হাজোত ৬৫টাকৈ ড্ৰাগছ ভৰ্তি কণ্টেইনাৰ সহ আৰক্ষীৰ জালত পৰিছে ম’ষ্ট ৱান্টেড কুখ্যাত ড্ৰাগছ মাফিয়া ৰাজু আলী।
হাজো আৰক্ষী থানাৰ ভাৰপ্ৰাপ্ত আৰক্ষী বিষয়া বাবুল কুমাৰ মেধীৰ নেতৃত্বত হাজোৰ দলৈটোলাত ড্ৰাগছৰ বিৰুদ্ধে চলিছিল এক অভিযান।
আৰক্ষীৰ এই অভিযানতেই দলৈটোলাৰ নিজ ঘৰৰ পৰা ৰাজু আলী নামৰ দুৰ্ধৰ্ষ ড্ৰাগছ মাফিয়াজনক আটক কৰাৰ লগতে ৬৫ টাকৈ ড্ৰাগছ ভৰ্তি কন্টেইনাৰকে ধৰি নগদ ২০হাজাৰ টকা আৰু প্ৰায় ১কেজি গাঞ্জা জব্দ কৰিবলৈ সক্ষম হৈছে আৰক্ষীয়ে।
দীৰ্ঘদিন ধৰি এই ৰাজু আলীয়ে আৰক্ষীৰ চকুত ধুলি দি বিভিন্ন স্থানত চলাই আহিছিল ড্ৰাগছৰ ৰমৰমীয়া বেহা।
ইতিমধ্যে তীৰ্থনগৰী হাজোত গাঞ্জা আৰু ড্ৰাগছৰ বিৰুদ্ধে তীব্ৰ অভিযান অব্যাহত ৰাখিছে হাজো আৰক্ষীয়ে।
শেহতীয়াকৈ হাজোৰ বিভিন্ন প্ৰান্তত অভিযান চলাই আৰক্ষীয়ে বস্তাই বস্তাই গাঞ্জা জব্দ কৰাৰ লগতে আটক কৰিছে কেইবাটাও গাঞ্জা ব্যৱসায়ীক।
ইপিনে ৬৫টা ড্ৰাগছ ভৰ্তি কণ্টেইনাৰৰ সৈতে আটক হোৱা কুখ্যাত ড্ৰাগছ মাফিয়া ৰাজু আলীক অধিক তথ্যৰ বাবে সোধপোছ অব্যাহত ৰাখিছে হাজো আৰক্ষীয়ে।
