাত মাৰ্ঘেৰিটা সাংবাদিক সংস্থাৰ হৈ মুখপাত্ৰ মানস প্ৰতিম গগৈয়ে কৰা অনুৰোধৰ প্ৰত্যুত্তৰত তিনিচুকীয়া জিলাৰ নৱনিযুক্ত উপায়ুক্তগৰাকীয়ে এই কথা জনায়।
তদুপৰি, খুব সোনকালে ব্লাড বেংকৰ ব্যৱস্থা কৰাৰ কথাও সদৰী কৰে উপায়ুক্ত গৰাকীয়ে। এনে পদক্ষেপৰ বাবে মাৰ্ঘেৰিটা সাংবাদিক সংস্থাৰ হৈ জিলা উপায়ুক্তগৰাকীক ধন্যবাদ জনোৱা হয়।
আনহাতে, তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজোতি নেওগ মাৰ্ঘেৰিটা সাংবাদিক সংস্থাৰ সভাপতি ৰামপ্ৰসাদ আম্বেদকাৰে দুয়োটা অনুষ্ঠানৰ মুখপত্ৰ জিলা উপায়ুক্ত পাৱাৰ নৰসিং শম্ভাজী আৰু নৱনিযুক্ত মহকুমাধিপতি পলাশ ৰাজকুমাৰ আহোমক উপহাৰ হিচাপে আগবঢ়ায় ।
উল্লেখ্য যে মাৰ্ঘেৰিটা সাংবাদিক সংস্থাই দ্বিতীয়বাৰলৈ বিধায়ক হিচাপে নিৰ্বাচিত ভাস্কৰ শৰ্মাক এখন স্মাৰক পত্ৰৰ জড়িয়তে মাৰ্ঘেৰিটা অসামৰিক চিকিৎসালয়খন ৩০০ খন বিচনাযুক্ত কৰা, ব্লাড বেংকৰ ব্যৱস্থা, অক্সিজেন বেংক স্থাপনকে ধৰি কেইবাটাও দাবী উত্থাপন কৰা হৈছিল ।
সৌহাৰ্দ্যমূলক আলোচনাত জিলা উপায়ুক্তৰ লগতে অতিৰিক্ত উপায়ুক্ত দিপু ডেকা মহকুমাধিপতি পলাশ ৰাজকুমাৰ আহোম, মহকুমা জনসম্পৰ্কৰক্ষী বিষয়া গুৰমিত সিং কৌৰ, নিৰ্বাচনী বিষয়া ত্ৰিদীপ কোঁৱৰ আদি উপস্থিত থাকে।
জিলা উপায়ুক্ত গৰাকীয়ে মহকুমাটো প্ৰাকৃতিক সম্পদৰে চহকী হোৱাৰ পাছতো যিধৰণে আন্তঃগাঁথনিৰ উন্নতি হ’ব লাগিছিল সেইধৰণে উন্নতি হোৱা নাই বুলি প্ৰকাশ কৰি পৰ্যায়ক্ৰমে সমস্যাসমূহ সমাধান কৰা হ’ব বুলি কয়।
তেওঁ তিনিচুকীয়া জিলাৰ ক’ভিড পৰিস্থিতিৰ বিৰুদ্ধে জিলা প্ৰশাসনে কিদৰে যুদ্ধ দিছে তাৰ বাখ্যা দাঙি ধৰি ক্ৰমাৎ জিলাৰ পৰিস্থিতি উন্নতি হোৱাৰ কথা সদৰী কৰাৰ লগতে ৰাইজৰ সজাগতাৰ বাবে সংবাদমাধ্যমে বলিষ্ঠ ভূমিকা লোৱাৰ বাবে আহ্বান জনায়।
উপায়ুক্তগৰাকীয়ে লগতে ৰাইজৰ সচেতনতাই ক’ভিডবিৰোধী যুঁজখনৰ সফলতাত মুখ্য ভূমিকা ল’ব বুলি কয়। উপায়ুক্ত গৰাকীয়ে জিলাখনত ক’ভিড আক্ৰান্তৰ মৃত্যুৰ হাৰ ক্ৰমাৎ হ্ৰাস পাইছে বুলি জানিবলৈ দিয়ে। তেওঁ ক’ভিড আক্ৰান্তই ঘৰত হোম আইছ’লেশ্যনত থকাতকৈ চৰকাৰী আইছ’লেশ্যনত থকাটো বেছি সুৰক্ষিত বুলি কয়।
তেওঁ প্ৰকাশ কৰা মতে জিলাখনত অক্সিজেন চিলিণ্ডাৰ পৰ্যাপ্ত আছে। ক’ভিড প্ৰটক’ল ৰক্ষা নকৰা সকলৰ বিৰুদ্ধে অধিক সক্ৰিয় হোৱাৰ বাবে আৰক্ষী প্ৰশাসনক নিৰ্দেশ দিয়া হ’ব বুলি কয়।
উপায়ুক্তগৰাকীয়ে মাৰ্ঘেৰিটাৰ মহকুমা আৰক্ষী বিষয়া বা তেওঁক ক’ভিড সম্পৰ্কীয় যিকোনো বিষয় অৱগত কৰিব পাৰিব বুলি কয়। তেওঁ লগতে বানপানী আৰু গৰাখহনীয়া সমস্যাৰ বিষয়তো আলোকপাত কৰে।
